Porn Lakah Na Him Maw?

-Uk Lian

Porn timi tongfang hi 1857 ihsin Oxford English Dictionary ah arak lang thok. (Prostitute) hlawhlang cangvaihnak, a tawinak le theih olsam daan ding cun, nulepa sinak zahmawh diklo zawngih langternak ti’n tuitum hrangah kan hmang asile a that ka zum.

Porn zoh le hmuh kan duh lo hman ah cam khat te cu, online ah porn kan hmuh caan a um hrimhrim ko ding. Online thei cin, porn zoh sual pang lo kan um ding ka zum lemlo. Tumhrinnak ruangah siloin virus hmang le kuat-awk sual pang nak ihsin kan hmuh caan tla a um ding.

Cun, kan mino lakah porn zoh nak ih caan hmang tam zet an um zo ruang khalah himi ka ngannak san a si. Porn timi tongfang khal ngai nuam lo zet nan, hiti lo cun a simfiang daan a sau ruangah a tongfang a sinak vekih ka hmannak a si.

Porn zohnak ruangah pawlsual khal a tam ih nungcang thatlonak khal a karh. Khawruahnak a siatsuah ih nun riahsiatnak a thlen.

Ziangtluk in Porn Kan Zoh

Online leitlun ah minung hin ziangtlukin porn kan rak zoh timi tarlang duak sehla. Nitin porn zohtu catbangloin, million 68 lenglo an um ringring. Himi lakah Laimi kan tel ringring ve a si.

Nunau, zateek 33 tlukin porn an zoh. Mipa cu an hnatuannak hmun tiangah zateek 29 tlukin an zoh. Nauhak khalin porn hi an rak zoh ngah ve theu. Ahleice in, nauhak kum 11 ihsin porn thungai thlak in an zoh thei. US ihsin porn (lawngfangkheh zuknung) hi minit 39 dan ah a thar an tuah suak ringring.

Porn zoh theinak site hi million 26 lenglo a um ih, Porn lam ih hnatuantupawl cun mikip zoh thei dingin bulpak email khalah an kuat theu. US ihsin an tah daan ahcun Sunday ni ah porn zohtu an tam thei bik ti a si. Cubetah nitin, leitlun hmun kiilkip ihsin zatek 35 lenglo in porn zuknung an download ringring.

Porn ah Zianvek Pawl Kan Zoh Duh Cuang

Leitlun minung pawlin Porn kan zoh duhdaan a khirhkhan zia cu, nunaupawl rori in anmah nunau le nunau an nuamawk lai an zoh duhbik. Cuihlei ah leitlun ih porn zohnak site thabik khalin nunau le nunau nuam-awk lai an zoh tambik tiah an phuang. Culawng siloin, nauhak suakthuan (kum kimlo) ih nupasinak hmang lai hi mikip ih hawl le zoh duhbik mi a si ti khalin an sim.

Zo Vek Ram In Porn An Zoh Bik

Leitlun ih porn site zoh tambiktu ram pawl kan thlir asile zumlotu, ahleice in Muslim le milembia ram pawl an si. Thimnakah, Pakistan hi porn zoh nasabik ram a si. A dung thluntu ram pawl cu Iran, Turkey le Saudi Arabia tivek pawl hi an si. Ziangruangah Islam, Muslim le pathian nung be lotupawl in porn an zoh duh hleice timi hi ruah tlak a si.

Porn Zoh Hmangtupawl Ih Nun Daan

America ram ah minung 1,300 lenglo hnenah porn an zoh ruang ih an buai le buai lo thuhla pawl hmaiton thusuhnak an nei. Ahleice in, Christian pawl in porn an zohnak ruangah an thlacam a mal thu le biakinn lam ih an pekawknak a tlak niam zet thuhla pawl an hmu fiang a si. Milembiapawl hrang khalah porn an zoh ruangah an sakhua-biaknak lam a tlakniam theh tiah an hmufiang thotho.

Kum 2006 ihsin 2012 tiang minung tampi thusuhnak an tuah tikah porn zoh mal le zoh dah lemlo pawl cu porn zoh theu pawl hnak in a let rori in Pathian an thangthat daan ah nuamnak an co hleice tiah an hmu fiang. Zumtu porn zoh dahlo pawl cu an Pathian biaknak nun ah hlimnak an nei, Pathian hnen ah rinsannak an nei ih an ruahsannak a tam tiah an hmu fiang.

Porn Cangtupawl ih Nun Zalam

Jenna Jameson

Porn cangtu nunau le mipa pawl thusuhnak ah har an ti zia le, lemcang mi a si ruangah a harsa luar an ti zia pawl tla an sim. Asinan, sumpai lak luhnak a si ruangah nasa zetih an zuam a tul thotho thu tla an sim. Porn cangtupawl hin porn zuknung can hi ro sunglawi tiah an pom lemlo. Hlawhhlang nun a si timi anmah a cangtupawl khalin an fiang zet. Porn lemcannak ihsin piangthar le baansantu tampi an um.

Porn zuknung cang ih hminthang le lianbik ti’h theihlar cu Jenna Jameson a si. 1993 ihsin nasaten porn zuknung cangin a caan a hmang. Fanau rilrah 2 a nei ih a tu ah kum 42 a kim zo. Jenna Jameson in sumpai tam zet lalut khal sehla a nun hi a hlim emem lo in a lang. Pathian nung ka zum tiah a phuang aw theu ih pasal a neih zik tiang khalah Pathian hmin cu a phaw ah a hmang ve.

Jenna Presley khal porn zuknung hmang ih milian le laar zet a si. Asinan, porn zuknung ruangah a nun hi a hlim ve cuang lo ih ruahlopin Pathian duhdawtnak a theifiang ih Rev. Miles Mcpherson ih thusimnak hmangin Bawipa Jesuh cu a rundamtu ah a pom. A hmin ngai hi Brittni Ruiz a si. Tu ah kum 29 a si ih tu ahcun khawm mi sawmtu le biakinn lam ah tangkai zetin caan a hmang zo.

Jenna Presley

Laimi le Porn

Kan suahnak khua le ram kan rak um lai ihsin nupa nun nuamnak zuknung hi a zohtu tla kan tampi ding. Zu in le zuri hi kan ngaisang lo nasa ih porn zoh hmang tuk khal kan miphun cun a ngaisang ciamco lo ding ti hi cu a fiang nasa. Porn zuknung hrimhrim hi nupa nun hlimnak ding ih tuahmi hnakin minung caaknak le hiar-haalnak diriamnak um thei ding zawngih can cop mi zuknung a si timi kan theih a tul.

Caan cop mi, a ngaingai asilo mi, zohtupawl hrangih caaknak le hiarhaalnak suak dingih tuah cop mi a si timi kan theih ringring a tul. Laimi hin thil kan uar le kan duhmi hi tongpa duh le uar kan hmang theu ruangah kan thansoh lohli lonak khal a si theu. Kanmah le nupa karlak ih a suakmi duhdawtnak le caak-hiarnak hi duhnungza le a tawk zetmi hiarnak a si.

Zumtu Nun, Porn le Masturbation

Zumtu hrangah sual asi le silo thu cu kumkhua elawknak a um ding. Cuhnak ih thupi sawn cu, porn zoh ruang ahhin kan hrangah ziangvek hlawknak le thathnemnak in pe timi sawn a thupi. Ziangkim ah luarkaai tuk a tha lo. Zingawitupawl khalin porn zoh hi a tha tiah an tarlang dah ciamco lo. Thimnak ah, mipa khal nunau khal mahte diriam tuahnak (masturbation) tuah hi thilsual a si lo tiin blog le magazine ah tampi kan siar ding.

Asinan, zumtu pawl in cucu an tuah thotho tikah thin nuamnak hnakin thinharnak le Pathian lam ah cak lo nak a thlen sawn theu a si. Curuangah, porn zoh le mahte taksa diriam tuahnak pawl hi ziangtlukin tha ti rero khal sehla kan thlarau nun cawmtu an si lo. Cu hnakin kan caan tha le kan khawruahnak in tisiattu an si sawn theu a si. Minung kan hring nun a cawm lo tu kan hmuhmi le kan tuahmi thil pawl cu uar tlak an silo ih kan lamzin fehnak ah a um pang asi hman ah kan hrial vivo ding mi a si.

REFERENCES

 Kylstra, Carolyn. “7 Things You Didn’t Know about Porn.” Cosmopolitan. 2014. Accessed: April 16, 2014.

 “L.A. Pushes for Condoms in Porn Legislations, but State Lawmakers Balk.” Capitol Weekly. June 24, 2009. Accessed: April 16, 2014.

Miles, Kathleen. “Ten Facts about Porn Industry ‘All Time 10s’ Video Shows How Big the Adult Industry Is.” Huffington Post. Updated October 31, 2012. Accessed: April 16, 2014.

Morris, Chris. “After Rough 2013, Porn Studios Look for a Better Year.” CNBC. January 14, 2014. Accessed: April 16, 2014.

Morris, Chris. “Video Game Gals Take It Off for Playboy.” CNN Money. August 25, 2004. Accessed: April 16, 2014.

 “One Stat That Proves America Really Likes Its Porn.” Huffington Post. Updated January 23, 2014. Accessed: April 13, 2014.

 “Porn Is Vital to Freedom: Rushdie.” The Times of India. August 8, 2004. Accessed: April 16, 2014.

(Visited 925 times, 1 visits today)

Comments

comments

Comments

%d bloggers like this: