Pu Zahre Lian

Pu Zahre Lian

(Thuanthu tawi)

(Feb. 22, 1923 – Ap. 14, 1997)

By: Pastor Caleb Laltinhrem

Suahsemnak:

Tlawngkainak

A pa Pu Thang Tin Lian in a fapa pawl cu tlawngkai dingin a fial hai nan a fanu pawl cu a rak siang hai lo. Pu Za Hre Lian cu kum 5-6 a kim tik ah Tlauhmun Primary School ah tlawngkai a thok ve. 1933 ah Government Middle School, Falam ah a rak kai ih Kawlca cu zir a rak si hrih lo tikah a rak zir lo. Asinan, a pa Pu Thang Tin Lian hi Kawlca in phunsarih tiang ongmi a rak si ruangah Kawlca na zir a tul a rak tiih tuition zirhtu pakhat a laksak ih Kawlca a rak zir ve. 1938 ah Maymyo ih Government High School ah a vung kai thok. Kawlca a vung thiamzet ih 80% hnakih mal hmat a ngah dah lo. Kumhnih a vungkai hnu ah Phunsang Tlawng luhtheinak (Matriculate) a ongih 1940 ah Mandalay ih college pakhat ah a kai.

Fimthiamnak Hawl ah Ke in a feh

Japan pawl in kan ram an ra siim ruangah kan ramah harsatnak tampi a thleng. Phunsang Tlawng tlawngtapawl cu thlunter thluh an rak siih, Pu Za Hre Lian khal Falam lam pan in a rak tlung ve. 1942 ahkhan Japan pawl in Yangon ah bomb an thlak ih Pu Za Hre Lian cu India lam feh dingin timlamnak a rak nei. India ih British Military Academy kai thei dingin feh tum cu a rak si. Falam cun ke in a pok suak ih nilitnak ah Tidim a rak thleng. Tonzaang pal phah in India ramri lam pan in a feh vivo. Mi-uk Pum Za Mang ih umnak inn ah zaankhat a rak riak. Kaphi Lui timi hmun a thlengih cuih sin India cu Jeeps thawn feh a theih ruangah ke ih a feh tulnak cu a cem ih a thaw a rak suakzet.

India Ralkap Hotu A Tong

Lucknow ah ralkap tlawng  kaitheinak luhnak camibuai cu tuahzik a siih, hi zuamawknak ahhin mino thatha, thluak thatha lawnglawng zakhat lenglo thawn zuamawk ding a si. A ongtu cu ralbawi tuan zirtu officer (cadet officer) ah ret an si pei ih, British Indian Army in 380 Rupees cu thlakhat ah a pe ding ti a rak si. Hi zuamawknak ahhin kum 18 hnuailam a rak ngah lo ih Pu Za Hre Lian cu kum 19 a rak si. Hi zuamawknak ahhin sinak pathum an ngah theimi a um ih British Indian Government ih lungkim mi a si fawn. Cu pawl cu Ralbawi (Colonel), Ralbawipi (Lieutenant Colonel), Deputy Commissioner all appointed by the British Indian government. Hi zuamawknak ahhin mipum sawmli lawng an la ih cumi sawmli lakah Pu Zahre Lian hi a rak tel ve. Ralbawi (The Colonel), board chairman a simi in “Zahre Lian nangcu a tlunlam ih pathumpawl na kai thei thluh” a ti. Vansiat le malmak ah a si bik kei cu harhdamnak lam an zohsal tikah Pu Za Hre Lian cu a rak tling saal lo. A rualpi pawl in doctor nawhthuhpe dingin ruahnak an pe cio ko nan cuvek cu thil tha a si cuang lo ding, cun, dik lo ih hnatuan ka duh lo a rak tiih a rak el-hai. Selection Board Secretary Mr. Cohen cun, Burma ih tlung saal dingin le harhdamnak zohfel hnu ah Lucknow ah hungsal dingin ruahnak a rak pe. Asinan ralkap hotu (Adjutant General) ka ton hlan lo ti’n tumruh takin New Delhi lam pan in a suk thla vivo. Rangleng thawn a office cu a feh, asinan, sangka kiltu in innsung ih luh le ralkap hotu vung ton ding cu a rak siang lo. Kan ram ah harsatnak Japan pawl in an thlen thu le hmun hlapi ihsin ra-mi a si thu cu thinsaute’n a sim rero ih Ralkap hotu cu a tong thei tariai. Nisa lingkheng lakah ke thawn ka hung feh ih ka mit a sen thluh, himi ruangah ka harhdamnak a tha lo in tiih tlawngkainak dingah in duhsal lo a si. Cun, doctor nawhthuh pek le ka duh fawn lo tiah Ralkap hotu cu a sim fiang.

Ralkap hotu pa cun a zaangfaktuk ih Military cadet officer dinhmun ah a toter. Punjab ih Hoshurpur ah ralkap lam fimzirnak zir dingin a thlah. Cun, Bangalore ah kumhnih sung ralkap lam thu zir dingin a rak feh nan, raalpi a ratzik ruangah kumkhat lawngah a cang. Secand Lieutenant a si lohli ih Britist Army commissioned nauhakbik a rak si fawn.

Vomthu Maung A Tawng

The minister of Chin affairs ih theihpinak tel loin Victoria cu a rak suahsan ih Yangon ah Vomthu Maung tawng dingin a rak feh. Vomthu Maung parih a ninghannak pawl sim ding rorin a office ah a a va tawng. Kumkhat sung ah Kanpalet ihsin Hakha, Hakha ihsin Moulmein, Moulmein ihsin Tavoy le Tavoy ihsin Victoria Point ih a ?hawn cingcing ruangah Pu Zahre Lian cu Vomthu Maung parah a lung a rak awi hrimhrim lo.

Hmaitawn in hitin a sim, “Hitivekin i ?hawn ciamco hi a sullam ka thei ko, asinan, na tumtahmipawl cu thil ?ha a si lo. Pakhatnakah, District Headquaters cu Kanpalet ihsin Misisik ih ?hawn na tummi hi ruathnik. Zohman in an lo lungkimpi lo. Misisik ah office hrangah inn le lo a um fawn lo, tidai le a ?ha lo, thawnginn le umnak inn ?ha le a um lo. District Headquaters cu?haten kan fehpi thei lo asile keimah (Zahre Lian) hi mi hmuahhmuah in in mawhthluk ding! Pahnihnakah, Daan vek a si lomi (illegal) in Ki Ling na kaih ruangah mi puarthaumi le mihngal hna a siih keicu hivek hna?uan ah ka lo telpi thei lo a si” a ti. A dang pahnih a um lainan ngan cun a tamvivo pang ding.

“Kan ram hi zalen ram a si ruagnah ka duh dandan vekin ka tuah thei ko,” tiah hngalzet le duhawzet in Vomthu Maung cun a let. “Hna?uan ihsin cawlh dinglawng ka hmabak” ti’n pu Zahre Lian cun a sim tikah, “Zalen ram kan si ruangah cu khal cu ka lo tuahsak thei ko” tiah duhawzet le zianghman ih siar lo zetvek in Vomthu Maung cun pu Zahre Lian cu a ti. Pu Zahre Lian cun, na duh takin maw na rel a tiih “zoh aw party ka din peiih nangmah ka lo zuam ding”tiah a ti tikah Vomthu Maung cu a lauzet ih a hmai khal a senthluh. Phur lem lo cun “A si ko ee” tiah Vomthu Maung cun a ti.

Chin Congress Party a din

SDO hna?uan ihsin a cawl veten political party thar dinve dingin Falam ah Pu Zahre Lian cu a tlung vurvo. Cuih ni rei lote ah Chin Congress Party timi cu 1951 ah a run din suak taktak ih amah cu President a si. Cuticun Chinland ah party pali an um. Cupawl cu 1) Con Mang, from Laizo, Farah Party ti a siih, 2) Pu ?ial Dum, Tlauhmun, of ABM Krifa Party, 3) Ral Hmung,?ashon, of Independent Party, le Chin Congress Party hi an rak si.

Pu Zahre Lian cu Chin Minister dingin hril a sinan, a kum (29) a nauhak lai tiah Prime Minister U Nu in a tiih Chin Congress Party sungta thotho Shein Htang (Congress Party parliament member from Kanpalet) cu Chin Minister a ?uan ter. Hruaitu dang tampi cun U Nu ih hnenah Zahre Lian in ?uanseh tithu an sim rero nan, a ngaihsak duh lo. Veikhat cu Chin Hills tlawng dingin U Nu in Chin Minister thar Shein Htang cu a sawm. Kawl ralkap pawlin Shein Htang cu an thlun ih Chinland lam pan ih Yangon ihsin a pawk suak. Lai Ralkap hruai loin Kawl ralkap a hruai ruangah Chinland ih ummi mipipawl cu an thin a hengzet. Cuih?um ah, Falam Tawnhall ahcun Meeting cu an tuahih cuih meeting ahcun Thein Maung cu chairman a si. Mipipawl hnenah thusimnak caan nei thei ve dingin Pu Zahre Lian cun  Thein Maung ci a dil, asinan, a rak el awk. Meeting ihsin Pu Zahre Lian cu a suakih pu Zahre Lian dung thlun in midang khal an suak thluh, palikpawl khal an tlung ve. U Nu hnenah mi pakhat tla cun “Zahre Lian hi a fimtuk ih na ralrin deuh cu a ?ul ding” tiah a ti. Pu Zahre Lian cu Parliamentary Secretary ah an rak hril.

U Nu In a Ko

1952 ah U Nu in Pu Zahre Lian cu a office ah tawng aw dingin a ko. U Nu cun United States (US) va fehih USA ih bawmnak Loans la dingin le United Nations (UN) meeting tuahnak ding New York ah fehih meeting kai a fial. Chin Minister si thei lo dingin U Nu in Pu Zahre Lian cu a phunphun ih a rak tawlrel ruangah, atu ahcun remawknak a tuahthawk thlang. UN meeting a rak kai lai ahhin kum nauhak te lawng a si lai. U Thant (UN Secretary ?uanzo, 1962) khal cu meeting ah a rak tel veih Pu Zahre Lian thawn zarh malte sung an pawl aw theiih Pu Zahre Lian cu a lung a rak kimzet.

Parliament memberspawl cu nikhat hnu nikhat an lung a awi lo deuhdeuh ih Prime Minister U Nu ih office rori ah Chin Minister Shein Htang in zianghman in tuahsak thei lo tiah an vung ti. Lun Pum le Lian Thum cu hotu an si. Hitawk ahcun U Nu in an simmi le an dilmi cu a ngaisak thlang.

Chin Minister a ?uannak

Chin Minister ?uan dingin mipi ih hrilmi Pu Zahre Lian cu U Nu in kum hnih sung rori a ?uan ter lo hnu ahcun ?uanter thlang a duh. 1952 kum thawk lamih hrilawknak vek a si ahcun votes in a neh ruangah Chin Minister cu ?uantlak hrimhrim a rak si ko. Pu Zahre Lian cu 1954 kum thawk ihsicun Minister of Chin Affairs a ?uan thawk ve ta!!! Kum ruk hnakih tam ka sunmang cu netabik ahcun a rung famkim ta tiah a ti.(After six, or more, years of struggling to attain this goal, my dream was finally realized).

Lai Nunaupawl Hrangah

Pu Zahre Lian cu Chin Minister a si vekin Lai nunaupawl in right an nei lotuk hi thil ?ha lo a si tiah a sim nasa. Nunau in rothil co dingkhal an nei lo, a tawk le mawi cu cotlak an si ve ko ti thu a au pi. A rang thei bikin hi kan Lai Nunphung te hi cun thleng thei zangzang dingin a party-pipawl tla a rak sim thluh. Cun, nunau tlawngkai tla hi an rak kham ruangah Pu Zahre Lian cun nunau khal tlawng an kai ve a ?ul zia nasatak in mipipawl hnenah phunsuahnak a rak nei. A pa Pu Thang Tin Lian (Zahau Miuk) cun nunau tlawngkai a ?ul lo. Tlangval cakuat an thiam dingih a?ha lo a rak ti laiah, a fapa Pu Zahre Lian cun kai ding tiah a ti. Fimthiamnak nei lo nunau cu miih zohniammi an si ding ti thu khal a sim fawn. Nulepapawl a ko khawm ih ‘nan fanupawl tlawng nan kai ter lo le mipa cathiam le phunsang thleng cun nan fanu an duh lo kei, pasal fim le fel tawng loin an um ding’ tiah a sim hai.

Hrilawknak a veihnihnak

Veihnihnak hrilawknak  cu 1956 ah a um sal ih himi hrilawknak ahhin The Chin National Organization le The Chin Congress Party pahnih zuamawknak tluk a rak si.  Hi hrilawknak ah Pu Zahre Lian cu Minister of Chin Affairs pehhrih dingin hril sal a si. Term hnihnak a si.

Hrilawknak a veithumnak

A veithumnak hrilawknak ahcun hngalzet ih um le rinsan aw zet Swe Nyein Party cu dangdawr zet in a um thlang. Pu Zahre Lian cu Minister of Chin Affairs a si sal lala (1960). A veithumnak tiang hril ih a um hlan ah Pu Ral Hmung cu Minister of Chin Affairs ?uanter a siih ni 300 hnakih mal lawng a ?uan thei. A tuah lo dingmi a tuah ruangah Ne Win in a cawlhter.

Hna?uan tum pipi pathum a kai cem

Pu Zahre Lian cu Chin Minister si cingin hna?uan tum pipi adang pathum ?uancem dingin U Nu in a dil. Cumipawl cu: 1> The ministry of National Housing, 2> the Ministry of Public Works and 3> the Ministry of Rehabilatation tla an si. Hitivek ih hna?uan tum pipi pali a ?uan kawp ih ruangah Chin Parliament memberspawl in Chin Minister ihsin cawlhter an tum. Hitawk ih Chin Parliament memberspawl cu Pu Zahre Lian ih kaihhruaimi le thazangpekmi lawngte an rak si. Asinan, iksikawknak le eltaiawknak ruangah hivek in an karlakah thubuai a rak suak.

Ralkap in kan ram a run uk veten Pu Zahre Lian cu Falam tlung dingin Ne Win a dil. A dil vekin a tlungih amai’ umnak ding inn le lo cu Pathangkhan veng, Falam ah a hung sak. A sak lai ahcun midang inn sang in a rak um. Ram le miphun hrang ih a pekawktuk ruangah amai’ innsang hrangah ruat man loin a rak um phah.

France, Ambassador (1964-1969)

Can rei lo te sungcu Falam ah a um. Asinan, Yangon ihsin cakuat a ngahih a rang theibikin Yangon ah a suk thla. 1964 kum lai hrawngah France ram ih ram palai (ambassador) va ?uan dingin Ne Win in a dil. France ram khawlipi Paris cu December 1964 ah an va thlengih a rang thei bikin France President Charles de Gaulle a va tawn lawng hman si loin ram palai hna?uan peknak zung ca (credentials) a pe. Ambassador ahhi phun 11 in ?hen a siih, Pu Zahre Lian hi Ambassador Extraordinary and Plenipoteniary (Highest) a si. Ramkawm kumpi in Pu Zahre Lian cu ambassador hmuahmuah lakih sangbik sinak thawn palai an ?uanter. Paris ih a um laiah rilte peng nat (appendix) in a thizikte. Paris ih Embassy innpi cu a va rem ciamco ih?hazet ah a cang.

Holland, Ambassador

Paris ih um cingin Holland (Netherland) ram ah palai ?uan dingin kan ram kumpi in a fial, asancu midang fial ding an theih lo ruangah a si. Holland ramih thu neitu bik cu Queen Juliana a siih upatnak ah a va tawng lohli.

Spain, Ambassador

Kan ram in midang a kuat thei lo ruangah Pu Zahre Lian cu Paris ah um vek thotho si in Spain ah Ambassador hna va ?uan dingin an fial lala. Spain Emperor a va tawng, Spain ah Burma Embassy a um hmaisabik kum a siih Emperor cu a lung a kimzet. Paris ihsin kumkhat ah veikhat tal cu Spain ah a va feh ringring, a ?ul caan deuh le veikhat hnakih tam a va feh.

Tlawngta hna ?uan a pek

Kawl cozah in scholarships pek dingin Frence ah tlawngta a kuat. An scholarship cu a rak mal deuh a si bik ko ding, hai an daih aw thei loih Pu Zahre Lian in amai office ah hna a ?uan ter hai. Cutivek ih hna ?uannak a pek cu Yangon ihsin an hi theiih tlawngtapawl cu cozah hnenah tangka pe sal dingin an dil. Kawl cozah in hna?uan a siang hai lo. Amai’ hnenih hna?uan cu a cawlter hai nan, hmun dang ah ?uan theinak a pek hai. Asinan, an ?uan a si khal le amah Pu Zahre Lian hnenih sim a duh lo.

Egypt, Ambassador (1970-1975)

Hi kum ihsin France ah ?uan nawn loin Egypt ah a va ?uan thawk. Ambassador dinhmun in tuah tengteng ?ulmi a si vekin President Gamal Abdul Nasser cu ram palai hna?uan peknak zung ca a pe. 1955 ah President Nasser thawn Bandung ah an rak tawngaw zo, an rak thei aw zo. Cuih lai ahcun President a si hrih lo nan power neizetmi ralkap hotu a rak si. Kum hleinga lai an tawnawk lonak reizo hmansehla President Nasser cun Pu Zahre Lian cu a thei thiam lai. Nasser cu Vice president pakhat lawng nei loin pali rori a nei. President Nasser cu mizangfah nei lomi a si tiah Egypt Prime Minister hlun in Pu Zahre Lian cu a simih a zumve. Kum nga a umnak Cairo khawlipi cu nuam an tizet thlang. Myanmar ih Egyptian Ambassador khal Pu Zahre Lian thawn rualpi ?hazet an si.

Nepal Ihsin USA

Hna ?uan ihsin cawl dingin a rak ruat awk rero lai fangah Nepal ram ah Ambassador dinhmun in va feh leh dingin thupeknak ca a ngah. Nepal ih va ?hawn dingcun thubawhcahnak a tuah. Cuticun Nepal ahcun a va ?hawn ih King Birendra tawng dingin an tim tuah rero laiah Burma Prime Minister U Sein Win cu a innsang thawn Pu Zahre Lian tlawngin a fehih Pu Zahre Lian cu thazang a pek. Siangpahrang Birendra pa Siangpahrang hlun King Tribuvan cu Nepal mipipawl (Nepalese) in an upatzet an duhzetmi a si. Ramtawi in a vak lai ah kum 51 a simi Siangpahrang cu a thiih a fapa King Birendra in Siangpahrang hna a run ?uan. Siangpahrang Birendra cu kum 20 hrawng lawng a siih a nupi Siangpahrang nupi (Queen) thawn mipi ih lungkimpizetmi an si.

Pu Zahre Lian cu a fate pali ih fimthiamnak a ruat ih India ram ih Darheeling ah Americanpawl ih tlawng tuahmi ah a hi kai ter hai.

Pu Zahre Lian cu a harhdamnak (heart) a ?halo vivo ih foreign ministry hnenah a harhdamnak lam zohfelawknak (treatment) nei dingin a dil, Yangon ih rungkir sal dingin le treatment la dingin a rak fial. Yangon a rung thlen cun ?haten a piah aw ih siibawipawl in ?haten an rak tuamhlawm. USA ah harhdamnak va zoh aw felsal dingin a fehih Nepal a ra thlen sal tikah foreign ministry hnen ihsin thu a ngahmi cu “na hna?uannak ihsin na cawl thei zo, Burma ah kir tengteng aw,” ti’n. Biaknak bang awmi a unau Dr. San Lwai cun USA ram ih um dingin ruahnak a rak pe.

USA ah a thlengsal

Mrs. Marquita Maytag cu American Ambassador, Nepal ih um a siih Pu Zahre Lian thawn an thei aw zet. Mrs. Marquita Maytag in USA ih feh thei dingin ziangkim a tawlrel sak thluh. Kawl cozah cun USA ih an feh sian lo thu an theihter lohli nan Pu Zahre Lian cun “Kawl cozah ih cawlhter zomi ka si vekin ka cawlhhahdamnak ding hmun ahcun ka duhduhnak hmun ah in cawlhter ding cu thil mawi a si” tiah a sang. Cuticun USA ah an sungten an um. A natnak cu a bese vivo ih April 14, 1997 ah a Pathian/pathian hnenah in cawlhsan.

Zahre Lian Scholarship

Atu ahcun Mrs Zahre Lian cu Washington, USA ah nungdam laiih Pathian hmin thang?hat in umseh. A pasal hngilhlonak dingah tin Zahre Lian Scholarship tla cu ramsung ah pek in a um. A hleice in MIT tlawngtapawl in hi pu Zahre Lian Scholarship hi an cotambik ding ti a si. Nangkhal hi Pu Zahre Lian ih scholarship hi ngahtlak in na ruat awk asile Pu Lal Bik hnenah a ngah dan ding zingzawi theih a si.

(Hsn: Pu Zahre Lian thuthawn pehparawin famkimzet ih theihtheinak cu Zahre Lian of Burma, by Dr. Hre Kio)

Note: Yangon Zahau Nunphung Pawlpi, Kum 25 Kimnak Silver Jubilee Mekazin, 2009 ta laksawngmi a si. Editor Salai Zahau Caleb Laltinhrem

Comments

comments

One Comment

  1. Saithantluanga Tuallawt says:

    Saya Hrem,

    Na ti tha law law… Siar tla a nuam zet. Thangtinlian thu hla tla theih a cak um sin sin. Lungawi ….

Comments

%d bloggers like this: