Pathian In Ciarbek Thawn

November 18

Tlawngkai Nithum

 

Pathian In Ciarbek Thawn

Hna A Tuan

 

Siar:

Seemtirnak 2:1-7

 

Cun Bawipa Pathian in leidip a laak ih milai ah a tuah.

A hnar sungah nunnak thaw a vun thawt ih minung ah a cang.    –Seem. 2:7

 

Kumkhat Sung Baibal:

–   Ezkiel 8-10

–   Hebru 13

 

Kum 1950 hrawngih nganmi thuanthu sungah khuate pakhat ih pacang pali in pakhat le pakhat hnenah an sual an phuang aw. Michelis in, “Ziangti’n Pathian in leitlun ah in nungter hrih si pei? A sersiammi pawl thianfaiter dingin ziangruangah in that lo sipei?” a ti. Pakhat pa in, “Pathian cu beel tuahtu a siih leidip le ciarbek thawn hna a ttuan,” tiah a sawn.

    

Seemtirnak sungah Pathian in cuti’n a tuah ngaingai. Cungnungbik Sersiamtu in phundang hleice in minung a tuah (Seem.2:7). “A tuah” timi ttongfang ih sim duhmi cu kutzung thiam pakhat in thil a tuah ti a si. Beel tuahtu in ciarbek ihsin beel le kheng phunphun a tuah vekin Pathian in leidip ihsin minung a tuah.

      

Pathian in leidip ihsin a tuahmi milai ih hnar sungah nunnak thaw a vun thawt tikah a nungmi ah a cang. Himi in milai cu thlarau a nei ih Pathian thawn a pawlkom aw thei mi le a hna ttuan theitu a siter.

           

Adam le Eve sualnak ih an tluk hnu ah Pathian in leidip thawn a hnattuan a pehzom. Jesuh Khrih a cohlangtu hmuahhmuah in Pathian thawn pawlkomnak kan neih thei saalnak dingah milai hrangah thi dingin a Fapa a run thlah. A sunlawinak hrangah lungawinak thawn thil ttha tuah dingin kan kut hmang uhsi!

 

A hmuihmel keng in Pathian in milai a tuah,

Leidip ihsin a taksa ruangpi a tuah;

Cuhnak ih mak sawn cu Khrih sungin,

Hrinsaalnak thawn kumkhua nunnak a pek.

 

A baalmi thiangfaiter theitu cu Pathian pakhat lawng a si.

(Visited 26 times, 1 visits today)

Comments

comments

Comments

%d bloggers like this: