Pi Suu Kyi Europe Khawmual Tlawn Kan Thlun Pei

Thuthang | Magazine Lawrkhawm:

Pi Aung San Suu Kyi cu tui Wednesday ah Europe khawmual pawl tlawng dingah Yangon International Airport ihsin a zam suak. A zam suak hlan ah ramsung thuthanglatupawl cun “Thu malten in sim ta aw” tiah an buuk vialvial. Munich (Germany) ram ihsin Geneva Airport ah a thleng zo. Switzerland ah ni rei deuh sung a cam baang ding. Cuihnu ah Norway, Britain, France le Ireland pawl ah a feh vivo lai ding.

Tuini Thursday ah International Labour Organization conference pawl hnenah thusimnak a nei ding. Oslo ih Nobel Peace Prize dawn mi cohlang thar sal dingih a fehsuak hlanah Swiss rorelnak a zoh ta ding. Cutin, Britain rorelnak innpi ah thusimnak khal a nei peh vivo ding.

Leitlun hlasakthiam hminthang Bono hin Suu Kyi hrang laksawng a tuah mi dawng ding ah Ireland ah ni reilote sung a cambaang ding. Pi Suu Kyi ih thlen ding rak hmuahnak ah concert nasazet thawn kan dung Monday zan ihsin Dublin, Ireland ah an rak thok zo. A thlen hnu ah U2 frontman Bono pawlin a tiamcia mi laksawng ropizet hlannak an nei ding.

Tuesday ah Britain a thleng ih a sungkhat unau pawl thawn a kum 67 kim nak suahcam hlunghlaizetin an rak lawm sak. Cun, a tlawngkainak Oxford khalah “Bual Khaw tlawn le far lak cem in” honorary doctorate a la ding. Cutin, London ih rorelnak innpi pahnih pawl ah thusimnak a nei ding. A thawngtlak laiih Kawlram rakbawmtu rampi le pawlkom tamzet pawl hnenah lungawi thusimnak a nei vivo ding.

Europe khawmual pawl feh ih mi thupi ziangmawzat a tawn hnu ah a khualtlawnnak cu France ram ah a cawl hiahhiah tum.

France ram hruaitu thar President François Hollande in Pi Suu Kyi bulpak ih tawng dingah an sim thei awk zo vekin France ram a cam sungah faal zetin thu rel tlangnak an nei ding. Tuitum ih a khual tlawnnak ah UK ram thawn ram 5 lenglo a tlawng ding ih a zaten ni 17 sung hrawng a rei ding ih zum a si.

Pi Suu Kyi hi kan dung baihte ahkhan Thailand ah feh in World Economic Forum (Bangkok) meeting a va kai. Thailand ih beunak hawlpawl hrangah a theitawk suah in pumpe aw dingah a tiamkam thu a phuang ih hleiah mino pawl zirnak neiloin an um thu nasa hleice cuang in phuansuahnak a nei.

(Visited 46 times, 1 visits today)

Comments

comments

One Comment

  1. Ruth zingte says:

    Tha ngaingai. a lam tluang hram seh……….mipi le ram hrang nun liam ngam tu nu sunlawi nak pektlak ngai si maw.

Comments

%d bloggers like this: