Pathian Thu Sungih Nunnak

March 17
Zarhte Ni

Pathian Thu Sungih Nunnak

Hih Pathian ih lamzin cu a famkim a si; Bawipa ih thutiamnak cu rintlak a si! A hnenih beunak a hawltu hrangah Amah cu raalphaw a si.
– Saam 18:30

Bible Siar Ding: Saam 119:9-28

Jesuh Khrih zumtu an karhzai thok hrawngah dungthluntu 12 pawl in thil umtu daan zoh in thuhrisahcatnak felfai an neih a ttul caan a thleng. Cumi cu ziang a si tile dungthluntu pawl rori in mipi ih tisa daan ih an poittulnak ziangkim ngaihtuah le tawlrel sak loin annih cu thlacamnak le Thuthangtha simnak in an tikcu caan zate hmang dingah a si. Pathian hnattuantu zate hrangah catbaang lo ih thlacam ringring ding le Pathian Thutak cat loin simzirh le phuan ding cu ziangtluk in so a thupit? Ka thlennak hmuntin le kan tonmi mikip hnenah Pathian Thunung sim le hlawm thei dingin Bible keng fekfek in thuthangtha sim dingah ka timtuah cia aw ringring.

Zokhal thungai thlakin Bible siar le zirzoi in Pathian ih biaknak aw catbaang lo ih ngai le theihnak a neih lo ahcun Pathian sungah a thlarau nun a cak thei lo ding. Pathian ih sinak diktak le a huham cahnak cu Pathian Thu sungih na ciahpil awk taktak lo ahcun thukzet in na pur baan in na thei thei lo ding. Bible cu zing ah, sun ah le zaan ah, tikcu caan ttha na ngah tik pohpoh ah thinlung takin siar ringring aw. Rawl na ei ttheh tinte’n a tthahnem ttangkai lemlomi thu ttukttak reltlang rero hnakin Bible malte tal siar duak ringring sawn awla thlacamnak in na tikcu caan neihmi manneizet in hman zuam aw. Khuitawk hmun le ram ih ka thlen khalah himi cu ka ti daan kel a si ringring.

Saam Cangantu in thinlung takte in Pathian Thu sungih a thup awk zia le cuti’n a thinlung in Bawipa hnenih sualnak a tuah pang lonak dingih a raalrin zia le Pathian Thu a thinlung sungih a khum zia a sim (Saam 119:11). Na thinlung sungah Pathian Thu tam deuhdeuh in a khat asile nun thianghlim teih nun a ol deuhdeuh ti na fiang ko ding. Saam Cangantu in, “Ka vansaan caan hmanah i hnemtu a si; ziangahtile Na thutiam in nunnak i pek,” a ti (Saam 119:50). Pathian Ttongkam na cosaan le ve te’n na taksa ruangpum cu nunnak thar in a nung dingih thlarau, thinlung, taksa daan ah na cak deuhdeuh ding. Pathian Thu nung cu thinlung tangdornak thawn na siar ih na cosaan tikah na sunglam nun ah na zumnak a cak sinsin zia na thei ding (James 1:21). Pathian Thu Bible ihsin thlarau kumkhua nunnak na co ngah a si.

Bible sungah nun thianghlimnak ka tong ngah ih lei tisami sinak a tel lo. Curuangah leitlun ah ka nung asile lei tisami ka si; cuvekin khatlam kapah, Bible sungah ka nung asile mi thianghlim ah ka cang.

@ Smith Wigglesworth

(Visited 33 times, 1 visits today)

Comments

comments

Comments

%d bloggers like this: