PAUL THAZANG NEI TERTU A RUALPA

PAUL THAZANG NEI TERTU A RUALPA

 Timothy Sui Lian Mang

          A bang mi le tha cem mipawl cu an tha a caktersal. Minopawl hman an bang ding ih, tlangval khal an thacemin an sawn ding. Sikhalsehla Bawipa a rinsantu cu an tha a tlungsal ding ih muvanlai vekin thlapharh in an zuang ding. An tlan khal le an a tha a bang lo ding: an feh rero khal le thacem in an sawn dah lo ding.” ( Isai. 40:29-31).          Hih a tlun ih Pathian thutiamkam siar tikah Pathian ih thilmak tuah le ti mi kan thinlung ah a lang ko ding ka zum. Elijah khal kha siangpahrang nu Jezebel tih ah peng 150 lai a tlan ih a bang hnephnep. A taksa a cau zet ih, a thlarau nun khal a derthawm ( I Sph. 19:1-7).      

          Elijah a ihthahnak ihsin a thangharh tikah vancungmiih pek mi sang le tidai a hmu. A rawngbawlnak hrangah cahnak thar le ruahnak thar a ngahnak ding hrangah Bawipa in Elijah kha a rian, a tuamhlawm a si. Bawipai hnatuan ding a neih mi sunzawm thei dingin cahnak thar pek a si. Pathian in cahnak thar mi a peknakah mangbangza i a cangvaihnak kan  hmu ih, cahnak thar mi pe dingah milai hi hmanrua ah teh a hmang thei pei maw? a hman mi pa Paul in a theifiang.

          A nun cem lamah Paul cu Rom thawnginn ih thlak a si. Kaisar thawi tawngaw tahratin, thih ding lawng cu a hngak.           2Timothy a ngannak ah, hivek dinhmun siazet lakah Paul ih rinnak, thlarau lam cahnak cu a kiam cuang lo (siar aw 2Tim.4:7,8,17,18). Cuti a si ko nan, minung umhar-lunglennak cu a nei ko ding. A tar ve thlang si ih, a taksa tla cu a cau zet ko ding. a thawngtlak hmaisa kha cu thawngtla ngaingai si loin, a innah an kharkhum men ih ( Apo. 28 siar aw), zalennak ziangmawzat a nei. Asinan tuihtum ih a thawngtlak cu thawng sia zet a si. A umnak kiangah thawngtla ek-hang tla  a luang hluahhlo. Timothy hnenih a cakuat ah a Angki tla run keng ding in a ngen (2Tim. 4:13) ih a cang thei tawkin thlatang hlanih ra dingin a sawm (Cang 21). Pathian in a umpi ti a thei ko nan, lunglen can cu milai kan si bangin a nei a si. Luke lawng ka hnenah a um ( cang 11) ti tla a ngan hi.

          Thinlung natnak tla a tawng a si. A rawngbawlpi, a rinsan mi a rualpipawl tla in an phatsan, dung an kirsan. “Asia peng ih um mipawl hmuahhmuah in in tlansan ti kha na thei. Cupawl lakah Fikel le Harmokens an tel.” 2Tim.1:15). A khualtlawnpi a rinsan mi Demas khalin a phatsan ( 2 Tim.4:10; Kol. 4:14, Fil. 1:24). “Humawknak thu ka rel hmaisak tumah khan zohman in in dinpi lo ih, an zaten in tlansan thluh sawn. An parah mawh thleng lo dingin Pathian hnenah thla ka cam.” ( 2 Tim. 4:16).

          Paul in nun khawthim zin a zawh laifangah mah lawngih umnak, taksa cah lonak, thinnatnak, a phunphun a tawn laiah Pathian in cahnak a pe ih, Pathian in a umpi. Culawng hman si loin Pathian milaipawl tha thar tlungtertu dingah hman mi a nei. Bible sungah hmun hnih te lawngah a hmin a lang. Asinan Paul ih rualtha bikah a cang ih, Bawipai siahhlawh kan tuanpi a ti mi ah a tel. Paul in cupa parih a lungawizia a thinlung cu  a cakuat ah a lang. “Onisiforas cun i harhtharter theu. Ka cikcinpawl khal in zahpi lo ruangah Bawipa cun a insangpawl hnenah zahngainak pe hram seh.” ( 2 Tim. 1:6); a nganbet hrih, “Cui ni ah Bawipai hnen ihsin zahngainak a hmuh theinak dingah Bawipa in pe hram seh… ( cang. 18).

          Hipa hi zo a si? Paul thawi an naihawkzia hi ziangruangah? A hmin cu Onesiforas a si. Bible hmin pawl hi sullam tha zetzet an nei ih, hi pai hmin ih sullam khal cu “ hlawknak kengtu” ti a si. Paul a riannak cu Paul hrangah a man a khung tuk. Paul in siahhlawh mankhung a ti mipa a si. ( siar aw 2Tim. 1:16-18).. cang 16-nak ah Onesiforas in a cau zo mi Paul kha a thin a nuamter. A umzia cu inn pindan fate sungah, sangkaatepawl khar theh mi thawpit zet ih um hnu ih sangkaapawl awnsak, thli- thiangte runglut cun thaw a suakter, mi a zangkhaiter, cu vek cu Paul ih rel mi a si.

          A pakhatnak kan hmuh mi cu Onesiforas in a naupa a thinlung taktak in ‘ a ngaih tuah- a ruat’. Hi pa hin Paul tha thar a pek leuh leuh zia Paul ih cangan mi in kan thei thei, “ tha thar ih pe leuh leuh” ( 2 Tim. 1:16). Mi pakhat in bawm tul mi a bawm tik ah, ‘ a ngaihtuahzia’ a lang hmaisa. Mi tul mi, bawm tul mi, tha pek tul mi vawi hnih khat cu kan bawm in kan pe tla a si thei men. Asinan, ‘leuh leuh’ tla cu kan paih lo tla a si men ding. Onesiforas  cun thazang thar a pe leuh leuh. 

Tanghmasial lo

          Hipa cun midang thatnak ding a ruat. Paul tha thar a pe leuhleuh ih a, ‘ a thirhri tla a zahpi lo’ ( 2Tim. 1:16). Mi tampi cun anmai hlawknak, nawmdeuhnak le hminthatnak lawng an hawl ih Paul hrang an ruat lo. Onesiforas cun Paul hrangah  a nung. A zahpi lo bakah, a bawm, tha a pe. 

Taimaknak

          Onesiforas hin taimaknak nun a nei. Paul in hitin a ngan.       “ Rom ih a um lai ah, i hmuh hlan sung i hawl.” ( 2 Tim 1:17). Mi hrekkhatpawl cun can remcang kan neih thei asile Paul tawn tla kan tum ding tifang in an ti a si thei. Hawlhmuh a har zet ding nan, Onesiforas cun a hmuh hlan lo Paul a hawl, thil ol a si lo. Taimak a tul a si. Onesiforas in a man a pe ih, Paul hrangah mithahnem zet a si. A cante ih mi kan bawm hi a thahnem zet. Thil fate ih kan ruah mi khal hi thil thahnem zet an si theu.

          Mi an beidawn le khawruahhar laifangih cakuat in si maw, telephone te ih thapek khal hi a thahnem zet. Paul rori hman tha pek a tul. Kawhhran member menmen in tha a pek tikah thazang thar a nei. Tlaksam lai ih sumpai malte ih mi va bawm, hnipuan neih lo laiih hnipuan mi then, mi ih rel hlawh le huat hlawh laiih mi hnem tivek te hi kan ruahban lo tiangin an thahnem.

          Onesiforas in Paul lunglennak, cauhnak, thinbang le natnak, a tuar laifangah tha thar pe dingin a hawl ih, a pe ngah thei ngaingai. Onesiforas in Paul ziang a tuahsak? Ziang tin a bawm?  Ziangtin a bia ih Paul in cahnak thar a ngah? Bible ah tampi cu a lang lo nan, kan hmuh sunte kan tarlang hnik pei. 

Ngaihtuah

          A pakhat kan hmuh mi cu Onesiforas in a unaupa a thinlung taktak in ‘ a ngaihtuah- a ruat’. Hi pa hin Paul tha thar a pek leuhleuhzia Paulih cangan mi in kan thei thei. “ thathar i pe leuhleuh’ ( 2 Tim. 1:16). Mi pakhat in bawm tul mi a bawm tikah ‘ a ngaihtuahzia’ a lang hmaisa. Mitul mi, bawm tul mi, tha pek tul mi, vawi hnih khat cu kan bawm in tha kan pe tla a si men ding. Onesiforas cun tha thar a pe leuhleuh.

          Onesiforas cun Rom a thlen hlanpi in midang bawmnak hna a tuan rero. Paul in Timothy hnenah hitin a theihter, “ … cu le Efesa khua ah ziangtluk in ka hrangah hna a tuan ti khal fiangtein na theih mi a si” ( 2 Tim. 1:18). Amah lawng si loin an sungkua in midang bawm le thapek hna hi an tuan a si ding. Paul in hitin a ti kha, ‘ Onesiforas cun vawi tampi ka thin i nuamter, tha thar i pek leuhleuh ruangah a Bawipa in a zangfahnak cu an innsung sang ah thlenter hramseh” ( 2 Tim.1:18). Onesiforas tei innsang hi anmah khal pakhat le pakhat mi ngaihsakaw an si ih tlunah, an sungkua nun in midang bawm hmang an sizia a lang.

          Mi thazang thar pek rawngbawlnakah ziangtla an tel tile: midang tul mi zingzawi le theihsak, harnak hnuai ih an um laiah a cante ih va bawm, tha mi va pek, an hna an sunzawm theinak ding hrangih thapek le bawm. Zo pawl so bawm tul ding?

  • Kiangkap thil umdan thei lo pawl:
  • Thabang, thinbang le beidawng pawl:
  • Mi lungleng, mi umhar, mi thanau, zohman in in ngaihsak  lo ti ih ruataw pawl:
  • Hmailam umdan ding thei lo pawl:
  • Khawruahharnak a phunphun tawng pawl;

Atlunih kan tarlang mi na siar tikah na thinlung ah zotal an lang maw? Isaiah 40 ah Pathian in tha thar tul pawl a bawm. Elijah cahnak a pek bangin  thilmak khalin Pathian in a cangvai thei. Asilole Onesiforas Paul tha thar petu ih a hman bangin milai khal a hmang thei. Pathian in tha thar mi petu dingah a lo hmang duh a si.

(Visited 37 times, 1 visits today)

Comments

comments

Comments

%d bloggers like this: