Pu Duh Cung Nung Hmaitonnak

Thuhla Tawi

Hmin            : Duh Cung Nung
Suah ni         : May 9, 1948
Suahnak : Lun khua, Falam Peng
Nulepa          : Pa Tial Hnin le Pi Con Kip Thiam
Unau            : Panga
Fatepawl        : Paruk, mipa 3, nunau 3
Umnak           : Letpanchaung Bazaar, Phone: 09-400 307 743

CT      : Laidinthar Group a rung suahkendan in sim thei pei maw?
DCN     :1989 ah U Tha Nei Thuan in Bawi Jesuh suahnak hla le a thihnak hla Bawi Vung le Phai Leng in a tuah. Cuisi thokin U Sa Tin Pum, U Lal Thang le U Sui Ling Thang pawlin anmai nunih Pathian thu hmangin hla an phuah. February 2, 1996 ah hlaphuah thar mipawl cu ziangtin kan hmangin kan sak ding ti’n minung pariat laiin lairelnak kan nei. 28.3.1996 ah khawmpi nei dingin le khawmpi hminah “Laidinthar” siseh ti’n kan rel. Cuisin midang Pathianin an thinlungih a thlenter vekin hla an phuah mipawl lakhawm in hla fing 373 tiang a bu ah kan tuah.

CT: Laidinthar pawlkom le member zat?

DCN: Laitong,  Laihla, Lainunphung le hlawnthil a ngaina ih kilkhawitu hmuah in ‘Laidinthar’ member kan si theh. Tuih a calkham lentu ah cun mi 50 hrawng kan si.

CT: Hi group nan din san le tumtah mi?

DCN: Mirangpawl in ttahtu hman um hlei loih kan nunphung a nungcungih in phumsak ruangah kan dintharsal. Kan aw-an ih Pathian thangthat, zaihla sak hi kan tumtahbik.

CT: Nan cangvaihdan tlangpi in hlawm thei pei maw?

DCN: a) Kumtin March thla ah khawmpi kan nei. Hlabu kan tuah mi sak in le phuahthar mi tla kan lakhawm theu.
b) Mi bulpakin simaw, pawlkom in simaw, in sawm tikah kan Laihla le laam in kan sunloihpi theu.
c) Kan Laimi upa kan hmuah le ton tikah kan Lai-laam le awnmawikhuangdar le khuatehla thawn hlunghlai zetin kan lawm.

CT: Laidinthar nan din thok ihsin hi ni tiangah kiangkap mipi thawn harsatnak ton mi nan nei maw?

DCN: Mipi thawn harsatnak ton kan nei lo. Kan Laitong le hla Pathian in a hnongih mi hnam thuhla le tong Pathianin a ngainasawn titu, mi nunphung le thuamthil le aw-an Pathianih betu, thu linglet zin zawh ih zumtu mitkaipawl cu an lu a zing deuh cu a si hi!

CT: Laidinthar tuah mi Lainunphung VCD kan rak hmu ih khazat Laithum le thlungdar pawl ziangtin nan ngah thei?

DCN: Kan pulei hlawn ropawl kan kilhim mi a tamsawn ih, a kim lo hrekkhat cu  kan hmuhsun kan lei vivo. Thuamthil phei cu mah kim in kan nei ciar.

CT: Hitlukih Lainunphung hlapawl nan khawlkhawm le fingkhawi theinak san hi na member ah zopawl hi na rin kungpi an si?

DCN: Kan Laidaan ih Thangsuah pialrang kai cun nulepa in dampitupawl le, ‘Lamsak kai’ cin pacangtha an nunih hmangtu roripawl hnenin thu le hla ka lakhawm.

Khuangcawi lai

CT: Santhar mino hnenah ziangtin hmalak vivo nan tum?

DCN:  Seemsin hrinthar hin kan Laitong le nunphung, zaihla thiam thluhter kan tum. Mi tong le mi hla men sakih kan fahniang an um ding kan siang lo!

CT: Tutiang nan hmalaknak ahhin nan di a riam ko maw?

DCN: Kanmai lam tanlakdan ah cun kan di a riam ko nan, mino thawn zirnak can kan nei mal tuk lai.

CT: Ni poimawh le puai nikhua ah Laidinthar hi sawm a ngah pei maw?

DCN: Ziangtiklai khalah sawm a ngah ringring.

CT: Kan Lainunphung lakah somsohtlak na ti mipawl in hlawm aw.

DCN: a) Kan pipupawl vekin Pathian kan biaknak ah tihzah le upat zet, felfai zet le thianghlim zetih biak.
b) Mai hmaikhua lawng ruat loih mi hrang ruatsawn in.
c) Farah mangbang khurhawm.
d) Kan pipu thing le lung rialawk lai hmanih anmai sinak parah an din
ngam vekin kan sinak Laimi ih ding ngam dingin.

CT: Kristian kan sinak in kan nunphung hi a ei-ttet in na hmu maw?

DCN: Kristian sakhua le kan nunphung hi a ei-ttetaw lo. Amahlawngte kan ram cu 1886 kum ah British kut sungah a lut. 1899 kum ah Rev. E. Carson cu missionary in Hakha ah a ra thleng. Anih cun Pathian zumtu pohpoh cu kan nunphung le thuamthil hmuahhmuah a hlonsak! An samtom a mehsak ih thuamthil tha dangpawl khal ramhuai ta tin a rak zirh. Anmah miring nunphung le thuamthil cu Pathian ta vekih in zirh ruangah kan thuam thil le hla pawl kan tipathian riangri. Cucun kan nunphung hmuah a ei-ttet thluh a si hi!

CT: Kristian sakhua thawn hmeh-remih somsoh theih the a um pei maw?

DCN: Um thei tuk e. Pathianin Lai miphun in rak sersiam mi hi aw-awn te le zaihla, cun, kan hnipuan thuamthilpawl an hnong lo ti kan theihfel cun ‘si le khuairem’ an tivek a si ko.

CT: Tu cu calai lamah kaat hrih sehla, cabu ziangzat na rak suah zo? Ziangpawl an si?

DCN: Reltlak ka suah sawm ee!
1)      2001 ah Lainunphung cabu, FCCLS in in suahsak.
2)      2004 ah Pipu Anmawi cabu, Dr. No Than Kapin in suahsak.
3)      2012, June 21 ah Chin Nunphung Hla, FBP in in suahsak.

CT: Lainunphung hla hi atlangpithuin phunziat hrawng a um?

DCN: Hla phun thendan tla a bangrep thluh lo ding. Chin Nunphung hlabu ah cun phun 24 ah kan then. Amahlawngte, hla phun khat sung khalah a ci in kan thliar asile Bawi Vung ah ci 19 tvk. Tluangton, zunngaih, ramtuan, sathawl, tiin. A ci in kan siar ahcun 67 hrawngah a cang.

CT: Bawi Vung, Dar Luan, Lian Dang tvp hi ziangha an danglamawknak?

DCN: 1) Bawi Vung hla ci 19 hi cu Conlaam ni, lungawi nikhua poh ah sak a thiang thluh.
2) Dar Luan hla cu thih nikhua le tohpit nikhua ah an sak.

3) Lian Dang hla khal siat ton nikhua lawngih sak mi a si. Lungawi
nikhua ah an sak kel lo. Chin Nunphung hlabu rak lei awla, na siar
tikah an hmannak na thei mai ding.

CT: Hmailamah teh cangan na tum vivo maw?

DCN: Tum vivo ee.

CT: Cabu si lo, article dang teh ziangzat na ngan zo?

DCN: Article cu 30 hrawng ka ngan hnuaihni zo.

CT: Tulai kan calai dinhmun na hmuhdan le calai-mipawl hnenih ruahnak le duhsaknak na hlan duh mi?

DCN: Ni iang thing pok bangin, ‘Cepa thangih ka awh laileng’ tiin biar-am cah le cah tin kan ttang ttengtteng si’n ka hmu. ‘Si le khuairem’ kan ti hlan sung cu nam linglet hum thawn kan bangaw. Sakhi a dangah, conkiang a dangah ti kan hluan ding.

CT: Chinland Today hrangah hla fing khat ten in phuahsak thei awla kan lungawi zet ding.

DCN: Khuatehla ka lo phuahsak ding aw: Lungthin fim tla’n lam tha kau len rak sial au, Laiphun kengtu ah nonawn ni bang tlang thlang au.

CT: Thu tampi in ruah, in hlawmnak parah CT a lungawi tuk.

DCN: Kei tla tampi ka lungawive.

Comments

comments

Comments

%d bloggers like this: