Pathian Ih Thlawsuahnak Siar Thiamtu Pacquiao

pacq
Tufang leitlun ih Boxing leknak ih milar, WBO welterweight Champion, Philippine mi Manny Pacquiao cun, tufang ih a hlawhtlinnak hi amai cahnak si lo in, Pathian ih zangfahnak ihsin a comi thlawsuahnak a si tiin a sim. Pacquiao cun, “Zianghman a si lomi dinhmun ihsin dinhmun tha le hlawhtlinnak ih mi hruai theitu Pathian a um ti hi leitlumi mipi ih an theih ding ka duh a si. Cumi cu keimah ih nunnak rori khal ah a thlengmi a si. Kei cu zianghman lo dinhmun ih rak um ka si nan, Pathian ih thlawsuahnak ruangah tui ka dinhmun ka thleng thei a si. Pathian hnenah Leiba tumzet ka nei. Tu ih hlawhtlinnak ka ngahmi in petu hi Pathian a si ih, Amah hnen lawngah ziangkim ka hlan a si” tiin a sim.

Leitlun ih kan ngahmi hlawhtlinnak, sumpai, damcahnak le ziangkim ka ngahmi pawl hi, kanmai cahnak le thilti theinak ihsin kan ngahmi ah kan rak ruat pang theu. Tuan thei ding ih damcahnak in petu, tuannak ding hmun in petu le khua in khansaktu hi Pathian lawng a si ti kan hngilh pang theu. Pathian ih thlawsuahnak siar thiamtu ih nunnak ah, Pathian hnenah ziangkim peksalnak nun a thlengsal theu. Pathian cu ziangkim tlun ih Pathian a sinak kan theihfiang ih, tui kan dinhmun in thlentu Pathian a sinak kan theifiang a si ahcun, kan neihmi ziangkim hi Pathian hnenah hlan siangnak thinlung kan nei thei ding.

Pathian hnen ihsin thlawsuahnak kan co ti kan theifiang ahcun, Amai hnenah lungawithu kan sim ringring thei ding. Pathian cu Thlarau lam kan tulmi, kumkhua nunnak in petu a si ( Efesa 2:1-10 ), kan hrang ih ziangkim in remruatsaktu a si ( Rom 8:28 ) ih, nitin thlawsuahnak in petu khal a si (2 Korin 9:8 ). Pathian in kan thlarau hrang kumkhua nunnak in pek tlun ah, nitin kan nunnak ih thlawsuahnak in pekmi pawl ruangah, Pathian cu thangthat lo in um a theih lo. Pathian hi kan hrang ziangkim in remruahsaktu asinak kan theihfiang lo ahcun kan nunnak ah lungawinak ngaingai a um thei lo ding. Curuangah, Manny Pacquiao ih a sim bangin, “Nitin kan nunnak ih thlawsuahnak in petu hi Pathian a si ruangah, A hnenah lungawi thu sim camcin uhsi”

2 Korin 9:8 “Pathian cu nan tulmi hnak ih hlei in A lo pe theitu a si…”

https://www.facebook.com/profile.php?id=333697660148720

(Visited 750 times, 1 visits today)

Comments

comments

Comments

%d bloggers like this: