Pu Vanlalzawma le Chinlandtoday.Info

Pu Vanlalzawma le Chinlandtoday.Info

image0161Chin National Day kan Chin mi in New Delhi ih kan hman ni ah, Chinland Today thuthang lakhawmtu cun kan ni sunglawi ih khualpibik Pu Vanlalzawma thawn hmaitawn thusuhnak, can umlozet karlak ih a thusuhnak le tongkam pawl cu a hnuai lam vek a si. Amah hi mi lekmi, mipi harsatnak bawm duhmi a si (A bawm theinak zawnah). Loksabha hrilawnak a vei 13 nak ih tling a si. Loksabha kan ti khin, ram leng um le suak hrih lo, ram sung um pawl ih kan theih dan ding cun, India hi Democracy kau bik a si ih, cumi hmun ahcun, state tin ihsin an ram state hrangih mi pitling, ram thatnak duh pawl le ram hrangih ruat pawl hril an siih, cumi ah, Pu Vanlalzawma hi Mizoram aiawh ih, kum 1999 ah hril a rak si. Himi hnu kum 2004 ahkhan MNF (Kan dun Mizoram hrilawknak ih tla, term hnih rori cozah rak kaitu) ah a lut ih, kum 10 rori Delhi ah um zo ih, MP sinak hi a rak kai. Amah hin fapa pathum (3) a nei. A hnuai ihsin Chinlandtoday.Info cu Ct ti a si dingih, Pu Zawma hi Vlzti a si ding.

CT: Na suahnak khua le na nu le pa hmin le na duhbikmi na nupi in sim thei kem maw?

Vlz: Ka suahnak hi Lunglei le Aizawl District rii awknak, Chhihphir Khua ah ka suak ih, ka pa hi Remkunga a siih, ka nu hi Chalhngaki a si. Cun, kum 1981, Oct 16 ahkhan Remtluangi thawn kan nei awk.

Ct: Cun tu hi na man lo zet cingin caan in pe ih, kan vun aam lawlaw dingih, ziangtinha Loksabha lam ih na luh daan in sim thei kem?

Vlz: Loksa bha timi hi India ih cozah in an hmanmi tongkam a siih, The House of the people (Mipi thuneihnak innpi) tiin an ko theu ih, cu mi ih duhsan cu Parliament (Rorelnak pi bik) hnuaiih um a si.

CT: Cumi ih na luh dah in sim bet thei kem maw?

Vlz: Aw, kum 1999 ahkhan Mizoram aiawh ih mipi in hrilnak thawn ka lut ih, kum 2004 ahkhan MNF party (Mizoram) sungah lut ih, tuhi Delhi ah kum 10 ka um thlang tinak a si cu.

Ct: Tui na hnatuan mi in sim thei kem maw?

Vlz: Aw, tu hi 5th August 2007 ihsin External Affair ah member siin tui ni tiang ka um, kan hantuan tlangpi cu Mizoram hrang ih thatnak ding meeting pi ih va thlen a siih cumi cu Public Service tinak a si kei cu.

Ct: Thudang ah vun kat duak sehla, zianglam ha na paih zawng?

Vlz: Chess le Volleyball hi a si bik ko.

Ct: Chin mi pawl ziangtin na ruat?

Vlz: Ka zaangfah in an hrang tuah thei neih hi ka duhbik mi a si nan, kan hnatuannak lenglam ih um an siih, a hleice in Delhi ih um, Raltlan pawl tla hi cu, an dinhmun ka hmu ih, an lak khalah ka rak tel tam thlang ih, Pathian kutih um rel ban lo hmansehla, tuahsak thei ni neih cu ka beisei zet.

Ct: Tui Mizoram ih pawl thar tisehla, mi tam sawn cun an thei hrih lo tla a si thei, cu pawl hi Map ngan mi ah, Mizoram, Manipur, Nagaland le Chinland pawl unau an si timi an tlangzarh thu ah ziangtin ngaidan na neih?

Vlz: Aw si ngai, khami thu ih ka hmuh dan cu, Mizoram hi a hlan ahcun “Lushai Hills” ti a rak si theu, hmansehla tu ahcun, Lushei kan um nawn lo, “Mizo” an ti awk theh zo, cuvek in, kan thinlung hi hmunkhat theiin umsehla, ziangha maw kan tih ding, unau cu unau kan si si tiah ka ruat.

Ct: Lungawi, cun kan CT siartu tam sawn hi Falam an si ko nan, nangmah vek upat tlak le sunlawih tlak minung thuhla hi siar nuam an tiih, ziangtin a siar tu pawl thazaang na pek duh?

Vlz: Si, kei vek ih thuhla an rak siar duh cu, a lungawi um rualrual in, a phuhrunawk um zet, thazaang ka pek duhmi cu, tong lawng silo, tuahnak rori thawn hmailam pan dingih kekarnak hin hmual a nei a si ti hi a si bik ko.

Ct: Kan dung kum ahkhan India Prime Minister rori kawlram tlawngin thu an rel tlang ih, kan thutheih dan cun, India in Kawlram a tan ti a si ih, ziang ha na ngaih dan?

Vlz: Siko, kha mi thu ahkhan, India cun Democracy ngah thei nak ding le, Democracy lam hrimhrim cu thazaang a pek ih, a cozah Ralkap tan si lawn, Democracy Kawlram in a ngah theinak ding sawn lam ih tang a si sawn tiin ka hmu.

Ct: Mitui kan lo suhmi, Chinland le kan unau thu ahkhan, nangmai bulpak rori na ruah dan, ca siartu pawl in theih an hiar kan zum ih, ziangtin ha in sim thei kemmaw?

Vlz: Si, kha mi ahkhan, ‘Mizo Umbrella hnuaiah kan um’ tiih an tong fang hman theu mi thawn a kaihaw zet in ka hmu, ziangah tile, Mizo timi hnuaiah, zo cio khal kan kun in ka thei, ‘Umbrella’ cu a fate nan, mizo timi hi kan hmin ah khum cio thei sehla tiin ka ruat.

Ct: Na zirnak lam kan lo sut hngilh zik te ual, vun lo sut sehla, ziang mi na zir theh tiah?

Vlz: Si, ka zirnak hi Northeast Hills University (NEHU) in M.A ka theh ve a si hi.

Ct: A hlan ah, MP na si hlan a si kei cu, ziangmi lam le pawl ah ha na rak hmangawk theu?

Vlz: A poi mawh zet in ka thei, ka rak hmanawknak tlangpi cu YMA (Young Mizo Association), cun NGO le mipi hrang rori tuantu pawl ah an siih, YMA ah President sinak le, YMA (Central) ih Secretary sinak tiang cun ka rak kai dah. (Porhawk thu silo in tiah a hni ve).

Ct: Tui dinhmun na thlen ahhin kannih, mino hmailam can hngak ih to pawl hrangah, thucah duh mi le forhfial duh mi na neih in sim thei kem?

Vlz: A par lam ih ka lo sim zo bang in, tum ruhnak neiin, cumi cu hlawhtling ko ih tuah in le, tong lawng silo, a ngai hmuh rori tum hi mi pitling hna a si ti hi a si bik ko.

Ct: Kan thusuhmi pawl na can neih lo laiih in sawn theh vun duham in. Kawlram hin Democracy a ngah thei na zum maw, cun kan hmai kum 2010 in hrilawknak neih ngai thei na zum maw?

Vlz: Si, Ram timi cu a sung um minung pawl ih tuah a siih, Kawlram khal hiti ih Democracy tello ih a um ringring thei cu ka zum lo, a sung um mi an poimawh ih cumi cu a si.

Ct: A sung mi tiah, na rel duh in sim sau deuh thei kemmaw?

Vlz: Si, a sung um mi ka vun ti tikah, ramleng suak zo pawl khal an tel ding, ramsungih um le raltlan ih ramnuam thleng thei hrih lo khal an um ding, cu pawl cun ramsung ih Ram thatnak duhtu le tuan rero tu pawl kha bawm sehla, cui bawmnak hmang thiam dingin a tuantu pawl khal in tuan sehla, cumi cun beiseinak eng sawn a thlen ka zum.

Ct: Asile, Hillary Clinton in Jakarta ih Minister hnenih a simmi, ‘Kawlram thu hla ah Obama uknak hnuaiin kan ruat’ a timi hi cang thei ah na zum maw?

Vlz: Aw, cang thei e, USA cun a duh ahcun a tuah thei si. Iraq ram teh a tuah si. USA in an duh hnuhnu ahcun a tuah thei rori ding.

Ct: USA cun kap sehla na tinak deuh maw?

Vlz: Si cuang hlah tisehla, si e tla cu a cang thei ko. USA in a duh hnuhnu ahcun a tuah thei ka tinak sawn a si.

Ct: Can neilo cingih can in peknak ah CT hminin kan lungawi ih, hmailam khalah Chinmi hrang na tithei mi pawl in tisak nak duhsan thawn kan lungawi a si.

Vlz: Kei khal ka lungawi, CT Pathianin lo hruai vivo hramseh tiah sa duh ka that bet.

image0091(Himi CT in interview a neih tumah, amah Vanlalzawma hin can a neih lo thawn, voice ih record mi a siih, cumi hnuah thuhla kim deuh sawn suhsal a si). Pu Van Lal Zawma Contact duh hrang: (M) 0091-9868180301 (R) 0091-11 237993134 le Email: vzawma@sansad.nic.in a si. Amai thuhla thei duh hrangah http://164.100.47.134/newls/Biography.aspx?mpsno=535 ahhin zoh theih a si.

 

Comments

comments

One Comment

  1. Thusut na thiam lo dan cu zaangfak zat na si. Preparation ziang hman na nei lo asi hi.

Comments

%d bloggers like this: