Payeng: E-kah 1300 Lenglo Thingkung Cingtu

screen-shot-2014-04-15-at-10-46-57-pm1

Kan dunglam kum 30 lenglo ahkhan, suakthuan a si mi Jadav “Molai” Payeng cun a suahnak hmun India ram, Assam hmunram ih vunnel lawng in a khat mi hmun ah thingkung ci phunphun a rak tuh thok. Cumi cu 1979 ahkhan a si ih tiva tisuar pawl in vunnel parah rul tampi an fen tang. Cumi lai ih kum 16 lawng a si lai mi Payeng cun rul pawl cu an thi thluh ti a va hmu.

“Rul pawl cu nikhua a sat tuk ruangah an thi. Phentu thingkung an nei lo.Nunnak a nei lo mi an taksa ruang pawl zoh in ka to ih ka ttap. A tomtawhlot ih thahawknak siava a si. Curuangah hramlak hohazung cu cutawk hmun ah thingkung an cing thei pei maw tiah ka va suthlam. Asinan annih cun cutawk hmun ah ziang thingkung hman an nung thei lo ding tiah in sim. Anmah sawn in keimah cu rua cing ding ah in dil sawn riangri. Ka thin a na zet nan, ka ttuan thok thotho. Zohman bawmtu ka nei lo.”

Tu ahcun cumi vunnel lawnglak hmunram e-kah 1,360 cu thingkung phunphun thawng tampi keuhnak hmun ah a cang ih, vate, sakhi, vomzawng, zur, sai le pawpi tiang umnak, rannung phunphun ih tualcainak hmunpi ah a rung cang zo.

Cumi hramlak cu a cingtu Payeng ih duhkawh hmin a si mi “Molai” cawi in “Molai hramlak” tiah kawh a si. Payeng hin amahte’n a kut thawn rori ih a cinsuah mi hramlak a si.

Tu ahcun Payeng hi kum 53 a si.

Payeng in a nun pumhlum hi hramlak kilkhawinak ah a hmang. Tuini tiang khal ah hramlak ah a ceng. A nupi le a fa pathum thawn hramlak ih bukte pakhat ah an um ih, caw le naa hnawi zuar in an cawm aw.

Hramlak Kilkhawinak ih zungbawi Gunin Saikia ih sim dan ahcun “Molai hramlak” hi leitlun ah tiva laifang ih a um mi hramlak tum bik a si men thei ti a si.

Mi tthenkhat cun anmai nunnak hrangih midang nunnak tiang an siatsuah lai ah, mi tthenkhat cun anmai nunnak hlan in midang hrangih thil ttha an tuah ttheu.

-Sianglianuk Kianghrol

(Visited 310 times, 1 visits today)

Comments

comments

Comments

%d bloggers like this: