Pathian Hrangih Thusim

October 16

Zarhte Ni

Pathian Hrangih Thusim

Siar:

Jeremiah 23:16, 30-40

Kan tuah ttheumi thilthup le ningzakza thil pawl kha kan hlon ttheh ta zo; mi bum in kan nung lo, Pathian ih thuhla khal ah kanmah ih duhzawng in kan merh lo.    -2 Korin. 4:2

Kumkhat Sung Baibal:

–   Isaiah 47-49

1 Thess. 4

Fiangte ih cangan ka zuam rero nain vei khatkhat cu mi in an ruat sual ttheu. Ka thin a nuam lozet ih ttha deuh ih ngan ka zuam. Hmanseh, casiartu pawl in ka tumtahmi le ka sim duhmi thawn pehpar loin a sullam an laak ttheu. Hivek hi ttihnungza a si. Ziangahtile cabu suah hnu ahcun rem saal le a theih nawn lo.

Himi in Pathian ih Ttongkam kan duhduh ih kan laak sualmi nasazet in i ruatter. Jeremiah sanlai profet pawl in cuti’n an rak tuah dah. Anmai’ ttongmi kha “Pathian in a ti,” an ti ih siter an duhmi kha Pathian ih lungkimmi a si an ti. Curuangah Pathian in a mi pawl hnenah, “Profet pawl ih thusimmi cu ngai hlah uh, Keimah ih ttongmi si loin anmai’ ruahnak men an sim a si,” a ti. “Anmah ih phuah copmi thuphan in ka minung pawl cu ziangtik tiang so an hruai sual hrih ding” (Jer. 23:16) a ti. Pathian in, “Bawipa nan Pathian ih Ttongkam merh tahrat in a pingpeng ih a pialtertu pawl cu ka hnong hngai dingih ka hnen ihsin ka hlon hngai ding,” a ti (cc. 36, 39).

Paul in Pathian Ttongkam cu a sia zawngin ka hmang lo (2 Kor. 4:2) a ti. Pathian Thutak sim loin mai’ ruahnak men sim a ttihnunnzia a thei. Kannih khal Pathian  Ttongkam cu kanmai’ duhnak men ih merh si loin Amah ih tumtahnak vekin raalring te’n kan hman a ttul.   – Julie Ackerman Link

Bawipa, Na Ttongkam parah felnak in pe,

Caan khatkhat kan thathawhnak ruangah;

Na Thudik, merh lo dingin in bawm,

Kan duhhamnak ih hruai lo dingin. – Sper

Bible thutak lam ah ttang ding rori kan si,

Bible kha kanmai’ duhnak ah kan merh lo pei.

(Visited 23 times, 1 visits today)

Comments

comments

Comments

%d bloggers like this: