Pi Aung San Suu Kyi Ni 17 Sung Europe Khawmual Tlawnnak Report

Pi Suu Kyi Europe khawmual pawl a tlawnnak a tawizawng ih lawrkhawm a si. Thaisun ah Kawlram a tlung kirsal ding thu a sim. A hnuai ah a sangsangten a khualtlawnnak ih a hmuhtonmi pawl ngan a si.

Pi Aung San Suu Kyi Tlawn Hmaisabiknak Thailand Ram

Thailand Ram Tlawnnak Thu- 29 May 2012,

Kum 15 lenglo khuahkhirhnak phun dangdang hnuai ih ka um hnu ah 2010 ahkhan thlah zalen ka si. Hrantaang ih ka um sung ah kan leitlun ram tampi a rak thangso ih kan ram mipi khal an rak thangso zet. Cutin, kan National League For Democracy (NLD) party le unau dang pawl thawn hmaiton ih kan tawngaw sal thei tikah ka aipuang sinsin. Tui kum May 8, 2012 ah ramdang tlawn theinak passport ka dil mi siannak ka ngah thu kan thei. Ka lungawi ngaingai. Cuirual ah  ram dangdang hruaitupawl hnen ihsin an khua le ram ah tlawng dingah sawmnak  tamzet ka dawng bet.

Kum 24 hnu ih ram leng suakih ka khualtlawnnak hmaisabik cu Thailand ram ihsin ka thok. San thuanthu ngan dingih ka khualtlawnnak hmaisabik Thailand khawpi ahcun i thluntu ziangmawzat pawl thawn kan lut. Vanzam hmunpi ah Thailand ram hruaitu upapawl cun in ra hmuak. Cutin, khawsung lam pan in motaw thawn kan feh. Kawtthleer ah kan ram mipi vakvai a thawng a thawng ih au thawm hlavang in ka thei. Khat lei zawng ih ka ruah ah lung a zuur duh zet fawn. Ka motaw tomi sangkate kehlam le vorhlam kau ihsin lamzin kap ih mipi kut in zap celceltupawl mithmaitha pe ding ah ka mit sukso ka leen.

Mithen cun kan ram thantar an hawi, mithen lehcun an kut an zaap. Thantar thenkhat parah “Kan inn ah kan tlung duh” tin an tar. Kan hminpum ih in auhtu le Daw Suu tiih in autu an tam. Mithenkhat cu in hmu ngah diriam ah an mithli luang tla ka hmu hai.

Cutin, thuthangca ngantupawl ih ngan bangin Thailand khawpi sung ka lut cu hlasakthiam hminthang bangin keimah hmu duh hrimhrim ah mipi a thawngtel an pungkhawm. U Thei Sein cun hivekih ka sunlawi dingmi a theihcia ruangah Thailand ih a khualtlawn tumnak a thulh phah.

Thailand ih ka fehnak san sawn cu “World Economic Forum” kai ding ka si.  WCF meeting khal tluangte’n ka kai suak thei. Thailand ih um kan mipipawl hnenah ka theitawk suah ih taan ka lak tum thupawl khal ka sim thei. Cun, Thailand ram hruaitu Thai Prime Minister  Vingluk Shinawatra thawn khal tawngaw in komawknak kan nei ngah. Thailand ah Kawlrammi 2.5 million lenglo um dingih zum a si. Cuilakah refugee le hnatuan dingih vakvai 50,000 lenglo an um.

Mae Sot refugee camp 9 ahkhin Karen refugee an tambik. Kan dung baihte ahkhan International Organization le UNHCR lam ihsin in-ei hrang bawmnak an timal ruangah Thai ih refugee pawl in-ei-lam ah an rak harsa zet. Curuangah hivek harsatnakpawl khal hotupawl hnenah zangfahnak nei ding ah ka sim. Culawng siloin, hnatuan ih khawsapawl hrang khalah khawsa thei ding le zalen deuh ih um thei dingah hotupawl hnen thotho ah ka sim. Asinan, Thai ih kan mipipawl thawn a faalin thurel tlang theinak pek ka si lo ruangah hmaiton in mipipawl thawn komawknak kan nei theilo ih pawi ka ti zet a si.

Mipi hmai thusim caan le conference pawl ahcun hi kan mipi vakvai  pawl hrang zangfahnak le theithiamnak nei dingah ka theitawkin dilnak ka nei vivo. Cuihlei ah kan mino le tlangval tha zetzetpawl fimthiamnak zir ngahlo ih an caan tha liam ding ka hraphriatnak pawl tla ka tarlang bet. Ni 5 sung Thailand ka caam nak ah India Prime Minister Dr. Manmohan Singh thawn khal thureltlangnak kan nei ngah ih India le kan ram hmalak tlang ding thu khal kan rel tlang thei.

Switzerland Ram Tlawnnak

Geneva, Switzerland – June 14, 2012

Kan tum hnakin minit 30 hrawng in Switzerland khawpi kan thleng tlai. Ram hruaitu upapawl le hlasakthiampawl tla in, in rak hmuak. Ka cawlhbangreh hnu ah International Labour Conference avei 101st nak ah thusimnak ka nei cih. A hleice in, kan ram in hngilhlo ih bawmnak in peknak pawl parah lungawithusimnak ka nei ih sungkua pakhat bangih kan tuan khawm ding ka duhthu khal ka sim.

Thuthang latupawl thawn komawknak kan nei salih ruahlopin mizan lam ih ka damlonak/nuamlonak a luar. Thu ka sim rero lai mi ka cawlhsan. Ramleng boruak ka neh lo ih ka luzing, ka luak, ka lu khal a naa seksek hluh lawk. Sivai thawn in tuamhlawm ciamco ih ka keel ka awh thei sal. Ka damlonak luar vivo ding ka phan ruangah ni reilote sung cawlhhahdamnak caan ka nei. Ka sibawipa khalin ka damlonak zual sinsin thei a si ruangah ka hrang a theitawk a suah ve.

Thuthanglatupawl thawn thusuhnak le sannak ka tuah theitawk in ka nei sal. Cui hnu ah Geneva kawthler hruut in kan feh ih Bern ih Swiss parliament rorelnak innpi pawl in zoh pi. Mipi cu keimah hmu duh ah in rak hmuak ih an au celcel.  Bergen thotho ah 1990 ih in rak pek zomi Rafto Prize for Human rights tla cohlang tharsal nak ka nei. Switzerland ih thuthanglatupawl thawnkomawknak a phunphun le ILO conferee hmang ih ramdang hotu upapawl thawn kan tonawk hnu ah Oslo, Norway khawpilam pan ding ah ka tim ka tuah.

Norway Ram Tlawnnak

Oslo, Norway June 15, 2012

Oslo khawpi pan in kan feh ih June 15 ahkhan Nobel khawpi Oslo, Norway tluangte’n kan thleng thei. Vanzamleng tumnak hmunpi ihsin ram hruaitu le Nobel tawlreltu upa pawlin in rak hmuak. Mipi 12,000 lenglo keimah rak hmuak ih an au celcel ka hmuh tikah ka thin a nuam zet. Norway ram hruaitu Jens Stoltenberg le a innsangnu thawn khal thunuam reltlang in zanriah kiltlangnak khal kan nei.

Ni 16 June: Liam cia thu ko kir sal in 1991 ih Nobel Peace Prize, Norway ih in rak pek lai ah kei cu innpi sungah suak theilo ih khum ka siih ka innsangpa Michael Aris le ka fapa pahnih Kim le Alexander tei pafaza in ka laksawng dawn mi an rak la. Kum 20 lenglo hnu ah 1991 ih ka laksawng don mi la sal dingah Oslo City Hall ka thleng nguarngo sal.

Tuitum ka thlennak kip ah kan ram hin zalennak lamzin feh dingah a thok fang a si tiah ka sim vivo. Ka laksawng dawn mi $1.3 million pawl khal cu harhdamnak sizungpi hrang le zirnaklam hrangah ka hlu thluh.  TV le thuthangca ih nan hmuh bangin Oslo ih Noble lecture ka peknak ah Norway ram hruaitu upapawl, lalnu, hlasakthiam ziangmaw zat le Bono pawl khalin in telpi ih a diriam thlak um zet a si.

Nobel Peace Prize cohlannak thu ka sim thluh ah a ngaitu mipi zaten lungawi in minit 2 hnakih mallo an kut an beng. Awnmawi a phunphun thawn in awih. Nobel Peace Prize tawlreltupawl hnen ihsin lawmnak awkam a phunphun ka theih tikah ka lungawi sinsin. Mithen cun mipi hmai ih ka thusim lai caan kha Mandela moment tiah an sim hngehnge.  Nobel Peace Prize ka cohlan lai cu ram tampi ah TV live ih pek a si.

Ireland Ram

Ireland Ram Tlawnnak – 18 June, 2012

Leitlun ramhla sak theutupawl U2 band lakih mi langsar Bono 52 ih Jet thawn Norway khawpi kan suah san. Bono hin Noble Peace Prize ka cohlan ih ka caan hman pawl khal i tel pi ih Ireland ihsin i ra hmuak.

Tui kan hmuhawknak hi a veikhatnak khal a si. Ireland kan thlen ah jet ka rizet lawk. Jet tumnak hmun ah Kawlrammi pawl le Irish Foreign Minister Eamon Gilmore pawl cun aipuang mithmai thawn in rak hmuak.

Cusin, ‘Electric Burma’ concert nazi 3 sung tuahnak ding hmun lam kan pan khawm.  Concert hrang ticket an rak zuar cem nak a rei zo thu khal in sim thei. Kan va thleng cu, mipi 5000 lenglo an rak um zo.

Mipi pawlin keimah in hmuh veten an au thawm cun innpi sung a khat. Cutin, concertnak caan an thok. Irish mimawi hrilmi Saoire Ronan in biazai mawizet in siar sak ih dai khepkhep in kan ngai lawk. Cuihnu ah, English actress (vancung fala) Vansessa Redgrave in biazai dang pakhat mawizet in siar sak sal bet.

Cuihnu ah hlasak thiam pawlin veilekhat ah anmawi phunkim thawn congawihnak an thok. Irish folk guitarist Donal Lunny, Dublin folk rocker Damien Rice, US rapper Lupe Fiasco pawl cu stag parah uar um zet in cangvaihnak an nei thok ih “Can’t take my eyes off of you” timi an sakih awn mawi le hla mawi phunkim thawn kan leitlun a khat a si bik mai.  Cuihnu ah ka hrang ih pawl sawm le ka thuhla thehdarh ih rak vak rerotu Bono le rualpipawl in keimah hrang rori an hla phuah mi “Walk On” timi a sakih zokhal ding men thei an um hrimhrim lo. Anmah le umnak cio ah an khir dupdo.

“Walk On” timi hi ka innsangpa thawn hmun khat ah um tlang theilo in kan thenawknak, fanau taan tahrat in ram hrang ka pekawknak hla a siih  2000 ahkhan Bono in i rak ngan sak mi a si. A parah ka lungawi. Hi, hla ka hmuh daan in suh khalah “Hi hla hi, ka dinhmun ngaingai a nai zet” tiin ka sang hngehnge.

Dublin, Ireland ka caan hmannak kip ih in thluntu Swedish Foreign Minister Carl Bildt, Burma Minister of Industry Soe Thane, President of Think Tank International Crisis Group Louise Arbour le U.N Human Rights Chief pawl pawl khalin Ireland ih in rak sunlawihnak pawl an lungkim zet.

Bono cun tuizan concert hi nangmah hrang a si ruangah ra suakin stag ah ra kai ve aw in tiih minit 4 sung stage ah in ding tir. Mipi cu an au men hman siloin a huuk in an huuk. Cutin, thusimnak tawi in pe cih. Ka lungawi ka ti tikah ka thinlung sung thawn lungawinak thu ka lo sim tiah ka sim thiam tawkin lungawithu ka sim. An hnen lala ah hivektlukin in rak hmuak ding timi ka ruatbanlo tiah ka sim bet.

Amnesty International’s Ambassador of Conscience Award laksawng in pek hnu ah thusimnak ka nei sal. Europe khawmual pawl fangkual ih ka vah sungah ka birthday 67 tla a rak kim ih birthday  cake ahnak ropi zetin ka nei. Amnesty International’s Ambassador of Conscience Award hi 2009 lam ahkhan in rak pe zo nan ka rak lak thei lo ih tuihnu lawngah ka ra la ngah mi a si.

Concert kan hman hnu khalah a leng ah hlasaknak le a phunphun hlimhlainak caan a um. Irish President Michael D Higgins thawn khal hmaiton in thureltlangnak kan nei ngah ih ka diriamzet fawn. Ireland ih ka thusimmi tambik mi cu kan ramsung ih buainak pawl a cem hrih lo ti a si. Ka thusim theh ah The Lord Mayor of Dublin, Andrew Montague cun Irish mipi cun kan lo dinpi a si tiah phuansuahnak a nei. Mipi kut beng awn thawn in kan kiangkap a khat sal.

Britain Ram Tlawnnak

London, Britistain- 18-25 June 2012

BBC London Kawlram Thuthang Phuangtu & Thuthang Ngantupawl Thawn…

British Prime Minister David Cameron kan ram ah ra in an ram ih tlawng dingih i sawmnak tifamkim dingah Britain ram ka thleng nuarno ngaingai a si hi.

A hmaisa in BBC thuthang phuangtupawl thawn kan tonawk daan pawl lo ruah hmaisak ka duh. London ih BBC hmunpi Broadcasting Headquarters ah ka va thleng.

BCC thuthang phuangtu thenkhat pawl cun ka zuk le ka thuhla le video pawl lawng an rak hmu theu. Keimah taktak hmaiton ah in hmu dah lo. A hleice in, Burmese BBC thuthang ngantupawlin in hmu hiar hleice cuang.

Inn sung ka luh tikah an lakih mithen cun mangbangnak thawn in zoh ti ka thei. A thuhla kan ngan reromi tu ah amah ngaingai kan hnen ah a thleng tiin an lungawinak thu an sim rero.

BBC Kawlram thuthang phuangtupawl thawn kan komawknak ding ni a thlen ding hngakhlapzettu an hotubik Burmese BBC editor Tin Hatar tla cun ka dam lo a theih tikah kan tonawnak ding kan thulh ka phang tuk lawmmam tiah a sim. Keimah khalin BBC thuthang phuangtupawl umnak innpi ka thleng thei cu ka inn thleng bang tuuk in ka ruah ve thu khal ka sim hai.

BBC Kawlram thuthang phuangtu le thuthangca ngantu pawl khalin ka suahcam in lawmsak thotho. A sangsangten ka thuhla le keimah in rak ruah daan pawl simnak an nei. A tlangpi thu in, Suu Kyi cu a lu ah pangpar a ton theu ti an thei. A hleice in rose par. Curuangah rose par mawizet laksawng in pe. Na sam na phial daan le na rose ton daan hi kan uar tuk tiah in sim ih ka hnihsuak ngaingai.

BBC thuthang latupawl hnen ih ka sim ve mi cu, khuahkhirhzet ih thawnginn le innpi sung ih ka um lai khalah BBC thuthang ka ngai ringring. Ka thuhla nan ngan ringring. Cun, hmun dangdang ka thlennak kip ah ka thuhla nan ngan ringring mi ka theih tikah ka lungawi. Ka thuhla zingzawitu tla nan si tiah ka sim. Cun, BBC thuthang ka upatnak tla nasazetih ka sim rualrual in a hlan vek a awh deuh lo phang ah thapeknak tla ka nei bet.

Jockey Dave Lee Travis: BBC Disc Jockey Dave Lee Travis ka rak ngai theu mi amah rori hmaiton in ka va hmu ih ka lungawi tuk. Kei cu a hlan ih a hmin duhkawknak ka mang lai tikah Hairy Cornflake tin ka ko ih a lungawi ngaingai, mangbang zetin i zoh. Thuthanglatupawl cun thu tamzet in sut. Cutawkih thupizet pakhat in suh mi cu ziangruangah Kawlram ralkap na mawhthluk in na dem lo? ti a si. Kei cun ralkap pawl ka mawhtluk lo ih ka dem lo asinan buainak le doawknak an suah mi violence sawn hi ka dem sawn a si tiah ka sim.

Dalai Lama Thawn:

Tibet mithianghlim le hruaitu ropi Dalai Lama khal Europe khawmual pawl ih a rak tlawn kual rero laifang a si. Zumbanlopin London khawpi ah kan tawngaw ruairi. Dalai Lama cun i ton theinak parah a lungawithu i sim.

Cun, “Na ralthatnak ka lo upat nasa” tiah hmaiton rorin i sim. Cuihleiah, veikhat leh in nangmah thawn hmailam caan ah kan tonawk sal ding ka duh tikhalin i sim bet.  Cutin, minit 30 sung hrawng thudang tete tla reltlang  thei nak kan nei.

University Of Oxford Sulhnu:

Kum reizet hnu ah ka tlawngkainak hmun Oxford ka va thleng sal cu thil a rak danglam nasa. Ahleice in, ka hngilh thei dahlo mi cu tuvek in nikhua boruak a um, culai caan ah cazohnak innpi ah ka to ih cabu zoh lo in sangkate ihsin khua ka cuan lai ka mang ringring lai.

Cun, ka innsangpa Michael Aris khal hngilh ni a um dah lo ding. 1960s lam ih ka tlawng kai zo nak hmun a si ih Michael Aris thawn kan rak tawnawknak khal a si fawn ih mipi pawl hnen khal ah ka sim mi cu 1980 lai ahkhan kan sung zaten Oxford ah kan rak um ih kan nun a hlim ngaingai ti a si. University of Oxford hin honorary doctorate in rak pe.

Cazual pawl ka lak hnu ah Oxford ih ca ka rak zir daan pawl le khalai ih Kawlrammi Oxford ih cazir um sung ka si thupawl tla relnak ka nei. Hi degree hi 1993 ih in rak hlan zo mi a si.  Mipi hmai ih ka sim theu mi cu “Tui kan ram dinhmun hi a lamzin thoknak lawng a si…Kan lamzin hi lamzin tluangtlam le nuam asilo ih lamzin bingbo timi pawl hi ka sim rero mi an si. The London school of Economic and Political Science tlawngtapawl hnen khalah the Rule of Law a thupit daanziapawl le kan ram khumpinu daan felfaizetih kan rem a tuul sal thu pawl khal ka sim rero.  Debate nak pawl ah telin ka caan ka hmang ve.

British Parliament ih Joint session kan neih hlan khalah kan ram dinhmun pawl simnak ka nei rero zo. Lal sungkua Prince Charles le a innsangnu Camilla thawn khal kom aw in thunuam titinak kan nei thei. Leitlun Hall ropi rel theu mi Westminster Hall 1097 ih an rak sak mi ah thusimnak caan in pe. Britain parliament rorelnak innpi ih thu ka sim ngah hi ka diriam zet.

Tuini tiang Queen Elizabeth le keimah lawngin Britain rorelnak inpi pawl ah nunau in thusimnak kan nei hrih lai. Leitlun ralpi veihnihnak hnu ihsin tui ka thusinnak innpi Westminster Hall ihsin US president Barack Obama, Pope Pope Benedict XVI, South African president Nelson Mandela, French president Charles de Gaulle pawl lawng hi ramdang mi Westminster Hall ih thusim bantu pawl an cu si.

Ka thusimnak ah Britain rampi hin Kawlram hi practical rori ih in bawm dingah ka dil. Zalennak ngaingai (true democracy) kan din sal ding tiah hi Hall pi sung ihsin au suahnak ka nei. Liam cia 1960 ahkhan St. Hugh’s, ah Politics, philosophy le economics pawl ka rak zirih Kawlram ih harsatnak phunkim ka tuar caan khalah Oxford ih tlawngca ka zir lai ka ngai theu ti khalin mipi suakkhawm pawl hnen ah ka sim.

Ka doctorate lak lai, caan hman daan pawl khal Britain ram sung ah live in TV ah an suah cih. London tlawngta pawlin ka suahcam kum 67 ka kimnak in lawm sak. Tlawngtapawl hnen ah keimah pakhat lawng cun kan rampi hmaa ka ti dam thei lo ding tiah ka sim. Rule of law kan rampi ih kan hman lo ahcun ziangtik hman ah remdaihnak le zalennak famkim kan nei thei lo ding tin ka sim.

Netnak Ram France

Paris, France Ram Tlawnnak – 26-29 June 2012

Switzerland, Norway, Ireland le Britain ram pawlih cawimawinak dangdang le sunlawihnak ziangmawzat ka don hnu ah London ihsin France ram lam pan in tlangleng thawn kan feh suak.

26, June 2012 (Tuesday) sunhnu deuh ah Paris khawpi (France) ram tluangten kan thleng. Tlangleng ihsi ka tum ding rak zoh duh ah minung teetaw zetin lamzin ah an rak tlar khat. Elysée Palace ah kan ram mipi ziangmawzat le France president thar Francois Hollande pawlin lungawi soparten in rak hmuak.

Ka thlen hnu reilote ah mipipawl thawn komawknak ka nei cih. President Francois Hollande in Kawlram zalennak ding hrang in bawm tum vivo thu mipi suakkhawm pawl hmai ah simnak a nei.

A zan cu President Francois Hollande le rorel upa pawl thawn hmun khat ah zanriah kiltlang khawmnak kan nei. France ram hin khuahkhirhnak innpi sung ihsi suak thei dingah in rak bawm rero zo. France foreign minister Alain Juppé thawn khal January thla ahkhan Kawlram ah a ra ih kan tawng aw.

Paris khawpi ka thlen lai ah ka angki hring ka hruk. Paris ah ni 3 caam ding ka si. Foreign Minister Laurent Fabius thawn khal kan tawngaw zo. Cun, ministry hmuan ah “tree of liberty” thingkung phunnak ka nei.

Tlawngca ka zir lai ah France ca hi ka rak zir. Tuini tiang ka hngilhlonak dingah theitawk ka zoh. Tui France ka thlen khalah France canganthiam pawl le thlarau pawl hmuhsal ka duh a si tiah ka sim.

Interview le thuthanglatupawl thawn tonawknak ah Kawlram ralkap ka huat an zum ih kei cun kan ram ih ralkap pawl hi ka hua lo. Kum 15 lenglo in kaihrem nan an parah thinhengnak ka nei lo cuhnakin anmah pawl thawn kan ram ah zalennak famkim kan thlen ding ka tum sawn tiah thuthanglatupawl hnen ah ka let theu.

Tuitum Europe khawmual hrut ih ka khualtlawnnak hi tui ka umnak Paris ah ka cem ter ding. Ram tin ka fehnak kip ah sunglawizetin in rak hmuak ih upatnak in rak pek mi pawl ka hmuh tikah ka lungawi ngaingai a si.

France ram khalin 2004 ih in rak pek zo mi Paris rammi sinak pakhat vekin cawimawinak sunglawizet, cawimawinak capi City Hall ah in pe sal ih ka lungawizet. Cun, “The Lady” zuknung in buaipitu Luc Besson le Michelle Yeoh pawl par khalah ka lungawinak thu ka sim. Paris ah upa thenkhat le tlawngtapawl hnen ih thusim ding ka hmabak lai. Cuihnu ah ni 17 sung Europe khawmual hrut ih ka khual tlawnnak cu cemnak lam a pan thlang ding. 29 June 2012 ah ramsung lam pan in ka tlung sal ding.

——————————————————————————————————–

Bet: Pi Aung San Suu Kyi Europe ram pawl tlawng ih a fehnak thu pawl hi thuthangca dangdang pawl sirhsan phah in CT Chief Editor Salai Uk Lian ih ngan a si. Cangantu hi “Leitlun Bawmtu” le Uklianloveyou@gmail.com ah ton a theih.

(Visited 68 times, 1 visits today)

Comments

comments

12 Comments

  1. CT pawl nan ti ttha. Ka siar cu ka mitthli a tlak. Leitlun ih a duhve bik duahdomi pasal le fate tanta in, a pum a pekmi hi, upattlak a si.

  2. Khai khawm thiam nasa. Siar nuam in theihnak a ti tam. Suu Kyi cawicang nak lawng kan thlir zo.

    Hivekin thuhla khai khawm theu uh. Siar man hla lawlaw.

    Media ah kan cak.
    Ngan cia mi cu ka siar ve nasa.

  3. A za ten pakhat hrelh lo in ka siar thluh ih a ropui riai a tlawng tu khal sunglawi …a ngan tu khal thiam

  4. Rev. Khup Za Do says:

    A tialtu nih kan pi Suu Kyi a zuul a lauh ko hi teh. Falam ca tial ka thiam lo le. Tha te comment cu ka duh ngai.

    A tial tha tuk ti kha si ko seh law. Ka lawm mu.

    CT ka rel tawn.

  5. Rosy Hnemte says:

    My only hope Suu Kyi!
    Never give up.
    We stand for you.

  6. Siar a man hla riai
    a cemtiang siar ka tum lem lo nan siar lo thei lo in a um ih
    ka peh vivo, A canah mitthli a tla phah,
    kan pi cu upat a tlak rori aw.

  7. Salai Uk Lian uar na um nasa … na ca ngan a ropi ih siar nuam tuk.. Suu Kyi khawltlawnnak famkim ten kan siar ngah ih diriam um tuk…

  8. Commenttu le Siartu zaten,

    Pi Suu Kyi khualtlawnnak ka nganmi sunsak ih in rak siar sak ruangah ka lungawizet. Kimcanglozetin ka ngan. Ngan sualmi khal a um thei fawn.

    Pi Suu Kyi hi uar a um zet. Kan rampi zalennak ngaingai in hruai thei ding le ding lo thu sawn cu khuanu pawl hnen ah a um. Pathian ih rem tinak sawn a si.

    A pai keneh a thlu thei nak…ram hrang a hna tuan le a cangvaih daan upattlakzet tampi a um ruangah a thuhla siar nuam ka ti zet.

    Ram hrang na sacrifice nak kan uar tuk tiah mipi in an rak ti asinan anih cun sacrifice timi tongfang hmang lo ding ah mipi pawl ka sim theu. Ka duhthlan a siih sacrifice ti mi tong hman a tlak lo a ti.

    Cun, non-violent policy a hrilnak hi ka uar cuang. Kawlram ralkappawl do neh ci an si lo ti a theih ruangah ralkappawl ka hua lo anmah thawn ram zalen kan tuah ding a ti. Cuvekih political thlirnak a rak nei hi a tha tuk.

  9. Pingback: Kawlram In Thawngtla 46 Suah Ding : chinlandtoday.info

  10. Tha zet zual.
    Siar nuam in very man hla.

  11. Himi thuthang cu nan ngan tha tuk.

Comments

%d bloggers like this: