PSYCHOLOGIAL EFFECT

Psychologial Effect

Hniangsinpa

Kanmah vek khuahlan phunthum ong lo hrangih ‘mirang ca vun hman cu’ tiah sim duhtu cu an umko ding nan, ka theihmi cafang hi cu ka fiangin ka theiaw nan, cathiam le phunsang kai pawlin ka hnakin ngan dan ding le theih ol sawn cu an thei theh tuk ko ding. Khimi thupi ih ka vun hmannak khal, ‘Minung kan nauhak lai simaw, ruahnak kau sawn nei dingih kan kum a hung cut hlan ih kan ruahnak hmangih lamzin kan rak zawh dah theu mi kha, tui kan upat hnu khal ahhin, ka cing keng lai maw’ ti ka sim duhnak san a si.

Kan nauhak lai ahcun, thim khi kan rak tih, a san cu kan nu le pa lole kanmah in kilkhawitu deuh khin, thim ih kan um ahcun, muthla vek hmu dingih in rak hrin theu ruangah a siih, cuisin… kan ihtthah duhlo a sile, ‘Mumang in a lo keu ding tvp’. Pawl hmangin in rak hringih, cucu kan hrangah tihnung za vek ah a rung cangih, hrekkhat cun an tlangval hnu khalah, zanih mitthi an um len, khualkhua lam ih zualko tu si tiang in an rak phan phah theu.

Cuvek thotho in, ka hnatuannak lam a si khalah, ka nauhak deuh laiah, “Na lamzin zawhte in a lo kan len, na cil vei thum tal na phui ta lo ahcun na tluang lo ding”, tiih ka rualpi pawl in ruahmi cu, tuini tiangin ka hmang lan ta lai (Atthlak zet a si ko). Cun, mi hrekkhat cun, “Na kut vorhlam a thak ahcun, tangka na ngah ding” ti vek khal a um ih, “Na mangin Ek simaw na hmuh ahcun tangka na ngah ding” ti vek pawl tampi a um. Hi mi pawl hi minung ih zeldin cawp mi (Psychological effect ka vun ti men ding), ihsin ra suak mi an si. Mifim hmaisa pawl cun, hiti khalin an rak sim, “Minung hin a duh ngaingai ahcun, a hmailam ih ra thleng ding mi cu, a taksa ah theihtheinak a nei a si” an rak ti theu. Cumi khal cun, minung zeldin cawp mi thotho a si.

Lotterry hluarnak hmun ih um pawl cun, mang hi an thupit zet nan, Africa ram khawteberek ih um pawl cun, cucu ziangah an siar fawn lo.  Minung hin kan umnak ih zir in ruahnak simaw, zeldinnak si maw kan neiih, a hmangthiam hrang ahcun zapi thatnak a si rualrualin, a hmangthiam lo hrang ahcun siatnak lamzin nai bik a si thei. Kan ruahnak kan kawm ih, kan nauhak lai ihsin kan rak theihmi thu in in thunun sung ahcun, thansohnak lamzin zawh a har zet ding.

Nu pakhat cun, “Kei cu mizan ka mang a tha lo, cun zing ihsin ka thawh khal a nuam lo” tiah a rak sim tikah, a hrang ahcun cui a ruahnak cun a sunvu um a ti nuam lo ih, a hnatuan khal nuam a ti thei lo ding. Cumi cu a hrangih pawi zet mi a si. Hi ruahnak sia/tha lo hin, minung taksa par tiangah harsatnak mi a pe thei ih, cui mi cun, mi banglonak tiang in mi a suah thei ti kan theih a tha.

Hmansehla, a nuam lam zawng ih kan thlir ahcun a rem cang thotho. Ka nu hnisiamsi ih zing ka thawh ih, I biak ahcun, ka sunvu um a nuam ihm, ka hnatuan khal tluang dingah ka neihaw thei. Hmansehla, zing ka thawh tikih I biak lo tikah, ka hnatuan tluang lo dign ah ka neihaw ih, cumi cun tuan huamlonak ah I thlen tahrat in, ka hlawh ding zat hlawh lo ih ka um can khal a tam.

Curuangah, ziang kan tuah khalah, kan nitin nun hrangih thupi tuan tu kan si theiaw ih, kan ruahnak menmen hmangih um lo in, kan ruahnak cu ruahnak ah, kan tuahtuannak cu tuahtuannak ah si hram she tiih ka duh ruangih, hi thu hi ngan ka si. Kan nitin nunah, Psychological Effect ruangih kan zumnak, kan tuannak, kan nundan tiang parih thu kan neih ter lo hi kan thansohnak ding hram a si ti thei ih kan um hi ka duh mi a si.

Comments

comments

One Comment

  1. Na canganmi cu, a va sunglawi thei ve aw..

    Tu hnak ih tam snsin siartu kan bet vivo thei nak dingin, Laimi in kan tul tuk..

    Kan sambau nak tla a fiang lawlaw si ko!
    Hivek ca tha tha na rawn ngan theu ih keimah bulpak khal in ka lungawi zet!

Comments

%d bloggers like this: