Pathian Relsetupawl le An Netnak

Dr. Timothy Sui Lian MangAdd-Gods-Name

JOHN LENNON (hlasakthiam hminthang):
Amerikan ram thuthar lakhawmtupawl hmaiah ‘Khristiannak’ hi a cem ding, a hloral verver ding. Elawk ttul loin hihi cu ka fiang tuk lawlaw; Jesu hi a ttha, asinan a thukenpawl (subjects) hi atthlakza an si, atu ah cun Jesu hnakin kan lar sawn (1996) tiah a ti. Si e, cuih hnu reiloteah vei ruk meithal ih kah an si ih an rak lar ngai e!!

TANCREDO NEVES (Brazil President):
Presidential campaign an neih laiah vote 500000 ka hmuh a si ahcun, Pathian rori khalin President ka sinak ding ihsin in dirthla thei lo ding a ti. A rēl zat vote cu a hmu taktak. Asinan President tokham ih a to hlanah a khua a sik ih a thi men cu teh!

CASUZA (Brazil-mi hlaphuahthiam, hlasakthiam hminthang):
Canecio (Rio de Janeiro) ih show an neihnak ah kuak a pak khu vauhvo, van lam hawiin pak vauhvo phahin ‘Pathian, hihi cu nangmai hrangah si seh,’ tiah Pathian hmuhsuamnak langternak ah a ti. Kum 32 a ti ah cuap khensar in harsa tukin (zoh harsa zetin- horrible manner) a thi a si kha!

TITANIC LĀWNG SATUPAWL: 
Kha tiih Titanic Lāwngpi an sak ttheh tikah khan thuthar lakhawmtupawl in Titanic Lāwngpi cu ziangtluk hnget le rintlak a si ti thu an suh tikah, “Pathian khalin a pilter thei lo ding,” tiah an sawn. A pil le pil lo cu rel a ttul lo.
(Hih Titanic Lāwngpi an saknak hmun Belfast khawpi, Northern Ireland ah kei khal vei 6 ka va thleng ve dah).

MARILYN MONRO (Zuknung cángthiam hminthang rura kha):
Marilyn Monro kha show an neihnak ah Pathian thuthangttha simtu Evangelist Billy Graham in a va pan ih, Thlarau Thianghlim in a hnenih thuthangttha sim dingin a thlah thu a va sim tikah, “Nan Jesu hi ka ttul ve lo,’ tiah a tisăn men. A hmai zarh ah apartment ah thi-ih sar a si kha!

BON SCOTT (hlasakthiam hminthang):
Amai san laiih Music band lar zet AC/DC singer a si, 1979 ah khan a hla thu ah ‘Don’t stop me; I’m going down all the way, down the highway to Hell’ (I kham hlah uh; Hell lamzinpi ah kan sukthla vivo ding) tiin duhaw zetin mipi hmaiah hla a sak kuahko. Cuih hnu reilote February 19, 1980 ah amai luak a hák ih a thi a si kha!!
Hell lamzinpi ah a sukthla ngaingai ti cu zum lo ding a um lo.

CAMPINAS (2005): 
Brazil ram khaw pakhat Campinas ah kum 2005 ah khan mino rual kawmngaihaw zet, rualpi rual zuri cun falanu an rualnu pakhat cu lengvâk dingin an sawm. An rualnuih nu cu a thin a nuam lo zet, a fanu telin a rualpipawl mawttaw ih lengvâk dingpawl hnenah cun ngaihtuah zetin a fanu mawttaw sungih to zo hnenah cun a va pan ih a bân a kai ih, “Ka fanu, Pathian in lo hruai in lo kilhim hram seh,” tiah a ti.

A fanbu cun, “Pathian cu kan mawttaw dung lam thil phurhnak ih a to dah ti lo, hitawk ah cun tonak a um nawn lo, kan khat zo,” tiah Pathian hmuhsuam le a nu ziangsiar loin a sawn. Nazi pahnih hrawng rei ah an mawttaw cu a accident ih an thi ttheh, an mawttaw khal a parh ttheh. Asinan thilmak zet cu mawttaw dung lamih thil phurhnak pindante kha cu siat riai lo le cutawk ih an phurh mi arti bawmte khal siat riai loin a um. Pathian tonak hmun si-awm tak a si!!

CHRISTINE HEWIT (Jamaican Journalist and entertainer):
“Bible hi cabu ngan mi hmuahhmuah lakah a mumal lo bik a si,” tiah a ti. Kum 2006 ah khan zo a si ti khal theihtheih loin amai mawttaw sungah a kāngrál tariai.

Mi tampi in kan Bawipa Jesu hnakih thiltithei le anih hnakih pawimawh a um lo ti hi an hngilh ttheu. Leitlun ah miropi le thiltithei taktak an suak ih an thisal leh. Zohman thosal an um lo. Kan Bawipa Jesu cu a thi ih, thlan ihsin a thosal ih a nunglan ta. Amah cu sual le hremhmun ihsi in rundam theitu umsŭn a si, a hnen lawngah nunnak le hlawhtlinnak taktak a um.

(Hih hi Christian Outlook sungta laksin mi a si).

(Visited 523 times, 2 visits today)

Comments

comments

Comments

%d bloggers like this: