Pumhlum Peaw Gladys Aylward

PUMHLUM IH PEAW GLADYS ALYLWARD

 Dr. Timothy Sui Lian Mang

Gladys Aylward hi nu te, miniam, zirnak lam khalah zirnak nei lo a si. North London, Edmonton khua ah 1902 ah capetu pai sungkua ah fanu upabik si in a suak. A pianthar hnuah biakinn lam lawnglawng ih can hmang a si.

Ni khat cu bus ih a fehnak ah Tuluk ram thuhla le mi thawng za tampi rundamnak thu vei khat te hman thei hrih an SI thu a siarngah. A nunnak ah Tuluk ram ih missionary feh ding rori ih PATHIAN kawhnak cu el theih si in a thei lo. Curuangah China Inland Mission ah missionary dingin a dil. A dilnak cu interview tuahsak ding cun an pawm.

China Inland Mission Board in interview an tuah tikah ca zirnak a neih lo mi hin Tuluk ṭawng khal a thiam thei ding an zum lo ih, a hnenah cun Tuluk ṭawng hi na hrangah a har tuk ding, curuangah na feh lo mai a ṭha ding tiah an ti.

A thin a na tuk. Pathian kawhnak le el theih in a thei si lo, lamzin dang ka hawl thotho ding a ti ih, inn lamah a tlung, cule paisa hlawh in hna a ṭuan. Tuluk ram thlen theinak paisa ka neih phawt cun ka feh thotho ding, Pathian in a titi in i ti mai seh tiah a ruat. Tuluk ram thlennak ding daih sumpai a hlawhngah tikah a paisa cu a Bible sungah a ret ih, “Maw Pathian! Hi hi ka si ko, ka Bible sungah paisa ka neih zat ka ret. In hmang aw, in hmang aw!” tiah thla a cam. A rual nu pakhat in  Gladys Aylward hnenah Tuluk ram ih missionary ṭuan pitar Jeannie Lawson in bawmtu a ṭul thu a rak sim dah mi kha a thinlung ah a pai ringring. Pi nga fang sang, Gladys cun a paisa neih sunte in ticket a lei ih, Tuluk ram thleng dingin Russia, Siberia lamah tlangleng in a feh. Raldoawknak le a um fawn ih, Russia le Tuluk karlak khi ṭihnungza a si. Tuluk a thleng thei pei maw ti khal ruahhar a si. Asinan Pathian ih kawhnak a nunram ih um mi  cu el theih a si fawn si lo.

Tuluk Ram ah

Thih le thih, ka sisi ka si mai ding tiih Tuluk ram panih feh Gladys cu tawkfang zet hnuah Tuluk ram Yangcheng khua a thleng ve tariai. Cutawk ah Scotland ihsi missionary nunau Lawson cun a rak hmuak. Cutin a hnenah um in rawl suan tivek a ti thei mimi a bawm. An pahnih cun harsatnak phun za kip lakah Tuluk mipawl hnenah cun rawng an bawl. Tulukpawl cun khawsia an si ti in an hmuhsuam, an nautat. Lawson cu a rung thi lala ih, Gladys cu sumpai bawmtu nei loin amah te lawng rawngbawlnak cu a run peh vivo. A rei hlanah Gladys cun Tuluk ṭawng a thiam zet. Khaw tin ke in khual a tlawng ih, thuthangṭha a sim vivo. Thawnginn lam khalah a feh ih, thawngtlapawl a veh hai, thuthangṭha a sim hai. Tuluk ram ah cun an thei tuk thlang ih, “Nunau Thaṭhum” ti rori in an ko.

Tuluk mipawl in an duh tuk lawmmam ih, Tuluk mi sinak rori thawn Tuluk ram ah rawng a bawl. Tuluk nauhak tampi le minopawl ih nu ah a cang.

Leitlun ralpi a rung tho tikah, Japan ralkappawl in Tuluk an do ih, Gladys hrangah harsatnak tampi a um.

1940 ah Japan ralkappawl in YangChang khua an run naih thlang tikah, Gladys cun Tuluk nauhak 100 cu Yellow Tiva tan in Sian tlang par lamah a tlanpi hai. An tlannak cu thla khat zik lai a rei, ei ding rawl malte lawng an keng fawn. A cau tuk ih, Gladys cu ṭaiphawt in besia zetin a na.

Pathian kilvennak ti cu thilmak tak a si, Swedish-American missionary pa kha Amerika ram ihsin Tuluk ram a thlen pekte a si ih, tuamhlawmawknak si tampi a keng. Gladys cu a tuamhlawm ih, a rung dam lehsal. Thla khat sung cu cak lo zet le thinlung lam khalah bang zetin a um. Mangbangza in a rung damcaksal ih, nauhakpawl le ralrelhpawl hnenah rawngbawlnak nasa zetin a nei thei.

Communist in Tuluk ram cu a lak tikah, Gladys cu 1949 kum ah, kum 17 sung Tuluk ram ih a um hnuah, Englang ah kuatsal  a si.

England a thlen tikah a hmin a thang tuk ruangah mi in thusim ah an sawm, thu a phunphun an sut. A rawngbawldanpawl an sut ih, flim tla an suah.

1957 ah Gladys cu Hong Kong a tlawng ih, cutin Taiwai lam le neta lamah Tuluk ram sung khal a lut leh. Amerika, Canada, New Zealand le Australia lam khal  a tlawng. British siangpahrang nu thawn khal kawmawknak an nei.

1970 ah Taiwai ah Gladys cu raibur pi in a tlak ih, a thi. Taipei ah phum a  si. Pathian in ca thiam lo, miaa te khal pumhlum ih pekawk phawt cun mi a hmang thei a si ti hi Gladys nun in a langfiang zet. Gladys cu mi tawng za tampi hnenah malsawm a si rori. Minopawl hnenah Gladys in hitin thu a cah hai:

“Ca na thiam maw thiam lo ti ah khawruahhar hlah. Pathian in ziang certificate na nei ti a lo sut lo ding. A kawhnak ah na rinum maw rinum lo ti lawng a lo sut ding,” tiin.

(Don’t worry about your education. God won’t ask you for your certificates; he’ll only ask if you have been faithful to His call)

*****

(Visited 96 times, 1 visits today)

Comments

comments

Comments

%d bloggers like this: