Phaileng Zuun

Phaileng Zuun

(by Par Ttha Men)

“Vavang, tu tiang it lo’n ziang saw na ngan ciamco?”images

“Zaan vaar meisa vaan le tla, tuan ten hmit le tla a man a bang aw thotho na ti ko ual.”

“Meisa man ka lo sut lo pi.”

“Ka lo capoh mi si ko ual he he.”

Falam ih kan thawn hnu khua (Kalrawn Hmunpi) ah a mah te lawng a rung hmei mi ka pi ( ka nuih nu) ka tlawng. A it hnu ah tappi kiangah meisa ai phah in ca ka ngan rero. Khedaan thawn ka ngan ih ka lung kim lo mi ka phiat caan maw, ka ngan caan maw tam deuh thei hlah. Ka buai tak lai ah zinthawh ding a tho sal ih i suh mi a si. Tuan a ih hlan ah kan khua kiang tiva in electric mei an lak pek te thu pawl i ruah mi mang sal in ka capoh mi a si. Mei an lak pek te a hmihnak le a van nak khaluk um lo in zaan var van a tul. A tleu celh lawn papicawng in ka hung tuam ti i sim ih ka hnih nak ah ka pum hmuah na ttheh. Tu cu hmih a theih zo. A si nan zaan var vaan khal le meter kai ih a man tam ti um cuang lo. Mei bulb pakhat ah, michawng pakhat ah thla khat ziangzat ti vek khi si, meisa man an pek daan. Zaan khua thim in zinglam khua vang tiang pelh lo ten a vang thei ringring ih Falam hnak hman  in meisa ah cun an nuam sawn, lai khua te an si nan.

Inn sung a luh hnen ka hei kawh sal.

“Pipi, mei ra ai hrih. Ka ngan mi ka lo siar sak ding.”

Tokheng niamte a hei cuh ih ka kiangah a rung to. Ka ngan mi cu ka siar sak.

“A nuih tirhfial hnglih ih leng

puarpum vual ko hmunphiah thawn

thawi a tuar nak an deu te.

…………………….”

“Cu cu ziang saw?”

“Biazai panteh. Ca ngan daan phun khat. Hlan ih hla nan rak phuah vek. Tu cu a sak in sak lo’n a siar in kan siar.”

“Na nuih lo thawi mi maw na phuah. Ka thin ee. Na nu beh, na pu in le ralkap a rak tlak lai ah hla hun phuah ta. Ngai hnik.

Laam tthuang reel le baan vawr lai ka zuam tawn lo cu

Kan kawh tir tual sum a leng daimai nu men sing seng ngai ai ing[i] a ti.”

“Cu cu hla maw?”

“Si lawn, Phaileng hla.”

“Pipi, nuam ten i sim sal, ka vun ngan ta ding.”

Ka pi cun nuam ten i auh ih ka ngan. A aw tla ka cawng phah. Nan a ti duh san ka thei thei hrim hrim lo.

“Pi, hi mi hi Pupu ralkap a ttuan lai ah Nunu hrang a ngan mi na ti ti aw?”

“Si. Ralkap ttuan ding a pawh ah na nu cu thla ruk, sarih hrawng lawng a rak ti. Na nu ngai ih a hun phuah mi pan teh.”

“ ‘Laam tthuang reel’ cu ziang ti nak?”

“ ‘tthuangreel’ ti cu paret ti nak”

“ ‘paret’ cu ziang mi maw?”

“Vei, ralkap an zir ah zing tin bualrawn ah a tlar in an din ter. An ke tla an feh ih an kut tla an vawr ter mi kha.”

“Aw ka thei zo, ka thei zo. Parade. Mirang tong. Cu mi kha laam thawn a tah thim nak si pei cu!

Laam tthuangreel le baan vawr lai ka zuam tawn lo cu’ cu mi cu ka thei zo. Nunu a ngai nak ah parade tuah a paih lo. He he.  A zangzel ih zingtho a paih lo mi si ko ding cuh. Nan a hnu ta cu siar a har tuk ual, vei khat ten i sim sal aw.”

Ka pi in thin sau ten i nolh sak sal ih ka cawng tum rero. A sak sim lo, a siar hman awl lo khasi. ‘Nu men sing seng’ cu ka nu a ti nak si seh la, tual ah a feh thei, a lek thlang ding a ti duh nak si pei maw. Ka ruat nasa. Ka pi ka sut nan fiang ten i sim thei ve lo. Hla cu aw suah rem ding in an tuah ih tongfang hrekkhat cu sullam nei lo mi tla an um i ti.

“Pi, a dang phaileng hla tla i sak sak hrih”

“Vei, na pu thawn ralkap a rak tla tlang mi Than Ceu Pa ih phuah mi maw.

Sumthawng ku lu sam saw mai sam tan

A faak maw vai rang hnen tlan’.”

“ ‘Sumthawng’ cu…?”

“Vate hmin. Vate fate, a duum ih a mei saupi, dong caan lai. A zim ah a tek ih pacang pawl in an luu ah an ton.”

“Sawnku vek?”

“Si, cu kha ‘sumthawng ku’an ti, pacang pawl ton mi. A suan mi cu a sam saupi a tom ih sumthawng ku a rak ton nak kha ralkap a tuan tik ah tawi ten an taan ter ih cu mi a sim duh mi.”

“ ‘A faak maw’ ti cu a thin na vaih si pei cu he he.”

“A si pei cu.”

“Pi, Pupu nih nangmah teh a lo phuah lo maw?”

“Phuah ee. Tam pi. Khui hnik vun don ta hnik peng. Um …

Far khan le tintling ih ka it me rem lo len

Lung hnih nei tial dawh ka siang cung ah awi leng lo ti thiam hmun hlaang’[ii]

a ti. A mai i rak len lai ah tlangval dang rak leng tu tla ka neih ruangah ‘lung hnih nei’ i ti nak.”

“A lo thik ti nak hi hi…’Tintling’ cu lukham ti nak si lo maw?”

“Si.”

“ Um… Si le cu mi dang nih an laan ding a phang ih zaan a ih hmuh a thaw thei lo. Nang theh na phuah sak ve maw?”

“Kei cu hla phuah ka thiam lo pi. Nan, Phun Nawn Nu in i zirh ih ka rak sak sak dah. Cu le na pu a thin a heng ciamco.

‘Kiang ziar law Nu Tial tta khaw hlan Ngam Bawm bang

Tling khan ah za tial ngai i thuan song lo lai’”

“Ziangah a thin heng?”

“A nu le a pa, a sung le pawl in ka farah ih in rak duh lo. Cu ruang ah ‘I leng duh nawn hlah, i tthi ngai cuang lo ding. Hlan ih Ngam Bawm le Zawl Tling tla an rak co aw ngah cuang lo pi’ ti nak lam a si ih pan teh.”

“Oops! A lo duh tuk ih a lo co ngah lo ding a ruat thei lo”

“Phun Nawn nu cu hla phuah a thiam zet. Pakhat ka lo sim hrih ding. A ttapa dang tla an thih zo hnu, Ngun Hup Pa a thih ih ruakhnah ah a sak mi. Hi vek mithi inn zaan ih an rak sak mi hi Lian Dang hla an ti.

Ngun khuat hai le va haai tial ih zuu hriim in duh sia

Tlang ih paa bang an ziam cem seem pi rual te tla’ a ti.”

“ ‘Tlang ih paa bang an ziam’ a ti mi tongfang cu a mawi tuk ual. Cu le hmaisa Pupui’ hlafang ‘lung hnih nei’ a ti mi tla. Hi mi hla cu a sim duh mi ka thei a bang. A ttapa pawl an thi ih a ngai nak ah zuu in hman a paih nawn lo ti nak si pei cu ti.”

“Cu le Nun Hmuak Nu tla hla phuah a rak thiam hngin. Hrin Dun Pa in Al Nawn Nu a rak maak ih vok thawih a thla an kawh ah hi tin a rak phuah.

‘Tuhmui hreitlung ha khal an thleng thul

Lian ram lo ttuan zang raw vial’ a rak ti.”

“ Cu mi cu, nupi maak cu poi a ti lem lo ti nak maw? Nunau cu tuhmui le hreitlung ha vek, thilri vek in duh lo tik poh ih thleng men ding ti nak maw?”

“Thei ve hlaang. Nan, nupi maak cu a awl tuk sing.”

“Ziangah maw Al Nawn Nu cu a rak maak?”

“A farnu mi bang lem lo a um ih a thla an kawh ah arsa thin ei duh lo’n kerh-ong ah a thlak lai an pa in a hmuh ih pan teh a maak”

“Kerh-ong cu ziang?”

“Zial ong ti nak pan teh. Hlan lai inn cu maw, zial an phah mi kha a rem lo ih a kar lak ah ong tumpipi an rak um.”

“Ziangah sathin cu ei lo ih a hlon.”

“An pai’ farnu cu mi bang lo, mi aa a si ruang ah a hmuhsuam, a zawmtaih tla si pei cu.”

“Pipi, a dang tla i sim hrih aw”

‘Ka puan hnemrang sia te vulei ah ciil reu hlauh

Ttet aw pei khaw sia ttha lei nak saw ka nei lo’”

“Aw, hi mi tla theih ol te. Puan thar lei nak paisa a nei lo ih cu ah lei ih pal ih tteh ter men a siang lo. A phuah tu cu nunau si lo le mak seh.”

“Phaileng hla a rak thawh nak cu hi tin an ti. Hlan lai ah pa khat pa kha hramlak ah thing a rak salh. A fala nu a ngai ih hla a phuah tum. ‘Tuu thing sai lai, thing sai lai…’ a ti ih peh ding a thei nawn lo. Cu lai ah a kiang ih rak um mi Piinu in a theih ih a zin fet tuar lo ah,

Tu thing sai lai Bawi Al no zuam hmen ning maw

Thli aw hnawm bang i zam law Sai Vang hnen ah’ ti hme a ti an ti.”

“Bawi Al cu thingcek pa hmin, a fala nu hmin cu Sai Vang si pei cu ti.”

“Aih, hla hmin si maw an si. Minung hmin an si lo. Pinu ih hla a phuah sak hnu cun cu pa cu a lung awi tuk lawmam. A thing ceh lai a taan hrat ih inn ah a tlung vurvo ih a fala nu cu a vung sak sak. Cu le cuih hla cu Sun Thla pawl in zarh khat sung an aih an ti.”

“Si le cu, cu pa cu Sun Thla mi a si pei cu ti. Piinu cu ziang vek saw Pipi?”

“Ka thei fiang lo, nunau cu si pei cu. Thuanthu ah cun ke khat lawng nei ding a bang. Khuasia phun khat si ding. Piinu ih phuahzirh mi a si ruangah lo zia Phaileng hla cu khuavang ta an ti.”

“Ngeh, ka zum dah lo. Khuasia si lo in hmelsia nawn, ttong thei tak mi nunau a rak si ko ding cuh.”

“Thei ve hlah. Aih, kan ka thawt nak ah ttim ar hman a hung khuan ngurngo cu. It thlang, kei tla it sal peng.”

“Pipi, ne ta bik pa khat te. Tu hi ka tlangval pa nih ram dang ah i feh san ti bang seh la. I thlun aw i ti nan nu le pa um lo nak ah ka va ngam thei ding ka zum lo ih ka thlun ngam lo. Nan ka ngai tuk ti bang seh la. Phaileng ka phuah duh le ziang vek ttongfang pawl ka hmang thei ding?”

“Piinu ah maw i ruah?”

“Si lo ee, Pipi tla hi. Phaileng phuah thiam ka duh ve ih pan teh.”

“Kei hla phuah ka thiam lo ka lo ti ning. Nang mah hman hla sullam na theih lo ih i suh ciamco. Phuah thiam in hei kuat hman aw la na tlangval pa cun a thei cuang ding sawm?”

“Si ngai ti.”

“Cu nah, ziang na ti ee tu te i serh mi kha?”

“Biazai”

“Hnge, kha bang in ngan huahho aw la hei kuat men. It thlang, it thlang. Khua a sim tuk zo.”

Ka pi cu ih nak khaan ah a hung lut. Kei ka cauk ka ret ih inn leng ka ra suak. Van a fim. Thla a vang ih arsi an tam ngai ngai. Cucik kharbawk pawl tla an awn rero. Thlizil hran hnen ah zaanhmuipar rim a hung hmui vurvo.

Thang, ka lo ngai daan cu mak. Pupu nih Piphi ruang ih a rak tuarnak phaileng hla ih a rak phuah vek in kei tla phuah ka duh ve nan, ka tuarnak pawl lang fiang ter thei tu ttongfang ka thei lo.

Tual ah ding in ka ruat. Tu hi phaileng phuah tum in ka taartet bang seh la. “Ka lo ngai, ka lo ngai…” ti lawng ka nolh rero bang seh la. Cu mi lai ah Piinu ti tler run zawh in, a ke khat ten rung tur hluihhlo seh la. Zialsin ah ding in, tikuang kiang ah kuun in tidai sung ah a hmel a vun bih aw. A ruang niam te, saam tom fa te (hei bua bet lai). A caal puk lerli, a hnar bek nekni , a mit pit cuukci (hei berh bet lai kha maw). Ttongfang khansam ih ka nolh rero mi in a zin a fet. A hnak a doh. A thin a ttheu ih in a lu a hun tung.  Lungkim lem lo, nautat nawn in ka lam i rak zoh. ‘A va chawih lawmam ve cu te hman thei lo’ ti vek khin. Cun a ka a an ih hla cu a hun thawh…


[i] Tin Kil Nu, a pa in a phuah sak mi hla.

[ii] Tlang Kip Zing Pa in Tlang Kip Zing Nu a phuah mi.

#Hminsin: Laihla pawl hi Nu Tial (Tlang Kip Zing Nu) le Nu Thluai (Tawk Nngel Nu) tla ih in sim mi pawl an si. An hnen ah ka lungawi nak lang ter ka duh. A phuah tu pawl le an thuanthu upat pek nak thawn an hmin (an fale hmin ih kawhnak) thleng lo in a hman in ka ngan cih.

(Visited 126 times, 1 visits today)

Comments

comments

One Comment

  1. ka siar thluh… Ka duh tuk…

Comments

%d bloggers like this: