Pathian In Lai Christian Fellowship (LCF) A Thlawsuah

By- Christinapa

1994 kum ihsin ramleng a si mi Malaysia ah Laimi (Falam) kan rak thleng thawk. 9 May 1999 kum ah Malaysia Falam Pawlkawm (MFP) din a rak si. Pawlkom ih a tumtah bik mi cu pawlkom sungtel harsat tawn tikah bawmawk ton ding a si bik. 24 December, 2002 ah MFP cu Lai Christian Fellowship (LCF) tin mipi lungkimnak thawn a hmin thleng a si. Biaknak / Fellowship kaihhruainak in kan miphun le Pathian ram kauhnak hrang hnatuan duh ruangah a si. Fellowship hruaitu dingah upa 12 hril an si. LCF hmunpi bik khawm awknak cu Putrajaya Ramhnuai Buuk ah neih a rak si. Mi 70-100 tiang khawm awknak ah an rak tel thei.

Pathian in kan thlacamnak in sangih kan hrang tha le rem a timi Rev. Za helh Lo cu 16 March, 2003 ah a ra thleng.Pastor Quater sang in le cui hmun ah 5 October 2003 ihsin Kuala Lumpur ah khawm awknak thawk a si. Jan 4, 2004 ah Biakinn hrangah inn floor pakhat kan sang.

Kan miphun mi tampi Malaysia ah kan thlen tikah lungawinak sumpai innlam ah a kuat tu an um vekin ram picang ah a feh suak mi khal mi tampi an si. Cun kan saduhthatnak ih tel dah lo mi le a ruah khal kan ruah paih lo mi thihhlohnak khal kan tawng.

Malaysia ah kan peng unau sungin in thihsan tu pawl..

1997 1) Khaw Lian ( Taisun)

2003 2) Tawk Nei Khup ( Hmuntha )

3) San Uk ( Sunthla )

4) Nek Nek ( Taungphila)

5) Klang ah ( Stalin ih u a si, a hmin record mi a hlo, sut rero lai )

6) Al Vung ( Tal )

2004 7) Cucuk ( Kalaymyo)

2005 8) Sui Uk ( Thlan Rawn)

9) Tun Zem ( Tanphu )

2006 10) Nawl Za Khim ( Lazio )

11) Lal Ruat Piang ( Hmuntha )

2007 12) Hram Uk ( Ram Thlo )

13) Sui Ceu ( Hmuntha)

14) Kap Za Thang ( Tazakung )

15) Tluang Ngun Sang ( Locawm )

16) Rem Sang ( Bualkhua)

2008 17) Van Hum Lian ( Taungphila)

Himi thihhlohnak cazin hi May, 2008 tiang a si.

Pastor

LCF ah Pastor in tuan saktu pawl

Rev. Za Thelh Lo ….. March 16, 2003 – September 4 2005 (kum 2 le thla 6)

Rev. S Ni Luai …. September 11, 2005 – Dec 31, 2007 (Kum 2 le thla 4 )

Rev. Run Cung Mang …January 18 , 2008 – Tuni tiang.

1.Kan Pastor neih mi pawl in an mah le an tuan caan ah a tha thei bikin mipi in hruai.

2. Harsat kan tawn caan, ahleice in thihhloh kan tawn can ih kan mai Laitong te rori ih ruak vuinak in neih sak tikah kan thin diriam zet. LCF Pastor tuan zotu pawl parah kan lungawi.

LCF ah ram picang ihsin in rak tlawngtu pawl…

1) Pu Thawm Hlei Mang ( 2004 )

2) Siangbawi Dr. Hre Kio ( 2005 )

3) Pu Thawng Hmung (2005)

4) Rev. Thawng Cung (2007)

5) Rev. Van Hnuai Sum ( 2008 )

6) Levi Sap Nei Thang (2005)

7) Steven Rualthankhum (2005)

8) Dr. Run Bik (2006)

9) Dr. Sang Ci ( 2007)

10) Pu Ni Lian (2008)

11) Dr. Mang Cuai (2007)

12) Saya Khoi Lam Thang ( 2004 )

Kawlram ihsin LCF ah Crusade tuah dingah ra tlawng tu pawl..

1) Evan S Tha Nei Fai ( 2007, 2008 )

2) Evan Lal Eng Lian ( 2008 )

2002 ih LCF le tuni LCF

1. Ramhnuai Buuk hnahfa le fikfa lakah Pathian kut cak ih rak dih thok mi a si.

( Pastor pakhat mikhual kan neih mi in ka it that thei lo hnahfa a tam tuk a rak ti dah )

** Tuni ah Biak Innpi RM 4000 lenglo man kan sang thei.

2. Mipum 70-100 kan rak thawk ih ,

** Tuni ah member thawngtel le zarhpi ni ah mi 400 – 500 in biakinn ah kan khawm thei.

3. Buuk ahcun caan zemnak cabupi kan hmang ih

** Tuahcun Bulletin le Hruaitu zarhtin thuthang Pathian thu le theih tul mi kan nei.

LCF rak din thok lai ihsin tuni tiang tlung lo in a um mi pawl..

1. Salai Ro Vel Thang

2. Salai Za Biak Sui

3. Salai Hmun Li Luai

4. Pa Ngun Hre Luai

5. Thomas Pathuam

September 2005 ah LCF mipi cu khaltu neilo Tuurual vekin kan vakvai. Khawmnak ding biakinn hawl in kan vansang, culai ah kan Pathian in in rak thlahthlam lo kan hrangah a tha bik khawkhannak a rak nei.. Francis Lal Uk in hitin bezai in a rak ngan…

Maw LCF

LCF cu bawm tu hawl in a tawi!

A duhdawt mi pawl in an dung tun,

A rinsan mi pawl in an phat san!

A hlan ah cun a rah an ei, a par antlan nan , attek an khiah sak,

Thlisia a hrang ih a buuk a siat,

Um nak ding neilo in.

A fano pawl cu rilrawng in an tap,

Nu neilo ar fano bangin

Zan khua a tlai, tlun nak ding inn an neilo!

Ningttih le thlaphang in an vak, kiosa hrang lak ah!

LCF cu bomnak dilin a au,

A aw an thei nan an hnih san men!

Mitthli for cing in atawi ko, mi phun dang lakah;

A ban tha a cem,A khuk a thia,A ke a kal thei nawn lo,

Culaifang ah khatlam ralin awthawng a thang

“Maw LCF na harnak ka hmu ih, na au aw khal ka thei,

Kei mah lawng i rian awla ka thu ngaiaw.

Ka lo tung ding sal dingih,na hlo ral dah lo ding

Sunloihnak na co sal dingih mi ih porh mi na si ding!

Na miphun in na par an tlan sal ding ih, na daihnem ah mi tampi

an cawl ding.

Ka thu na ngai asile keimah in kalo uk dingih,

thlaw suah ka lo pe ding” ati.

LCF Le Hmailam

1. LCF hi hmailam ah kum ziat tiang a um pei? ( Nang le kei cun ram dang kan thleng ding nan…)

2. LCF in hmailam ah ziangvek vision kan nei? Kumtin upa tuan ve ringring ih vision nei lo hruaitu upa tla kan si pang maw?

3. LCF ah rak khawm in thlarau thazang laktu pawl le LCF Pastor le zumtu pawl ih thlacam sak mi pawl.. LCF le kan miphun zumtu pawl ram dang kan thlen tikah ziangtluk kan thinlung ah kan cingkeng in bawm kan tum?

A netabik ah

1. LCF ziangtik tiang a ding suak vivo ding ti zohman in kan thei lo, asinan kei theihmipakhat ka nei. LCF rak dintu le amai’ kawhhran kil khawitu Pathian cu ziangtik hmanah a cem dah lo ding. Cucu kan biakmi le kan nunnak neitu a si.

2. Vision : : Putra ihsin KL ah khawmnak kan nei ding timi kanrak rel tikah in rak sawisel rero. Mi tampi in kan theithiam lo. Tuni ah hitluk in KL ah kan mipi kan khawm dutdo ding timi kan rak ruat ban lo. ( Kiangkap unau miphun dang zoh in congvaih thiam khal a ttul)

Tuni ah teh LCF in hmailam caan ah a hnatuannak ding hrang kum 1 hrang lawng kan tuah ban.Kum 5 tiang ah ziangtin kan feh ding kum 10 ah ti khal kan ruat dah lo. Tuvek dinhmun in kan feh a sile tuihnu kum 5 ahcun Magazine tha zet pakhat fang kan suah thei men ding? Ka tong mi a na kan ti maw???

3. Ramdang kan feh suak tikah LCF in Pathian hna an tuannak ah ziangmi lungput kan nei ding? Bawm thei kan zuam cio pei uh. Mi hrek khat cu Kawhhran upa tuan ruangah ih teima, Hotu le tuanvo sang deuh kaih ruangah phur fang mi tampi a um theih, kan um ka ti lo, a um theih.

*** LCF kum 6 sung kan fehnak ih ka hmuh suah mi le sawmngiar (Challenge) ka duh mi cu…

1) Pastor le Upa lungrualten mipi hruai ding

2) Kawhhran upa tuan cu Aana ( power ) neihnak a si lo ih, mipi Pathian thaten an biak nak dingah, Pathian an hmuh theinak dingah siahhlawh dinhmun in hnatuantu ding a si.

3) Kawhhran upa cun Pastor hnatuan bawmtu kan si ti khal theih ding. ( Malaysia ah Kawhhran upa lawng in ziang ngaingai kan tuan kupkap thei lo ti khal theih a cu thlang) mipi le upa kan zaten in kil khawitu kan zoh that a tul, sawisel lo in kan sim le kan bawm a tul hrimhrim.

4) Pastor in Kawhhran le mipi duhdawtnak, Pathian ttihzahnak thawn Tuu rual hruai ding.

5) Mipi in hruaitu le Tuu khal Pastor thu ngai in Pathian thangthat le hnatuan.

* Cutivek in kan um thei a si ahcun LCF cu a thangso lo thei lo.

* Hmailam caan ah thlarau hlo kaihnak hmun, Pathian ih hmanmi kawhhran kan si hrimhrimding.

Hitivekin kan tuan tlang ih tangdawr nun kan nei asile Pathian hmin sunlawinak a langnak hmun a si thei ding

Himi ka sim le ka lo sawm mi pawl hi Pathian ih lungkim mi a um asile Pathian in thlawsuahnak in pek sak hramseh.

Lungawi.. Mipi nan zaten hitawk hmun ihsin nan kut ka lo kai…

(May 18, 2008 zarhpi ni ih LCF Biakinn ah mipi hnen ka thucah mi a si )

Comments

comments

Comments

%d bloggers like this: