Pathian Ih Bilmi Cahnah

May 17

Tlawngkai Nikhat

Pathian Ih Bilmi Cahnah

Siar:

Rom 8:22-30

Pathian in kan ttuan ding hrangih a rak timtuah ciami hnattuan ttha ttuantu dingah Khrih Jesuh sungin kannih cu sersiam thar mi kan si. -Efesa 2:10

Kumkhat Sung Baibal:

–   1 Sansiarnak 1-3

–   Johan 5:25-47

Origami timi ttongfang cu ‘cahnah bil’ timi Japan ttongfang ihsin a rami a si ih cahnah bil in vate tivek zuk phunphun tuah a si. Kan dung nai rei lo ah cumi zirnak hmun ah ka kai ve.

Cuih cahnah bil ih zuk phunphun tuah in zirhtu cu Japan mi zumtu Hitoshiro Akehi a si. Zuk phunphun kan billai ah amai’ thu in sim phah. Amah cu unau (11) sungah nautabik a si ih Leitlun Raalpi A veihnihnak (WW-II) sungah a pa a thih ruangah a nu kut ih tthanglian mi a si. Cahnah bilmi vekin an innsang cu a phunphun in a bil aw ih missionary pawl thawn an pehtlai aw ngah ruangah tam sawn cu zumtu ah an ra cang.

Cahnah menmen pakhat thil thar mawizet pakhat ah cangin ka bilmi in Pathian in ziangti’n in tuah in rem ti i ruatter. A pakhatnak ah, kiangkap thil cangmi hmangin A hnenah khukbil dingin in hruai. Cumi hnu ah kan nunnak ih a bil awmi thil pawl hmangin, “A Fapa bangtuk si dingah,” (Rom.8:29) in tuah in rem.

Na ruah lo zawngin nan nunnak a bil aw maw? Kannih cu Jesuh Khrih thawngin Pathian ih sersiam mi kan si (Efesa 2:10) timi kha vun mang saal aw. Zumtu kannih pawl cu a ttheh hrih lomi a kutzung thiamnak kan si ih a Fapa bang sinsin dingin a phunphun ah in bil ih in tuah thei.

Bawipa, Na duhnak bangin siseh,

Beel tuahtu na si, kei sentlung bang;

I tuah i rem aw, Na duhnak bang,

Nangmah kha hngakin ka caan kim seh. – Pollard

Khristian pawl cu Pathian ih tuah le rem rero mi kan si.

(Visited 24 times, 1 visits today)

Comments

comments

Comments

%d bloggers like this: