PARIS LOVE LOCK (Paris Duhdawtnak Tawh)

1-Paris-323.CR2_

Sen Hngilh Piang

Leitlun ih hmun mawi le hminthang zet French ram khawpi Paris ih thuneitu pawl cun 1 june 2015 ah khan an khawpi sung Seine tiva tlun, Pont des Arts lilawn parih fala le tlangval kawp rual pawlin an duhdawt awk nak langter nak hrangih an thlaih mi “duhdawtnak tawh” pawl cu, a rit tuk thlang ruangah le an thuanthu nei lilawh tiang a siat ter phah ding an phan ruangah an la hlo thluh.

Paris khawpi sungih duhdawtnak tawh thlaih cin le dan hi kum 2008 ihsi rak lar thok in, leitlun khualtlawng pawl hiptu bik lakih pakhat ah a ra cang ih, kumtin leitlun ram dangdang ihsi ra tlawng tu fala le tlangval, nupa tuak thar le nei aw dingih tiamkam aw zo tu pawl cun “kan duhdawt awk nak cu kumkhua in a hmun ding” ti langter nak le tiam kam awknak hrangah Pont des Arts lilawn par ahcun an hmin ngan mi tawh hi an tlaih ih, a tawh tu kha Seine tiva sungah an hlon ta theu.

Asinan, cuti ih an tlaih mi tawh pawl cu million khat zikte a kim thlang ruangah le ton 45 tlukih a rit thlang ruangah an lilawn a siat thluh phangin Paris khawpi thuneitu pawlin hi tawh bawr pawl hi an hlon sak nak a si.

Love Lock (Duhdawtnak Tawh)images (12)

Hi duhdawtnak tawh thuanthu hi a liam zo mi kum 100 lenglo, Leitlun ralpi voi 1 nak lai ih Serbian thuanthu Most Ljubavi (duhdawtnak lilawn) timi, Vrnjacka Banja khua ihsi rak thok mi a si. Hi khua ih tlawngsayamah nu Nada cu Serbian ralkap officer Relja timi thawn an rak duh aw. Kumkhua umtlang dingih thu tiamkam nak an neih hnu ah a mipa Relja hi Greece ramah raldo dingin a feh ih cutawk ahcun ava thlennak Corfu khua ih fala nu pakhat thawn an duh aw.

Cutivek dinhmun a si ruangah Relja le Nada ih neih awk tumnak cu an thulh sal. A fala nu Nada hi a lungleng tuk nak le a tuar natsat tuk ruangah thinlung kuai in tikcucan ziangmaw hnu ah a rung thi. Cui thu ruangah Serbia ram Vrnjacka Banja timi khua ih fala rual pawl cun an duhdawtnak cu Nada vekih a lak men si lo in, humhimnak ding hrangah an hmin le an tlangval pawl ih hmin cu Tawh parah ngan in Nada le Relja an rak ton awk theu nak lilawh parah an va tar (kalh) theu.

Europe ramdang pawl ah Duhdawtnak Tawh kalh cin le dan hi kum 2000 thok lam ihsin a rung lar thok. Hiti ih a rung lar nak san hi hmun khat le khat a bangaw cio lo, tu nai te ih a rung lar thar nak san khal theih fiang a silo. Asinan, Italy ram Rome khawpi sung Ponte Milvio timi lilawn parih duhdawtnak tawh an run tlaih ciamco nak san cu kum 2006 ih Italy cangan thiam Federico Moccia ih ngan mi “I Want You” timi thuanthu, 2007 kumih film ih an run tuah mi ruangah a si.

Tu ahcun leitlun ram tamtak ih tlangval le fala rual pawl cun an duhdawt awk nak langter nakah le kumkhua hrangah tiih tiamkam awk nakah hi duhdawtnak tawh kalh mi cin le dan hi an run hmang lan ta a si.

PONTS-DES-ARTS1

 

(Visited 371 times, 1 visits today)

Comments

comments

Comments

%d bloggers like this: