Pathian ih Umpinak

October 11
Tlawngkai Nili

Pathian ih Umpinak

Bible Siar Ding: Suah. 32:1-8

Khrih cu hmuh theih lomi Pathian ih hmuihmel langnak a si. Amah cu Fapa tir a si ih sersiammi thil hmuahhmuah hnakin a cungnung a si.
– Kolose 1:15

Israel mipi pawl cu Egypt ram sal taannak sung ihsin an suah hnu a thla thumnak ah Sinai Tlang hmunah an thleng. Cun ni sawm li a rei tikah, Moses cu Bawipa ih hmaika ah tlang parah a um ringring lai. Mipi cu dai te’n an um men thei nawn lo; anmah tlentu le hruaitu Pathian an hmuh thei lo betbet ah an hruaitu Moses le an hmu lo.

An thawh riangmang ih anmah te’n an biak dingah sui pathian lem an mit hmuh dingah an tuah. Sui thawn cawcang zuk an tuah ih an milai tisa mit ih an hmuh thei lomi Pathian can-ai ah Yahweh dinhmun ah an ret (Suah. 32:4-5).

Tuni zumtu kannih pawl in Israel mi pawl ih zuklem pathian an tuahmi le an biakmi hi an palhtuk lawmmam tiah kan mawhthluk rangzet men ding. Sikhalsehla minung ih sinak diktak cu tuni khal ah tampi a thlengh aw thluh hrih cuang lo. Kannih pawl hi nauhak pate, khawthim a ttihtuk ruangah a pa ko ih a ttapmi vek kan si. A pa in, “Ttih hlah, Pathian in a lo umpi, a lo hmu, a lo kilveng ringring” a ti tikah, a fapa te cun, “Kei cu mi pakhatkhat thawn um tlang rori lawng ka duh si,” ti’n a let.

Jesuh Khrih cu hmuh theih lo Pathian kha taksapum rori ih kan hmuh theinak dingah leilung tlunah milai pianzia kengin a rung ttum. A suahnak, leitlun ih a hnattuannak, le a thihnak pawl in Pathian ih sinak mizia kha milai pianzia in a phuanglang.

Kan tisa mit thawn kan hmuh thei tengteng dingah Pathian can-ai ah zianghman tuah ding a ttul hrimhrim lo. Pathian in A Fapa Jesuh kan hnenah a run thlah zo. Leitlun thuanthu tluan ah atak ih a phuanlang awknak: a suahnak, a thihnak le a thawh saalnak pawl in kan ttulmi taktak cu Amah a si zia, thungai te’n kan ti asile Pathian cu kan hnenah a ummi a si zia a langfiangter a si.

Hmuh theih lo Pathian, Fapa Jesuh leitlun ih Na run thlahnak thawngin
Zo na si ti i hmuhtermi parah ka lungawi.

Ziangmi zawn ah ka taksa sinak parah ka hngat aw ttheu,
mit hmuh lo Pathian sawn kha rinsan loin!

@Pennington

(Visited 30 times, 1 visits today)

Comments

comments

Comments

%d bloggers like this: