PUMPEKAWKNAK Vs HMANAWKNAK

Pumpekawknak & Hmanawknak

By: Hniangsinpa

A parih ka tar mi ah, a cafang a bangawklo bangin a sullam khal a dang zet ding. Himi thu ka ngannak san khal, kan hnatuan: ram hrang, kohhran hrang le pawlkawm hrangih kan tuah tuannak ahhin, kan hmangaw maw a siih, pumpeknak thawn kan tuan timi hi fiang thei cio sehla ti duhsannak ruangah ka run ngan a si.

Mi pakhat in pawl hrang simaw, ram hrang si maw, lole kohhran hrangih a tuannak ahhin, amah chu a hmangaw zet theiih, mi khal in, ‘Mi hmangaw zet a si’ tiih an sim mi khal a va si thei, hmansehla cui a hnatuannak in a hmanawknak chu, pumpeaw cingin maw, hmangaw menmen a si ti kan fiang a tha.

Pumpekawknak cun zuamnak a neiih, hmanawknak cu ‘a hmin men’ a si duh zet. Kan hmanawknak ahhin pumpeknak a tel lo ahcun, rah tha le, hminthatnak tlamtling a suah pi theu a si. Mi hmangaw zet pakhat cun, “Khami cu, cumi khami pawlih tuah ding a si, kan ni ti ding a si lo” ti tongkam hi a suah duh zet. Ziangah tile, pumpekawknak tello ih a tuan ruangah a si thei. A hminthat theinak tiang cu a hmangaw thei zet ding nan, midang hrangih tuah tuan asinak sawn cu a thei ban dah lo ding. Cui pekawknak tello hmanawknak cun, a kiang le kap le a hmanawknak hmun hrang khal, rah duhnungza a suahpi mal zet ding.

Veikhat cu tlanghna tuannak kan neiih, ka nauhak deuh lai ihsin a hmin ka theih mi, mi hmangaw zet tiih mi khalih an theih cun, tlang hnatuannak ah, tuah ding le ti ding cin a neih thu a sim ih, ka thinlung cun, mi hmangaw a si ahcun, cuvek tongkam a hman ka zum ban lo. Hmansehla, ka theihsuahmi sawn cu amah ahkhan, “Pumpekawknak” a nei lo a rak si. Pumpekawknak cun ramri a nei lo ih, amah sawn a cem ral cu a siangaw theu. Cumi ih ram cu, zokhalin cui rah cu an hmuh tikah, theihsual palhsual ti rel ding an thei lo ih, ­­­­cui pumpeaw ih hnatuantu cun, an thinlungah zahnak a neih ter theu.

Hruaitu ram zet kan nei ih, cui kan hruaitu, rinsantlak pawl in pumpeaw ih hna an tuan ah cun, kan ram a dam teng teng ding. Hmanawknak lawng cun ziang rahtha khal suahpi tak tak thei lo. Nitin hnatuannak khalah, pumpeaw ih tuantu cu, rah tha hmu tlak a si ih, a tuahtuannak khal ah thlawsuah a co theu. Cotlak ih a pumpekawknak ruangah a si. Cutivek thotho in, rampi pakhat, pawlkawm pakhat, kohhran le khawtlang khal siseh, pumpeaw ih hmangaw pakhat a um cun, thansoh rero cu an lamzin a si theu.

Khuahlan thuanthu pawl kan siar tik khalah, pumpeaw pakhat ruangih an ram, an kohhran, an pawl le khawtlang nun a thansoh thei zia kan hmu thei ding. Rampi pakhat tuahthatnak khalah hruaitu pumpeaw ngam an um cun, ram in rahtha a suah theu. Cui pumpekawknak cun, lungrualnak lam zin khalah mi a hruai thei a si.

Kan Laimi in hruaitu lak khal ahhin, pumpeaw ngam, mai hrangih cemralnak a va si khalih, dung sup lo ih tuan ngamtu kan neih ahcun, tui lungruallo ih kan theihawknak, lungrual thei nawn lo ding tiangih mmi hrekkhatin an zummi khal cu, kan pah bal thei ding a si. Mai han kaih mi cio ah, pumpeaw in, hmangaw lawng silo ih kan um ngam ahcun, lungrualnak, unauawknak pawl khal cu kan niih hawl tullo le buaipi tullo in kan hnen lam an tang sawn ding.

Mah hotu si theilo ih pawl thar din tum ring ring hotu kan neih sungah cun, pumpekawknak nei lo a si ti fiangin, kan mipi khal in ralrinnak cang thiam an dung thlun simaw hi phang ngam sehla, sungkhat unau an sinak men ruangih duhsakawk vivo khal rim ngamtu si kan tum cio a tha. Hotu silo khal, a mi zaran lakih pumpeaw ngamtu an um ahcun, an pawlkawm a hngetkhoh lo thei lo!!! Hruaitu an thupit rualrualin, a mipi lak khalah pumpekawk ngamnak kan neih a tha zet.

Pumpekawknak kan neih lo ahcun maw, kan Khristian nun khal hi a thangso thei lo. Kohhran khal a nung lo bangin, pumpekawknak tello cun Vanram khalah nuamin kan um thei ka zum lo. Curuangah, kan thinlung sungih cinken hrangih ka duh zet mi cu, “Ka hmangaw ngam a si ahcun, Pum ka pe aw ngam ding a si” timi hi kan thinlungah umsehla ka duh. Hmangaw laklawh si, pumpekawk ngam ngaingai lo cu, siatralnak lamzin hram thok si in ka thei. Hmangaw ngamtu kan Laimi hruaitu lak ihsin, pumpeaw ngamtu kan um ahcun, kan Laimi cun kan Pialral lamzin kan zawhthawk thlang a si hi, tiin zabeng kan cui hruaitu thlazap hnuai ah kan kun ngam ding a si.

(Visited 37 times, 1 visits today)

Comments

comments

2 Comments

  1. A dik nasa. Pumpekawknak le hmanawknak timi hi a rak dang aw nasa sisi. Ka siar ih thazang ka ngah zet.

  2. Hniangsinpa- na titha theituk aw…

    Rawn ngan bet vivo aw…

Comments

%d bloggers like this: