Pathian Theih ih Hlawknak

Timothy Sui Lian Mang

Cang Hril: “Pathian hnenah tuhlutawk aw, cule amah thawn remaw uh; cuti asile neihnunnak na hnenah a ra ding.” (Job 22:21)

Pathian kan theih taktak asile ziangvek thilṭha, thlawsuah le hlawknak pawl kan hnenah a ra thleng ding ti cu kan Bible canghril mi Job 22:21-29 in in sim.  Pathian theih ti mi le a thuhla theih menmen ti mi karlakah bangawklonak tumpi a um.  Mi thawng tampi cun amah thei taktak si loin a thuhla lawng an thei. Thluak ih athuhla theihnak men le nun ih tawntehnak ih Pathian theihnak ti a um ih, nunih tawntehnak ih Pathian theihnak ti mi hi athupi mi a si. Ziangtin Pathian kan thei?  Cang 22 le 23 ih “kirsal  tile “cohlan ” ti mi ṭawngfang in a phi in pe.  Vawi khat kan kirsal, asinan cawl loin kan cohlang vivo – cucu peh vivo ding  asi. 6

(1) KIRSAL – (cang 23). Amah hnen ihsin kan rak vakvai (Isa. 53:6; Luk. 15:13), cun kan suahkeh ihsin kan “hlataw tuk cia zo”; curuangah a pakhatnak ih kan ṭul mi cu kirsal le amah thawi remawk,  “naih ko hruai” kha a si (Efe.2:13; 1Pe. 2:25).  Pathian hnenih kirsalnak lamzin pakhat  lawng a um – Isa. 55:6-7 kha zoh aw.

(2) COHLAN– (cang 22). Bawipai hnenih kan kirsal hnuah Amah cu   cohlan le kan bulpak rundamtu ih kan rinsan tengteng a ṭul (Joh.  14:6; Heb. 7:25; Thu.3:20). Cule a Dan kan cohlang pei ih a  thupekpawl kan thlun ding a si (Jos.1:8; Joh.14:15, 21).  Cu lawngah  amah cu in rundamtu ti men lawng si loin kan rualpi  (John 15:14-15); in tithianghlimtu  (1Kor.1:30); in cawmtu (Fil.4:19) le in kilhimtu (Jude  24) vekin  amah cu kan thei ding – Amah cu kan ziangkim ih kan    ziangkim vekin kan thei ding (Kol.3:11).

Pathian theihnak  tahfungpawl an um. John 14:9 kha Paul in kum sawmthum rei hnuih a ṭawng mi – Apostol 9:4-6 le Fil.3:10 thawn khaikhin aw.  Pathian kan theihnak tahnak cu a hnen ihsi kan dawnsawn mi in a relcat.  A thu tamdeuh kan cohlan (ngaithla, thlun, nunpi) asile amah tamdeuh kan thei ding.  Cun Pathian theihnak in ziangvek ṭhatnak a thlen ding?  Pathian theih ih a hlawkdanzia cu ziangpawl an si?

1. KAN CAK DEUHDEUH DING

Cang 23-nak in himi hi in sim. ṭawng dangin, amah theihnak in thlarau lamah a cak mi le a harhdam mi ah kan cang ding – Efe.6:10 zoh aw.   Khrih kha na bulpak rundamtu ih na cohlannak in Pathian hnenah na kirsal zo maw? – cule Kol. 2:6-7 le 2Pe. 3:18 zoh aw.   A derthawm mi le thithamalnat tuar khristian si a ṭul nawn lo. Daniel.11:32 mi vek si aw!

2. NASA ZETIN SUAL KAN BUAN THEI DING

Cang 23 in hi thu hi in sim. Kan taksa ruangpi cu Pathian temple (1Ko. 6:19) a si ih, Pathian kan thei  taktak tikah a huat mi sual kha huatpi ve in sual  buan ding kan si – 2Ko.7:1 zoh aw.  Puan zetih Sual thlirtu Khristian cun nai zetin Pathian a thei taktak lo.  Asinan, “Na puanthlam” ti mi khan na taksa ruangpi lawng a sawhkhih lo ih, na inn le na hnaṭuan khal a sawhkhih. Hi mi ‘puanthlampawl’ sungah rinhlelhnak thil tinkim le sual tinkim nasa zetin na buan zo maw?  2San. 29:16-17 zoh awla, Sam 51:6 thawn khaikhin aw.

3. NASA ZETIH LENTER KAN SI DING     

Cang 24 le 25 in hih thu in sim. Cang 25 kha hminsin aw,  “Cungnungbik Pathian cu na sui a si ding;  Amah cu na hrangah sang zet ko an pen mi na ngun a si ding,”  curuangah amah theih cu sui le ngun tam zet thawn lenter mi ah kan hungcang. Kol. 2:9,10 zoh aw!  Zumtu diktak na si ah cun, Pathian-ih ro cotu le khrih-ih ro copitu na si (Rom 8:16-17). Na covo cu nei aw (Obadiah17), cule a famkim mi hnangamdaihnak (John 14:27), lungawinak famkim (John 15:11), thusimnak ih huham (Apo.1:8) le haidaih zangfahnak  (2Ko. 2:9) pawl cu na nun in na tep ding.

4.  AMAH BAWIPA AH KAN LUNG A AWI DING

Cang 26 in hih thu in sim.

Lungawinak ih kan hman mi le kan riah khal in siattertu leitlun thil le reilote sung hrang thilri pawl cu kan tlansan ding a si, cuticun a thleng aw dah lo mi (Heb.13:8) le kan bei in dawngter dah lo ding mi Bawipa ah diremnak nun kan hmungah ding a si. Pathian kan theihngah vekin, a thilpekpawl ah, a rawngbawlnak ah, a biakinn ah le thil dang hmuahhmuah hnak khalin amah ah kan diremnak cu a ṭhang vivo ding! Amah lungawitertu thilpawl tuah duhnak thar kan nei thlang – Sam 37:4  zoh aw.

5. KAN THLACAMNAK A PHI KAN DAWNG DING

Cang 27 in hih thu in sim. Thlacamnak hi zumtu hmuahhmuah ih can ṭha ropi zet a si, a nauta bik hrang khalah; asinan Bible ih theihternak le nun ih tawntehnak ih a langter mi cu nai zetih Pathian theitupawl lawngin an thlacam a phi an ngah ti hi a si – 1Joh.3:22 le 5:14-15 zoh aw.

6. RAH TAM ZET KAN NEI DING

Cang 28 le 29 in hih thu in sim. Nunnak in asilole hmurkaa in Bawipa hrang thutheihpitu miṭangkaizetzetpawl khi Amah a theifiang taktak tupawl an si.

(1) Cang 28 zoh aw.  Pathian kan theifiang taktak ih A zangfahnak zulhih  hna kan ṭuan asile, kan ṭuan mi zianghman  a hloral lo ding- Mar.14:8-   9;1Ko.15:58 le Gal.

(2) Cang 29 zoh aw.  Kan hnaṭuannak rahsuah ding ziangtluk ih sunglawi  thutiamkam so an si! – Sam107:2 le John 3:14-15 zoh aw.

  7. KAN NUNNAK AH PATHIAN MITHMAI THA KAN CO DING

Cang 28 in hih thu in sim:  “Na fehnak lamzin a tleu ding.”  Cumi cun   a thlawsuah, a kaihhruainak le a lungawinak kha a sim duh. Mip. 6:24-26; Sam 90:17; Thf. 4:18 le 10:22 siar aw. Ziangtluk ih thil duhum so an si!

*****

 

Comments

comments

Comments

%d bloggers like this: