Pathian Ih Hminkhen

December 3

Tlawngkai Ninga

Pathian Ih Hminkhen

Siar:

Seemtirnak 1:27-31

Pathian in a tuah ciami hmuahhmuah a zoh tikah a ttha ngaingai tiah a ti.   – Seemtirnak 1:31

Kumkhat Sung Baibal:

–   Ezekiel 45-46

–   1 Johan 2

Ka rualpi pawl ih tili kap inn phar parih an tarmi zuk pawl cu tikcu phunphun ih Nitlakzik zawng zuk an rak khawlkhawmmi a si. An mawi ttheh nain a bang awmi an um lo. Zuk pawl ka zoh lai ah rualpi pakhat ih ttongmi ka vun mang saal. “Nitlak caan hi ni nikhat a cem zawngah Pathian ih a mawizetmi hminkhen a si.”

Nitlakzik tinte ah le a danglammi a fale pawl parah Pathian in a hmin a khen. Ka ningkhop thei lomi thil cu ka tonmi minung hmuahmuah hi pakhat le pakhat an dang aw ttheh. Pathian cu thiltuah thiam a si ih pakhat le pakhat kan sinak a bangrep lo, hnihsuahsai thiam, thiltitheinak, awnmawi duh le lek duh kan sinak khal Pathian ih kut zung thiamnak an si.

Jesuh ih taksa ruangpi a simi kawhhran sung khal ah thlarau laksawng dangdang a neitu pawl in Pathian sunlawinak hrangah hna an ttuan tlang thei. “Thlarau laksawng cu a phunphun a um, asinan cuih laksawng pawl hmuahhmuah a petu cu Thlarau Amah lawng a si. Bawipai’ hnattuan hi a phunphun a um, asinan kan renmi Bawipa cu Amah pakhat lawng a si. Hnattuan theinak hi a phunphun a um, asinan a petu cu Pathian amah thotho a si” (1 Korin. 12:4-6).

Amahte a ummi thil pawl parih a langmi Pathian ih hminkhen cu a minung pawl par khal ah a lang. A fale zate a danglamtertu dang awknak pawl hrangah lungawi uhsi!   – Cindy Hess Kasper

Jesuh sungah kan zate in kan bangrep,

Ziangahtile Pathian ih Thlarau in pumkhat ah in tuah;

Pathat le pakhat kan upat awk tikah,

Pathian Fapa sunlawinak kan pe. – Fitzhugh

A sersiammi thil pawl parah Pathian ih hminkhen kan hmu thei.

Comments

comments

Comments

%d bloggers like this: