Pathian Zum Ngamnak

April 1
Zarhpi Ni

Pathian Zum Ngamnak

Atu tiangah ka hmin in zianghman nan dil dah lo. Dil uh, nan ngah ding; cuticun nan lungawinak cu a kim ding.
– Johan 16:24

Bible Siar Ding: 2 Sansiar 20:15-30

Pathian in kan hrangah khuakhan lairelnak a nei ih cumi cu kanmai’ khuaruah theinak le kan sim theimi pawl hnakin a let tampi’n a nasa sawn. Pathian hnen ihsin thil tumpi a dil ngamtu cu mangbangza in caan saupi sung thluasuah an ngah ding. Thlacamnak thawn Bawi Jesuh hnenah na pan asile Pathian huham cahnak ih thiltithei zia le na thlacamnak a lo theih saktu Bawipa cun, “In dilmi hi zianghman a cang thei lomi a um lo” a lo ti ding. Amah lawng hi “Atu tiang zianghman nan dil lo” ti theitu umsun a si.

Nangmah le nangmah thupi ah na ret aw cia asile zianghman na ti thei lo ding, ziangahtile nangmah le nangmah na kham aw sawn. Tuni ah Pathian cun na nunnak a lo thlengh sak thei ih ahlan ih a rak cang dah kel lomi danglamzet ah na cang thei. Na minung sinak ih khuaruah theinak, na minunglam ih thil na tah daan, nangmai’ cahnak le thiltitheinak, le nangmahlam ih na neihmi cahnah pawl a zate ih a lenglam ah tthawn hlo ttheh aw. Himi hi thil nasazet a si. Thlarau Thianghlim ih baptism le thawtkhumnak in na minung sinak pumhlum cu a kilveng dingih Pathian in a huham cahnak sungah a lo hruai ding.

Tuni hi na hrangah tharthawhnak ni thar a si ti zum aw. Hih lamzin hi nidang ziangtik hman ih na thlen dah lomi a si. Curuangah ni dang ah hmun saang pawl pahtlang in, khawthim khal pahtlang in a lo fehpi ding. Mero cu na parah a um ih na co dingmi thluasuah laksawng a laak ding ti zum aw. Mero pawl cu ttih hlah aw, annih cu leitlun thil pawl an si. Leitlun thil cu ziangtik hmanah ttih hrimhrim hlah. Nang cu a saangmi nunram ih tlangleng mi na si zo; vanlam huham cotu na si zo ih thlarau daan in nungtu na si. Pathian in a saannak hmun ah a lo hruai ding a si.

Thusuhnak tampi tuah ding hi phaang hrimhrim hlah, Pathian cu A hnen ihsin thil tumpi na dil tikah Pathian a lung a awi.

@ Smith Wigglesworth

(Visited 19 times, 1 visits today)

Comments

comments

Comments

%d bloggers like this: