Poland Ram President, Hril Nak

Poland Ram President, Hril Nak

Relzo vekin tuikum April thla ih Poland ram Presient, Lec Kaczyski leh Cozah mi pawimawh dang ziangmaw zatcu Russia ramih Vanzam ih an tlakthat ruangah Poland ramcun  caan ziangmawsung President, neilo in an umih, Tu ih President, thar hrilnak an tuah miah Cozah nak kailaitu Civic Platform Party Candidate, Bronislow  Komorowski cun  Vote tla siar rero laimi ah  Vote 52.6% hmuin hmai a hruailai.
A mah cuhtu Law and Justice Party, Candidate, Jaroslow Kaczynski cun  Vote tla siar zimi ah 47.4% a hmubanve ih, Kaczynski hin a tlinlo thu a paungzo ih, Curuangah Komorowski hi tlingdingah ruah a si. Asinan  Vote tla siar hrihlo nak an khawpi pahnih Warsaw leh Gdanski ih Vote tlakdanah Komorowski ih dinhmun a tha tuklo ih, Curuangah Vote siar thluhhlan ah cun President, ih  tlingding hi fiangtei puan ngam a si hrihlo.

Isreal in Turkey Hnen Ih Ngai Dam Dil A Duh LO

Mizan sunah Turkey Foreign Minister, Ahmet Davutoglu cun  Kandung May tla ih, Palestinian pawl bawmnak ding thilri phurtu Flotilla lawng Isreal ralkap Commando pawlih an kah nak thuhla ah Isreal in Turkey hnenih ngaidam a dil lo a si ah cun  Turkey Cozah cun Isreal thawi an peh zawmmawk nak pawlcu a sakcat thluhding tiah a sim.
Turkey Foreign Minister, Ahmet Davutoglu cun khami thuhla ih Isreal in ngaidam a dil duhlo leh thufiang zingzoitu  ramdang Report a pawmlo a si ah cun  Turkey Cozah cun an ram tlunih Isreal ralkap Vanzam pawl a zuanter ttheumi khal a zuangter nawnlo ding tiah a sibet.
Kandung naite ah Turkey Foreign Minister, Ahmet Davutoglu leh Isreal Trade Minister, Benjamin Ben Eliezar cu Switzerland ah an be aw ih, hi an biakawk nakah ram pahnih karlak boruak tha deih dingih ruah a sinan, Mizan sunih  Turkey Foreign Minister, Ahmet Davutoglu ih thusim  mi ihsin  rualrem awknak thu zianghman an relsuak lo ti a fiang tiah BBC cun a sim.
Turkey cun ngaidam dildingin  Isreal hi a nawrnan Isreal cun ngaidam a dilnak dingsan a theihlo thu leh  khami buainak ih an ralkap pawlih thilti dancu  an mai taksa kilhim awknak ih an thil timi a si tiah Isreal khal a ttangve ih, Curuangah Isreal leh Turkey karlak boruak hi a se sinsin dingah ruah a si.
Turkey ramhi Muslim ram pawl lakih Isreal thawi rualpi tha aw bikram an siih, Asinan khami buainak ruangah Turkey cun Isreal ramih an ram pailai an ret mikhal a kotlung salzo ih,  Isreal Commando pawlin an kahthat mi Turkey ram minung pawlih sungte hnenah Isreal hin zaangna dawmnak khal pe dingin Turkey cun Isreal a ngen.
(Visited 22 times, 1 visits today)

Comments

comments

Comments

%d bloggers like this: