Pathian Bangtu Zohman An Um Lo

August 18
Zarhte Ni

Pathian Bangtu Zohman An Um Lo

Bible Siar Ding: Saam 19:1-6

Maw Bawipa, leilung ih khuazing pawl lakah a lo bangtu zoso a um?
Nangmah a lo bangtu zoso a um? Thianhlimnak ah na maksak,
sunlawinak ah ttihnungza, thiltitheinak ah mangbangza. – Suahlannak 15:11

Thilthiamnak (Technology) cun minung ih tuah theimi hnakin rang deuh le cak deuh in ziangkim a thlengh thei. Holywood zuknung sungah ahleice thil cangmi pawl cu a her aw reromi pehtlaihnak pawl ah a rahsuah kan hmu thei.

Cumi cu buainak a si. Technology pawl in kan mang in bangter, ziangahtile ahlan ahcun Pathian lawngin a langter thei ding tiih kan rak ruahmi thil pawl atu ah mangbangza in tontehnak kan nei thei ve thlang. Atu kan san ahcun mifimthiam pawl ih thil thar an sersuaknak pawl ruangah mangbangza, awloksongza le khuaruahharza timi ttongfang hlirin kan nun le kan society ah a khat thluh.

Pathian in lei le van le a sung um ziangtinkim hi zianghman um cio lomi sung ihsin a sersiam. Cule leitlun thil umtu daan hi thilcang kel hnakin danglam deuh le nasa sawn in mangbangza thil a tuah, a cangter ttheu. Thuthimnak ah Tipi sen a tthenternak, kiosa khur sung ihsin Daniel a ruunhimnak, le ngapi pum sungah Jonah nithum sung rori a umternak tivek pawl hi leitlun ih um thei dah kel lo dingmi mangbangza hlir an si.

Asinan hih khuaruahharza thilcangmi kan timi pawl cu Hebru nunau nu fala thianghlim sung ihsin Jesuh Khrih Pathian Fapa a suahnak thu thawn tahtthim cun zianghman an si lo. Leitlun ih khuaruahharza maksakbik cu Pathian rori minung ah a rung cang ih minung lakah rundamnak hna a ttuan timi hi a si.

Mangbangza, khuaruahharza timi ttongfang pawl hi leitlun minung pawl ih thil tuahmi parah si loin a neitu taktak, mangbangza maksak tuahtu Pathian hrangah ret uhsi!

Bawipa Pathian, Nangmah siar lo biak ding tlak Pathian an um lo.
Nangmah lawng hi khuaruahhar Pathian taktak na si.

Tuni ah mangbangza Pathian biaknak ding hrangah
ka tikcu caan ziangzat tiangso a dang te’n ka ret?

@ Ava Pennington

(Visited 29 times, 1 visits today)

Comments

comments

Comments

%d bloggers like this: