Pathian thawn Mahte lawng

January 5
Tlawngkai Nili

Pathian thawn Mahte lawng

Amah lawng a rung taang. Cuih zaan ah mi pakhat in Jacob cu zing khawvang zik tiang a rung buan ciamco.
– Seem. 32:24

Bible Siar Ding: Saam 62:5-63:4

Jacob cu khurkhua ruah theinak caan pek a si. Pathian thawn pawlkom awknak nei dingin amah lawng a um! Ca Thianghlim um daan zirzoi tikah amah lawng a um hlanah thil cangmi a um. A nupi le a fale pawl cu a fehter sung. A tuu, a caw, kalauk, le laak pawl tla a thlah hmaisa. Amah lawng a rung taangtaa.

A caancaan ah nangmah lawng um le taang vekin na ruah awk caan a um ve men ding. Na duh ah duh lo ah Jacob bangin nangmah lawng na um caan a um ding. Jacob cu a nupi pawl in a ai an awh thei lo; a fahniang pawl khal in an ai-awh thei lo; ih a neihmi hlawnthil le sumsaw khal in an bawm thei cuang lo.

Ziangmi in so Jacob cu cuih hmun ah amah lawng, derdai ih thei aw ko a tuah? A liam ciami kum 21 sungah Pathian in a parih zaangfahnak a neihmi: Bethel ah vancung le lei pehzomnak kaililawn le vancungmi pawl a hmuh le Pathian ih awthawm a theihmi tivek pawl kha a vun ciingmang saal. Bawipa in Jacob hnenah, “Na hnenah ka um ding; na fehnak kipah ka lo humhim dingih hih ram ah ka lo kirter saal ding. Ka lo tiamkammi hmuahhmuah hi ka kimter thluh hlan lo ka lo taanta hrimhrim lo ding, ti cu ciing ringring aw,” tiah a ti (Seem. 28:15). Bawipa ih zaangfah lainatnak a thei ringring.

Jacob cu amah lawng a taang. A khuk a bil. Ka mitthlam ah a cuang nasa. Amah lawng. Khua a ruat thok. Vancung kainak kaililawn le vancungmi. Thlacam a thokih a lei a taal thei lo ding ti’n ka ruat. Pathian thawn amah lawng a um tikah thil tampi a thei fiang. Nang tla nangmah lawng Pathian thawn pawlkom awknak nei awla phuanlang awknak na hmu ding. Pathian ih umpinak a thei nain thluasuah cu a co hrih cuang lo.

Jacob in, “I thluasuah lo ahcun ka lo thlah lo ding” a ti (Seem. 32:26). Cutikah Pathian in thluasuah a pek: “Atu thok ihsin na hmin cu Jacob a si nawn lo pei, na hmin cu Israel ti a si pei” a ti (c. 28). Jacob ihsin Israel timi ih thlengh awknak cu khuaruahharza a si. Israel! Ziangtik khal ih nehnak! Atu ahcun Jacob cun a hlawnthil parah, a u Esau parah le leitlun ah nehnak huham a nei thlang. Mi maksak ah a cang zo. A parah sunlawinak Ni a tlaang. Pathian in kannih tla cuti vekin in khaisang ve ding, Jacob bangin Amah thawn lawng tikcu caan kan hman ahcun.

Pathian in minung pawl cu A huham cahnak hmangin thluasuah pek a duh, curuangah kai fek aw; A lo taanta lo ding. Kan fehter asile kanmai’ mawh.

@ Smith Wigglesworth

(Visited 25 times, 1 visits today)

Comments

comments

Comments

%d bloggers like this: