Pi Suu Kyi In Chinmi Pawl Tông

Salai Snow
Chinland Today
16 November 2012

New Delhi : Tuni Tlawngkai Ningani, 16.11.12, ah Daw Aung San Suu Kyi cu Chin mi pawl umnak Janak Puri District ih Prospect Burma School(PBS)le Vikas Puri District ih Oxford Senior Secondary School ah a feh ih Chin mi pawl hnenah thusimnak a nei. Chin mi le kan ram sungih miphun dangdang pawl tla Suu Kyi ih thusim ngai dingah New Delhi, ah an pungkhawm aw. (Pic © Chinland Today, Aung San Suu Kyi Delhi ih an hmuah lai le thusim lai)

Suu Kyi cu Prospect Burma School ah tuzing nazi 11:48 ah a thleng ih, Prospect Burma School ih Co-ordinator Dr. Run Bik le Dr. Thint Swe, cun PBS sayama Nee Ra le upa dang pawlin an rak hmuak. Cun, tlawngta fala pahnih in pangpar fun a pek. Cule, Suu Kyi cu PBS sunglam ah lutin tlawngta pawl hnenah thusimnak a nei. Suu Kyi a rat laifang ah tlawngta pawl cun “Daw Aung San Suu Kyi, Damcak hram seh”, “Daw Aung San Suu Kyi, Prospect Burma School ihsin kan lo hmuak” ti’n an hmuak an au. Cun “Daw Aung San Suu Kyi, Prospect Burma School ihsin kan lo hmuak” timi banner pi khal tar a si.

Tlawngta pawl hmai ih a ding ngah ve ten, PBS ih Co-ordinator Dr. Run Bik cun tlawngta pawl hnenah kan ram ih hruaitu Daw Suu hi tawk tiangih a rat hi lungawi a um thu a sim ih, Daw Suu khal thucah sim dingin zangfah a dil. Cumi ah Suu Kyi ih thusimmi cu, “Fimzirnak hi dawi in ca zuam uh, fimnak kan ti tikah tlawngin ih zirmi lawng siloin nitin kan nunnak ih harsatnak kan tonmi pahtlang theinak dingih theihnak khal a si. Kan ram dinhmun hi zoh sehla harsatnak kan tonmi pahtlang kan thiam lo. A ngaingai in sim sehla, harsatnak hi simsawn totlang ih ruatkhawm tlangnak in kan ti ṭha thei lo. Cumi ah kan sambau zet hrih. Kan karlak thubuai a um thawn pehpar in sim le rel cu kan duhzet ko nan kan ngaisak awk lo. Kan duhmi lawng kan sim ih, kan tonmi kan ngaisak awk lo. Cuvek thilcang cu radio le tokhawmnak khalah ṭhaten kan ngai ahcun kan thei ṭheu ko ding. Hrekkhat cun kan ṭongmi a sualmi rori kha ka sual an ti paih lo. Kan tongsualmi khal cu ka sual tiin ti aw ngam a tul. Curuangah hi tawkih tlawngta pawl khalin tlawnginn ih nan zirmi nan thiam lawng hi fimnak nan ngah a si hrih lo. Ti duhmi cu harsatnak, buainak le tuah ṭhat tulmi a um caan ah a fimrhing zetin nan tuahsuak thei lawngah fimnak nan ngah a si ding. Cucu atufang ih kan ram ih kan tulzetmi a si,” ti’n a sim.

Cule Suu Kyi in, “Kan ram hi kan zoh tikah a special zetmi kom-awknak thawn ram kan ding ti cu a fiang. Phunhnam pitling tampi komkhawmmi a si. Curuangah hnamkhat le khat zohton-aw le zirton-aw in umtlang ding kan si. Hrekkhat cun Kawl ṭong nan thiam lo ti ka thei. Asinan Kawl tong zir uhla, nan tappi tong khal hngilh hlah uh. Nan tappi ṭong cu thangso sinsin dingin zuam thotho uh. Cutin hnam dangdang kan si cingin kan biak-aw thei ding. Curuangah common language cu kan tul rori a si. Cumi pawl cun kan ram hrangah thathnemnak a pe ding,” ti’n a sim ih a thumsim a netter. Cutheh ah Dr. Run Bik ih homi PBS ih saya/ma pawl le, Dr. Thint Swe le upa hrekkhat pawl thawn, PBS zungkhan sungah minute malte sung tonawknak an nei. Cutawk ahcun media pawl cu lutsian a si lo. Cule nazi 12:7 ah PBS ihsin a tlungih Oxford Sr Secondary School ah a pok cih.

Oxford Sr Sec School ahcun zoi media hman lutsian a si lo. Tlawnginn kulhnak phar Daw Aung San Suu Kyi, kan lo hmuak timi poster pipi pawl cu tar a si. Acozah media ih zum le rinsan mi media pahnih lawng lutsian a si. Mipi 1000 in Suu Kyi cu reizet an hngakih, a thusimmi cu an ngai. Cutawk ih a ngaivetu hmin tarlangduh lomi cun, “Remawk ten um tlang theinak ding. Cun 2015 hrilawknak hrangah daan hrampi cu rem a ṭul thu, Cun ramsung ramleng mipi zate thinlung hmunkhat ding. Cumi pawl a tlangpi in a sim,” ti’n Suu Kyi ih ṭong cu a tawizawngin CT palai hnenah a sim. Media pawl cun tlawnginn sangka pi leng ihsin an hngak ih, a tlungsal te lawng an zuk thei. Suu Kyi cu 12:45 ah Oxford ihsin a tlung. Daw Suu a tlung tik zawngah a mawtaw sangka te ong in mipi pawl a kut zap phah in a feh.

Tuni Daw Aung San Suu Kyi thuthang a latu CT palai Salai Snow hi CT hmin in PBS ah thuthang lak dingin Dr. Run Bik le tlawng ih tuanvo neitu pawlih media pathum lawng, culo pawl lutsian a si ve lomi ah, lakah a tel ve. Suu Kyi cun PBS ah mi 100 le Oxford Sr. Sacd. Sch. ah mi 1000 pawl hmaiah thusimnak a nei.

Comments

comments

Comments

%d bloggers like this: