Pathian Huham in A Kil

March 16
Tlawngkai Ninga

Pathian Huham in A Kil

An hnenih ka umlai ah Nangmah ih i pekmi na hmin ih huham in ka hum hngai.
– John 17:12

Bible Siar Ding: John 17

Leitlun ah khawsia le thlarau sia huham a um, asinan Jesuh ih huham cu khawsia huham zate hnakin a maksak sawn ringring. Leilungtlun ah ttihnungza natnak phun tampi a um, asinan Jesuh cu Damtertu a si. A hrangah ziangvek natnak (case) khal damter a harsa lo. Judah ih Kiosa cun ziangvek ttemttawnnak thirhri khal a catter thluh thei a si. Amah cu ttawnttem mi pawl ruunsuak dingah a ra ih thawngtla pawl zalennak pe dingah a ra a si (Luka 4:18). Amah cu tlennak run keng dingin a ra ih tluksiat hlan ih mifamkim sinak dinhmun ngahter saal dingah a ra a si.

Mi tampi in, “Pathian huham in ziangti’n in kilhim ding?” timi thu theih an duh cio. Amah in na taksa ruangpum a kilkhawi ding. Rundamnak na ngah le vete’n Satan cu na kimvel ah ra in, “Zoh hman! Rundam fa ngaingai na si hrih lo,” ti’n a lo tukforh ding. Satan cu caan hramthok tirlai ihsin mibum hmang a si.

Mi pakhat, a nunnak thuanthu pumhlum hlonfai thluh verver mipa ih thuanthu ka thei. Amah cu khawsia huham in a tuahmawh ih a sinak taktak cu a sung ihsin dawihlo a si. Cupa cu Jesuh hmin in damter saal a si zo nain Khrih ih Thlarau Thianghlim thawn a nun a khatter lo. Bawipa in a lo damter asile Thlarau Thianghlim hnenah zianghman thu letkir loin na um thei hrimhrim lo ding. Cupa cu a nun ih hmunlawng a um ruangah thlarau sia cu a hnenah a ra kir saal ih hmun lawngtermi a hmuh tikah a dang khawsia paruk pawl thawn an ra um hnawh saal. Cumi pa cu a hmaisa dinhmun hnakin a let sarih in a besiat sinsin (Matt. 12:43-45). Zumtu unau, na nunnak sungah Pathian in umnak hmunram nei seh! Thlarau thawn khat aw.

Pathian ih huham cun na sung ihsin ziangtik hmanah a lo suahsan lo ding. Na nunnak sungah thlarau sia a um ahcun Khrih ih thlarau na co thei lo ding. Rundam fa diktak cun kan sunglam nun ihsin theih awknak le mah le mah rin-awknak nei ding kan si. Kannih cu Pathian ih taa kan si, Jesuh thiisen sunglawi thawn leimi Pathian fahniang kan si.

Pathian in A hnenih pantu pawl ih bomnak dilmi pawl tuahsak daan lamzin tampi a nei. Amah in ttemttawnmi hmuahhmuah a tlen. Amah in nangmah cu a lo duhdawttuk ih, “In kawh hlan ihsin ka awi ding” a lo ti (Isaiah 65:24).

Pathian Thutak na tlansan asile Satan in caan ttha a la ding.

@ Smith Wigglesworth

(Visited 30 times, 1 visits today)

Comments

comments

Comments

%d bloggers like this: