Pu Khuang Lian Sum Le CT Thusuh Awknak

Pu Khuang Lian Sum

Pu Khuang Lian Sum hi CNA ralkap training rak kai hmaisabik le CNA ralkap pawl trainning pektu thleng a rak ttuan tu a si. Kan miphun hrangah nunnak tiang thapngam in mipnun duhdaw le tuantu a si. Tuisan mino pawl ih cawntlak pumpekk awknak neitu mi rinsantlak a si.

CT:: Nahminpum, na nu le pa, na unau, na nupi fanau pawl, nasuahnak khua tla insimthei peimaw?
KLS ::Aw simthei ee, kahminpum cu Khuang Lian Sum asi kasuahnak khua
Bualzawl, Pu Tawk Thang leh Pi Khaw Nei Sung teifa pakua lakih a laita
bik ka si. Ka unau pawlcu,
Hlawn Nei Tlem—-Tahan
Khaw Tin Men——Letpanchuang
Hiar Kip Zing—–Canada
Mang Tin Hrem—–New Delhi
Khuang Lian Sum—Canada
No Than Thluai—-Australia
Than Kip Hre——Aizawl
Thawng Sin Tlem—Canada
Ngun Cia Kil——Australia.
Hihi kan unau leh kan umnak hmunpawl asiih kanu le ka pa cu Lairawn Letpanchuang ah an um, Ka nupi Chin Khan Man asiih fanu pahnih leh fapa pakhat kan nei.

CT:: Tui na umnak Canada ram ziangtikah na rak thleng?
KLS ::August 7, 2003 ah kan thleng.

CT:: Canada na thlen hlanah khuiah naum?
KLS,, Canada ka rat hlanah New Delhi India ah kaum!

CT:: CNA ralkap Training dingah a feh hmaisabik pawlah narak tel tiaw?
KLS ::Aw si ee,,

CT:: Hmaisabik trip ah mi paziat nanfeh? zopawl nan si?
KLS ::A hmaisatrip ahkhan mi 5 (panga) kansiih
1)Sa Tin Mang
2)Khuang Lian Sum
3)Tha nei Luai
4)Zo Kap Mung le
5)Pau No, Pawlhi kansi,

CT:: CNA ralkap Training ong mi paziat ciah nan si?
KLS ::CNA ralkap KIA pawl hnen ihsi Training ong hi minung 64 kan si.

CT:: Training nan kailai ah harsa natibikmi leh nuam nati bikmi?

KLS ::Aaa,, keihi Training vawihnih kala ih ralkap training menmen ka ong hnuah ralkap tharpawl raldo zirhtu Training Instructor kazirsalih, ralkap training menmen hicu Saya pawlih mivuak leh mihrem hi a harbik cu asiko.
Training Instructor kazir nakah cun vuakawk leh hremawk cu a umnawnlo nan dan a khohkhah tukih himi a harbik ah acang kecu.A nawmnak lamhi cu Training ahcun relding a tam lemlo!

CT:: Ziangruang bikah CNA ah na rak lut? Ziangmi beiseinak na rak nei?
KLS :: Um!! Hicu thusuhnak tumzet asiih saudeuh in lolet sehla a famkim deuh dingah ka zum, A hmaisa bikah cun kan Chinram leh miphun hrangih zalennak ding policy ngaingai khal karak neilo kawlpawl mitkem leh huattuk ruangah bul ka ttannak asi, kawlpawlhi karak hua tukih 1984 phunsarih kakai lai kum 16 ttha fang kasi laiah Kachin Independent Army (KIA) pawl zawmih raldo zirtumin ka rualpi pahnih sawmin Pu No Thang thlunin (Khantti) kan rak panih asinan Kawl ralkap anrak tamtukih kan beisei leh tumtah vekin KIA pawlkha kan tawng theiloih beidawngin kankirsal,
Cumi hnuah rualpi dang pahnih ka sawmsalih 1985 kumtir ahkhan Mizo National Front (MNF) hnenih raldo zirih Chin ralkap situmin Bangladesh panin kan fehsal lehih asinan khami laikha MNF leh India cozah rualremnak tuahtumih anrak dawrawk rero lai asiih MNF pawlkhan an party titum leh ralkap lakbet an tumnawnloih beidawngin kan kirsalih 1986 ah MNF leh India cozahpi cu rualremnak tuahin MNF pawlkhal June,1986 ah an rungtlungthluh.
Cumi hnuin kan chinmi inhruai theitu leh politics lamih peaw theideuh tu Upa deuh sawmtumin ka mitmei rero laiah kan Unau hrekkhat pawlin Chin tapung din an tumtin in report ih September 4,1986 ah Kalamyo ralkap 89 Batalion pawlin in rakai ih thlathum sung Thawng in thlak.In hrem ciamco hnuah in suahsalih zungah thubuai kumkhat lai ka nei. Cumi kathubuai a cem veten Mizoram panin ka fehsalih March 20, 1988 ah Pu Tial Khal, Pu Lian No Thang leh Pu Ro Enga pawlin CNF party kha anrakdinih cumi cu ka hungzawm. Asinan ralkap anneithei hrih loih lehhnuah Pu No Than Kap kha ralkap Training nak leh bawmtu Harlingen KNU hmunpi Manaplo lamah an thlah ih cumi a rathlenhnu Dec 20, 1998 ah CNA ralkap sinak thutiam hi kanla suak.

CT:: CNF sungah lungrualnak a umlo ruangah Falam pengmipawl nan cawl thehih nathin lung ziangvekin khua naruat?Tuini vek dinhmun inteh cutin kanrak tilo, cuti zawngdeuhin rakti sehla, tivekih ruahcan naneimaw?

KLS :: CNF party a buaiih Falam pawl kancolh ahkhan Falammi ziangmawzat cun 1993 January 7 ahkhan Bangladesh ih kan Head Quarter kansuahsanih, ka thinlungih khawruahnak tumpi a ummi ah CNF kan buainak hrampi bikcu kawl ralkap Politics kando nehlo tin karuatih kan hotu pawllakah kawl ralkap minung anum asi peimaw? tiah kemah le kemah khal kasut aw rero.
A pawi katimi cu CNF party kuai mihin kan Chin miphun peng tinkim thin lung sungah huatawknak lungruallonak, zumawklonak, doawknak ,iksikawknak le hmuhsualawknak ci hngetzet a tuhdingih lehhnu kannaule tthangthar thinlung thianghlim virgin thianghlinte hin CNF party buainak politics thli rimsia hi an hawplut dingih an thinlung sungah a damtheinawnlomi politics sia natnak an tuarding tihi karak phancia mibik asi. Kanzum vekin tuidin hmunah CNF party thawi pehpar awin kan chin politics cu talsuak theinawnlonak tilipi sungah inhnuklut hicu a pawi kati.
Nathusuhmi pakhat, Tuidinhmunah cuti zawngdeuhin kanrak tilo , cutin rakti sehla timi na neimaw? timi hicu..
Kanei,Asinan himi cu kalo letlo mai ding kanmah Falam lam hotu hrang khalah,cun Unau CNF ttuan laitu pawlhrang khalah, Cun Halkha Upa dang hrangkhal ah ngainuamlo leh thilmawilo thuhla asi theiih curuangah inrak theithiam sak maiaw.

CT:: CNA ralkap in ralram na umlaiah harsat nakleh beidawngnak na tawngdahmaw?
KLS :: Hi nathu suhmi khalhi lamzin pahnih in kalolet dingih , Taksa lamihharsat nakleh Thinlung lamih harsat nak aum. Ral thawi kahawk hicu a har rori asiko, kawl ralkap pawlhi raldo an thiamtukih cun kannih hnakin antam sawn ringringih Raldo zirhtu Training Instructor kasi konan kawl ralkap thawi kahawk hicu ka ttihzet ttheu,lo theihlo asithu men asi. Maikhua le ramih rualpi leh fala hmaiih zuri nawnih ralttha kan tiawk ttheuhi cu kawl ralkap in meithal G3, G4 ih Auto ih mi an zit ciamco hicun raltthat a harzet ttheu,Thin lunglamah harsatnak a ummi cu ralkap pawl ramhnuaiah lungrual zetten kan umlaiah hmunpi lamih kan pu le pawl lungrualnakah an raktlasam, KIA pawlhnenih kan umlaiah KIA ralbawi pawltla cun kan din suakdinghi anrak zumlo cia, cucu kathin lungsungtei ka thinharnak leh beidawngnak thuruk rak ummi asi.

CT:: CNF sungah lungrual lonak a suakmihi hotu ruangah maw peng thinlung neihruangah asi tin na hmu?

KLS :: CNF party buainak hi mipi vangtlangin kanhmuh theihmi lenglam ih a langnak ahcun hotu buai ruangah tiih ruahtheih asi. A buainak taktak sunglam ihsi a irh puakkuai tertu cu pengthinlung neih ruangah asi tihicu lamzindang zawhpialter theih asilo. Tui sunni tiangah mihrekkhatin CNF buainak cu pengthinlung neih ruangah asilo ti’n ttang rero khal haisehla kanmipi leh tthangthar thinlung sungah a result cu fiangzetin a langih an ttannak karbak a nalzetding. Cumi rualin hotulam dinhmunah kanmai lamkhalin kanmah leh kanmah zohfiang awkding kannei tihi kan pawm thiam a ttul veding!

CT:: Training na kailai kan miphun hrangih thatho zetin ralram nafeh laileh tui nadin hmun na khaikhin tikah ziang a bang?
KLS ::Tui ka dinhmunah ramnuam leh ramttha kathlengih keimai bulpak dinhmunah cun ka tthangso konan, kan ram leh miphun hrang ahcun tuahthei mi ka neimal zet.

CT:: Nunnak tiang thapin kan miphun hrangah na rak ttuanzoih tuini ah ziangvek zawngin ttuan na duh / na tum?
KLS ::Politics timi hi a tikcu le a can a hmunle a ramih zirih zothiamhi a thupizet. A liamcia canah ralthuam hriamnam kaiin kan ram leh miphun hrangah zalennak kanrak sualih, khanglaiih kan hnattuan kha kan mai thinlung diorama a raksi. Burma ralkap cozah langter nakmen fangkha a raksi. kan chin miphun dinhmunah ralthuam hriamnamthawn zalennak kansualsuakding tihi cu tui din hmunah cun Upa lungfim rawnhmaisa sehla atthat kazum. Hraimman thawi cozah dohi miziang mawzatin an hlawhtling konan kan kiangkap pawl vunzoh sehla KNU in kum 50 lenglo ando KIA khalin kum 50 lai ando anmipi ttanpi nakkahl anhmu. India ramah kan Unau Naga pawlkhalin kum50 lenglo ando, ULFA pawlkhalin cuthotho,Sri lanka ah LTTE pawlkhalin ralthuam hriamnam ttha zet tampi an neiih tuthleng hlawhthling an umlo.
Kan leitlun ram tthangso vivo miah mipi in mahle bulpak thinlungsungah sia le ttha theihnak annnei thluhih ziangtlukin ralthuam hraimnam neittha khal sehla mipi ih support nak kan colo ahcun hlawhtlin nakcu hmunso khukdawmih tidai luantertum vek asi. Tu dinhmunah kan tuahthei micu kan tthangthar pawl fimthiamnak tthansoter, kan mipi vangtlang harhdamnak tuahsak, mipi vangtlang tile rawl khawpkham hmuhnak ding ngaihtuah sak, kan miphun cawisan, kan biaknak tthansopi sinsin leh thildang tthansonak pawlhi kantuah ttulmi asiin kahmu ih ka tum.

CT:: CNA/CNF ih rakttuanzo pawlhi kan mipiin kanlo ngaisang emem ih kan lo upat fawn tuini ah finkhawmawin kan miphun hrangah pumpe in ttuansal sehla kan Chin ramhrangah ziangtluk thathnemnak a umpei? ttuantlang theih asiko lo maw?

KLS :: Kan Chin ram leh miphun hrangah Finkhawm awin ttuantlang theihcu asiko. cun kan tthangthar mithiam pawlkhal pumpe awthei an tamko ding. Asinan thil pakhat ruahtthat hmaisa dingttul aum, cumicu ziangvek policy in hna kanttuanding tihi a thupizet, kan hnattuantummi policy kha mipiin anzoh dingih mipiih zumtlak kan sipei maw tihi kan ruah hmaisa ding asi.

CT:: Surbung tlang thuthang hi nangmai bulpak pekawk nakin maw Na ngan? a ropi
kanti nasa!

KLS ::Ka lungawi, Surbung tlang thuthang hi kannu in inbawm ttheu!

CT:: “O” le “aw” ahcun nabuai lemlo kei cu ti aw..
KLS :: Hahaha,, rakbuaive ding khalcu asinan, a thasawn leh a diksawn relpi ding katheicuangloih keimai remti danin karak hmangve men asi himaw!

CT:: Kannih santhar mino sanah chin calai ziangtlukin kan tthangso terpei?
KLS :: Kan calai tthansoter ding ahcun zuamnak kanneih a ttulih kan mahle kan umnak hmuncioah kan tlintawktein mahle tithei zawnah zuamtlang a ttulih himi ahcun kan mipi leh tthangtharin Pu RunBik ih nunkhi cawntlak in kahmu.

CT :: CT website na rak leng dah maw? Na ruahnak in seu ve aw, kan lo welcome!
KLS :: CT Website ka rak zoh ringringih ttongkam mensilo ka thinlung taktakin a ttha ka tituk,kan mipi khalin tthanso nakah anhman vivo ka beisei. Keima hin ruahnak lopek hnakin nan Website ihsin theinak leh hmuhnak kaupi ka neihphahih ka lungawizet.

CT:: Kan chin mipawl tanrual kanthiam vivo nati maw?
KLS :: Kan Chin mipawlhi tthangthar mithiam kannei vivoih ttanrualnak kanthiam vivo dingah kabeisei. Politics lamahcun kanmit a de hrihlo, lungrual leh
ttantlang kan thiamnak dingah miphun thinlung kan neih mihi a hrampi ihsi hlawnfai a tulzet.

CT:: Laitlang nan khua na ngaicanah ziangtin khua raruat? khuatehla samin maw? Tingtang na cuh sawn?

KLS ::E, khai Cawngnak puansinih khuatehla sam ngongo pawl kasi!

CT:: Lai pacang dinhmunin kan Lairawl ah ziangmi na ngainabik?
KLS :: Tuihlan khalah suhnak ka tawng zoih Mizoramah kan MP Dr Za Hlei Thang thawn khualtlawngih Khuangleng khaw pawlin vokthau sumruk an rak thahih cunah insutzo. Lai rawlih ka duhbikmi cu Zaapan buh tharte leh Voksa rilte phiar, aril fangtlawr thithun khakuan ih hangbawl!

CT:: A heu ! ka cil ka volh rori.
CT:: Kan mipi hrangah ziangmi thucah naneiduh?

KLS ::             1 .Pathian ttizah ringring,
2. Diknak nun neih,
3. Taimaknak nunneih,
4. Tikcu can hmandik, hipawlhi kan zuamtlang hram peiuh tiah kacah awduh.

CT:: Kan thusuh mi insannak parah kan lungawi, kan miphun hrang thathnennak a um hrimhrim ding khal ah ruahsan nak kannei.
KLS :: Ka lungawi!

Comments

comments

Comments

%d bloggers like this: