PATHIAN IH LUNGKIM MI NUNDAN

Ro Khar Thang

Rom. 12: 1-2.

Thuhmai hruai: Minung pawlin nunnak kan nei ciar nan kan nundan cu a bangaw lo zet. Mi ih zohthim tlak, cin ringring mi, duh le ngainat zet mi, mi bawm thei zettu pawl an um lai ah mi siatsuahtu, ruk hmang le mi ih siatnak thu lawng rel nuam ti thei zet tu khal kan si. Cuti asile tu ah kei hi ziangvek nun neitu ka si ti ah mah le mah kan ruataw sal hnik pei. Pathian ih lungkim mi nundan neitu zohthim tlak umsun cu Jesuh lawng a si.

NUNCAN  DAN A PHUNPHUN

1). Mi hrekkhat cu nauhak pawl ih leknak ‘kaileng an dengih a her mi’ vek kan si. Kan cangvai kan herkual rero nan khui tawk hman kan thleng ngaingai lo. Hmun bite sungah kan her kan tlan rero men. Cumi pawl cu bible ih kan hmuh mi Nero ih nunnak vek a si. Mah hrang lawng ruatih a nung mi pawl kan si

2). A hrek cu ‘tlan zuam nak ih tel mi rangcang’ vek kan si. Rinkulh sung lawng ih tlan rero men a si. Mah bulpak hrang le mah sungsang hrang lawng zohtu kan si. Kan inhnen hrang khalah kan nung ban lo. IJoh. 3:17 ah hitin kan hmu: “Milian pakhatin a tlasam zet mi a unau a hmu nan a thinlung ah zianghmanah siar loin a umsan men a si ahcun Pathian ka duhdawt ti-ah ziangtinso a ti thei ding?”

3). Mi thenkhat cu “tikcu nei ih a hrang mi thli” thawn kan bangrep. A tikcu kim tinten mah le fehnak zawn ih feh men mi kan si. Mah ih lamzin a si lo mi ahcun feh tum lo lawlaw. Cuvek pawl cu mah le phunhnam pi hrang lawng, mah le biaknak thu lawng kathaw zetih thlun le reltu pawl kan si.

4). Mi hrekkhat cu ‘thlapi’ thawn kan bangaw. Thlapi cun kan leilungpi ih a hel ih a zoh ih a hmu ringring. Cuvekin mi hrekkhat cun phun le hnam an thliardang cuang lo nan mah le ramsung hrang lawng zohtu an si ih ramdang mi pawl cu zianghman ah an siar lo.

CUTI  ASILE-

Khristian pawlih nuncan dan cu cuvek men lawng cun a tawk lo ding:- Ziangah maw? Phil. 2:4. ‘Nanmah duhnak lawng si loin midang in an hrangah a thupi bikih an ruahmi kha a hmuh zia thiam ve uh’ in ti.

‘Nan thinlung putdan cu Khrih Jesuh ih thinlung putdan vekin siseh’ (Miphun thleidan nak, Biaknak thleidannak, dinhmun sang le niam thleidanawk nak nei riai loin mi kip hnenah duhdawtnak lang ter ding kan si).

HMINSIN:

Thingkung hramkung le pangpar pawlih nunnak dingah leiram tha, tidai le ni eng an tul. Ramsa pawlin an nun theinak dingah hrampi le thing hnahno an tul. Minung pawlin kan nundam theinak dingah, ramsa phunkim le thinghnah, thlaihnah le rah pawl kan tul. Kan thlarau nunnak hrampi le thupi bik ‘Jesuh Khrih’ sungih hram a bun mi nunnak kan tul. Cui nunnak neitu cun a mah hrang, midang hrang, leitlun pumpi hrangah a fimnak, thiamnak, theihnak,cahnak le duhdawtnak thawn a tuan ringring. A neihsiah, sumpai, hlawnthilri hmangin bawmtu, pe suaktu, zemdarhtu a si ringring.

Heb. 10:24. ‘Pakhat le khat zawnruahnak nei uhsi, khat le khat bawmaw in duhdawtnak le thatnak khal langter ton uhsi, “Ni a nai vivo ruangah, kannih cu khat le khat thazang pe aw sinsin ding kan si” (Heb. 10: 25).

Thu kharnak: “Pathian ih duhmi nunnak, tuan tlangnak, peksuahnak, lungrualnak, midang zawnruahnak, neitu le nunsuah pitu kan si theinak dingah ‘Laimi Khristian’ pawl hi Pathian in  in hmang vivo hram seh”. Kan zohthim ding umsun Jesuh Khrih zoh in hmai kan nor vivo cio pei.

(Visited 59 times, 5 visits today)

Comments

comments

Comments

%d bloggers like this: