Pathian Dik Hmuhsuahdan Ding

Zirnak 1             PATHIAN DIK HMUHSUAHDAN DING

 Cang Hril: “Israel-pawl cu can reipi sung Pathian dik nei lo, zirhtu puithiam nei lo le dan nei loin an um a si.  Sikhalsehla harsatnak an tawn tikah Pathian, Isreal-ih Pathian hnenah an kirsal.  Bawipa cu an hawlih an tawng ṭheu.” (2Sansiarnak 15:3-4)

Hih Bible zirnak ah hin Hlawhtling Nun Thuthup hrekhat tla kan ruattlang ding.  A si rori, Pathian thei hmaisata loin zohman in a hlawhtling mi nun hram an thawk thei lo ih, ahmaisabik ah kanmai hrang roriah ziangtin Pathian kan thei thei ding ti hi  kan theifiang tengteng a ṭul. 2San.15:1-19 sungah kan rel ding mi  thu a um. Kan Bawipa le Jesu ih Pa a si mi Pathian, Pathian dik pakhat lawng a um (2Ko.1:3) ih, mi pakhat in atu ih a nunnak ah thlawsuah ropi bik a dawn thei mi cu Pathian dik hmuhsuah hi a si, asinan riahsiatumza a si mi cu amah hmungah riai loih nun hmanliam hi a si.  Kan Bible cang hril mi in Israel thuanthu tawite in sim, culawng si loin leitlun pumhuap mipi thu khal a simfiang cih.

1. ANNIH CU PATHIAN DIK NEI LOIN AN RAK UM

  Cang 3- nakin“Can reipi sung” Pathian dik an neih lo thu in sim. Annih cu Pathian nei loin an rak um, – zoh aw Efe. 2:12.  Himi hi tuisan mi tampi “Pathian nei loih an nun zia” khal a langter. Pawihruak can siar lo ah cun an ruahnak ah Pahtian a lut lo lawlaw, an nunnak  in Pathian an hlam dah lo. Pathian a um ti cu Israel mipawl in an rak zum ko, cule a kilkhawinak khal an nunnak rori in an rak tep ih, an ṭhathnempi ko, asinan “Pathian dik tel loin” ziangkim ah an rak um.  Mikip in anmai pathian ciar, “mah le mah pathian, sumsaw pathian, nawmtawlnak pathian, tisa hmuitin pathian,” an rak bia. Curuangah cang 3-nak ih “can reipi sung…Pathian dik tel loin” timi hin mi tampi a sawhkhih a si.

2. ANNIH CU ZIRHTU PUITHIAM NEI LOIN AN RAK UM   

Zirhtu puithiamih ṭuanvo cu mipi hnenih Pathian thutak zirh a si. Tuisun ih zirhtu puithiampawl cu zo an si? Pathian thu rinum zetih simtu le zirhtu pohpoh cu Pathian-ih zirhtu puthiam an si.  Asinan mi tamsawn  cu hih thusimtupawl le zirhtupawl ih ciahnehnak lengah an um; kawhhran ah an khawm lo, asilole cathianghlim simfiangsak mi an ngai duh lo, cule Bible le Pathian thutak simfiangnak cabupawl khal an siar paih lo.  Cumi cun Pathian thilpawl theihlonak ṭihnung le Pathian rundamnak lamzin theih lonak a hringsuak – Efe. 2:8-10 zoh aw.  Mi tampi cu biakinn ih khawm le biaknak sinak cu an tep nan, mi malte lawngin kan Bawipa Jesu Khrih ih phuanlang mi rundamnak lamzin cu an thei- khaikhin aw Joh.14:6; Apo. 4:12 le Rom 1:16.

3. ANNIH CU DAN NEI LOIN AN RAK UM

    Cang 3-nak in himi hi in sim.  Puithiampawl cu Dan kilkhawitu an rak si ih, curuangah puithiam nei lo ih um ti cu dan nei lo ih um tican a si. Cu laiah mi pakhat in Dan thu theih a duh asile puithiam hnenah a feh tengteng a ṭul; asinan tui ni ah cun, Pathian hnenah lungawithu sim aw! Bible sungah a Dan le a ṭawngkam kan nei.  Sikhalsehla, mi tamsawn cun Bible an siar lo, curuangah  annih cu“Dan nei lo an si.” Dan cu ziang a dik, ziang a dik lo ti Pathian-ih tahfung a si.    Asinan, mi tamsawn cun mipi thu theihternak: (1) thuthangca (2) radio (3) zuknung (T.V) (4) baisikup (cinema) sung ihsin an tahfung an la. Cuticun Pathian tahfung cu hnawng tahratin, khawvel tahfung, milai tahfung le khawsia tahfung pawl tla in a ai an awh ruangah kan mipi nuncan ziaza cu a bawrhhlawh deuhdeuh.  Tuini ih kan ṭul zet mi cu tahfung dik, Pathian duhdawtnak le zangfahnak, a Fapa le milai a rundamdan phuanlangnak umsun Bible ih kir hi a si.

4. HARSATNAK A THLEN TIKAH BAWIPAI HNENAH AN KIR          Cang 4-nak in himi hi in sim. Cang 5 le cang 6 ah Pathian an tansan ruangah harsatnak a rak thlen thu kan hmu.  Bawipa an hnawn asile harsatnak cu rampi ah le bulpak nun ah a thleng ringring ding. Harsatnak thlengtertu cu amah Pathian  a si ti kha hminsin aw; cumi cu sual  thu a ṭhensaknak le a hnenih an kirsal theinak dingih a thil tidan a si; cang 6 cem zawngte khan ziangtin a ti ṭhaten zoh aw.  Hivekin tuini ah Pathian in hna a ṭuan maw?  A ṭuan a si! Amai ṭanghma hrangih kum reipi a nungtupa kha Bawipa hnenih kirsal ih, Bawipa a hmuhsuah theinak dingah milai nunnak ah Pathian in harsatnak a thlengter leuhleuh. Fapa tlanhlo kha a pai hnen feh ding a tiar hlanah amah le mah hnenah si a feh hmaisakta(Luk. 15:11-24).  Hi thutak simfiangnak ah “hi bang mipipawl nasazetih nunsim an si tikah Bawipa hnenah an kirsal” thu kan hmuh theinak hmun Sam 106  kha siar aw. Cule ziang a cang ti hminsin aw!

5. PATHIAN DIK AN HMUSUAK

   Cang 4-nak ah Pathian hmuhsuahdan ding ṭawngfang Pathum a um.  Kan tuah tengteng ding mipawl cu:

(1) Sualnak le mah le mah ihsin KIR (1Th.1:9);

(2) Bawipa le a ngaihdamnak HAWL (Isa. 55:6-7) le

(3) Pathian dik HMUHSUAH (2San.15:2, 4 le 15)

Hih khuahlan thuanthu tawite mawi zetin  a cem – “Bawipa cu an hmusuak” (2San.15:4, 15)!  Amah cu na hmusuak zo maw?  Thf. 8:17 kha ṭhaten zoh aw.

*****

Comments

comments

Comments

%d bloggers like this: