Pastor Kapthat

March 9th, 2009.

Surbungtlang Thuthang

US Ralkap Leh South Korea Ralkap  Raldo Zir Tlang

Tuisun ihsin US ralkap leh South Korea ralkap 50,000 hrawngcun March 20,tiang raldo zir tlan nak an nei dingih. Himi ruangah North Korea cu nasazet in a thin a hengih a ralkap pawlcu raldo theicih dingih timtuah awknak nei dingih thu a pekzo thu a puang.  North Korea ram Cozah News Agency cun  US leh South Korae ralkap pawlin raldo zir tlangnak an neih cu  North Korea hrangah cun zoh liammen dingmi thil asilo tiah a tarlang.   North Korea cun Satellite kahsuak a tummi cu mi hrekkhat in rakkah thlak an tum pang a si ah cun  nasazet ih do awknak a suak tengteng ding tiah a simbet. Himi laiah US leh South Korea cun North Korea cu Satellite kahsuak tum suanlam ih hmangih Missile kahsuak tum asi tiah an puhve. Himi boruak ruangah North Korea cun a ram tlun boruakih South Korea Vanzam pawl zuanter a siang nawnlo ih himi cingih North Korea ram tlun boruakih South Korea vanzam a zuang thotho asile North Korea cun a zoh menlo ding a ti. Cu ruangah South Korea cun a Vanzam pawlcu lamzin dang zawhin a zuangter asi.  

UK Ralkap Hmunpi Tapung Pawlin Kap

UK Ralkap hmunpi pawimawh pakhat Massereene Army Base cu Tapung pawlin an kah ruangah ralkap pahnih an thi. Ireland khawpi Dublin ih thuthangca pakhat cun hi UK ralkap hmunpi kaptu Tapung pawlhi  Real IRA Tapung pawl an si  ti ih theihter nak an dawnthu an sim. British Prime Minister Gordon Brown cun himi buainak cu misual pawlih thil timi a si ih himi ruangah rualrem nak leh daihnak hawlih UK Cozah in lamzin a zawh rero laimi cu a cawlhsan cuanglo ding a ti.   Tui Ralkap an kahthat mihi 1997 ih Norht Ireland ih ralkap pakhat Lance Bombadier Stephen Restorich, an kahthat hnuih  IRA Tapung pawlin an kahthat sal hmaisabik a si. Real IRA an timi Tapung pawlhi  1997 October thla ih  Privisional IRA an kuai ihsi dingsalmi pawl an si. Hi an kahthat mi ralkap pahnih hi kum notete an siih  Cozah in Afghanistan ih kuat a tum rero laimi an si. Hi an kahthat mi ralkap hi an hmin anrel langlo ih  Prime Minister Gordon Brown cun North Ireland ih ralkap an kahthat nak hmunpi ah fehin ralkap thi pawlhi Upat nak a pe.

Bangladesh Ralkap Helicopter A Tla

Tuisun ah Bangladesh ralkap Helicopter cu an ram laifang Tangail District ah a tla ih Ralbawi Major General Rafigul Islam, leh ralbawi dang Liuetenant Colonel pakhat an thi ih midang pahnih cu nungdam in an suak. Hi Helicopter hi Tili parah a tla ih minung zianghmuah an to tileh an hmindang pawlcu an rellang hrihlo an tlaknak tili sungih ta cu hawl rero lai an siih Ziang ruangah a tla tikhal thei asi hrihlo.

Japan PM Dingah IChiro Ozawa,A Tling Pei Maw?

Japan ram cun kanhmai Septembar thla ah Parliament hril awknak a nei dingih  himi ah tui Opposition hruaitu IChiro Ozawa, cun an Party cakih Prime Minister si tumin theitawp a suah rero laiih.Himi laiah IChiro Ozawa, hi PM sitheilo dingih dodaltu nasazet an umve ih Japan ram mipi ngaihdan lakkhawm nakah Japan ram mipi a hrek hnakih tamsawn cun IChiro Ozawa, hi Prime Minister dingah an duhlo. Himi an duhlo naksan cu a dungthlun a Chief Secretary hi Politics thu ih sumpai khawnkhawm mi thuhla ah thubuai neiih kaih asiih cumi ruangah Politics dinhmun ah a tlakniam nak asi.     IChiro Ozawa, thungcun himi thu ah thilti diklo mi zanghman a neihlo thu a sim ve ih, A dungthluntu a Chief Secretary parih Cozah thiltuah dan cu thildiklo asi a tive ih Prime Minister si a tumnak cu fehtlang pi vivo a tum thu a sim. Japan ramhi leitlun ram tinkim sumpai dinhmun tla niam rero mi ah ram zia um deuhbik ih ruahmi asi nan tuidin hmunah a talbuai rero ve asi. Tui Prime Minister ttuanlai tu Taro Aso khalhi Japan mipi in an uar tuk lemlo ih. September thla ih an hril awkdingah hin IChiro Ozawa, pawlhi cakdingih zum awbik cu an siih Japan ramhi Politics ah an buai thei zet ih Cozah Upa thleng awknak khal a tamzet ttheu.

Pastor Kap That

Mizan sunah United State ih IIIinois State ih Biak Inn pakhat Maryville ih First Baptish Church ah  mi pakhat Meithal thawn a lutih Biak Inn sungih Pastor Fred Winters cu a vungbia ih cumi hnu ah a Pistol in Pastor pai awm ah a kapih midang kapbet dingin a meithal cu a hmetsal nan a methal a tlawlh ih a namte a phawisalih a mah le a mah a sun aw tiah Palik pawlin an sim. Hi pahi Palik pawlin an kaiih thuhla an sut rero lai a si.

Venezuela Ram Ah Colombia Ralkap Lut Tum

Colombia Defence Minister Juan Manuel Santos, cun an ram TV leh Radio ih thu a simnak ah Colombia ralkap pawlcu misual pawl an dawinak ah a ttuldan ihzir in an ram Inn hnen pawlih ramsung khalah an luhmai a ttul dingtiah a simih. Hi thuhi Venezuela President Hugo Chavez cun  nasazetin a sawiselih Venezuela leh an ram kiangkap pawl hringhro ah a puh. Venezuela President cun Colombia ralkap pawlin an ramsung an lut asi ah cun a dolet nakdingah  Venezuela ralkap pawlcu an kutzam a selo ding a ti.    Colombia ralkap pawlhi nikum khalah  Ecuador ramah an rak lutzo ih cu ruangah an ram pahnih karlakah buainak a rak suakzo. Colombia Defence Minister Santos ih thurel mihi an ram President  Alvaro Uribe khalin in zianghman a relpi lo ruangah a thlawpve asi ding tiah  Venezuela President Hugo Chavez cu a thin a heng sinsinih. Venezuela President Hugu Chevaz cun Colombia Defence Minister Santos cu mi hrawkhrawl, Misan tlailo, Mi ttih hrut,  tiah a sawisel.

Pakistan Ralbawi Bik In President Thu Relfiang Tertum

Pakistan ram Ralbawibik General Ashfaq Parvez Kayani cun  an ram President Asif Ali-Zardari cu  Prime Minister hlun  Nawaz Sharif thawi an karlak buainak thu  March 16 hlanih rel fiangding in a sim. Pakistan ram Politics buainak hi President leh PM hlun karlakih thutampi ummi asi ruangah himi thuhi zamrangih relfel zaanglo asiah cun Ralkap in Cozah nak a lasal peimaw? timi hi Politician pawlih thusuhnak tumbik asi. Islamabad khawpi ih ralbawi pakhat cun General Kayani cu US Cozah in  Pakistan ramih Politics buainak hnawkhnai ringring micu relfel dingah an raksimzo tiah a rel.    General Kayani, hi Inter Services Intelligence (ISI) hotu hlun a siih. Kandung naite ah khan zarh khat camin US ah a tlawngih a tlun veten himi thuhi President hnenah a sim asi. Tui dinhmun ah Pakistan ramhi President maw thuneitu, Ralkap maw thuneitu, Prime Minister maw, thu neitu tikhal hi a fianglo tluk asi, Tapung pawlle nitin an hraang sosang vivo ih rambuai zet asi.

(Visited 77 times, 1 visits today)

Comments

comments

Comments

%d bloggers like this: