Papai’ Duh mi Hmeh

Kum 9 ka si lai hrawngah a si. Inn ih arsa kan hmeh ni cu ka lung a awi thei zet ti ka cing lai. Ka nu le pa cozah hnattuan veve an si ruangah, mi neinung innsang vek cun, ni tinte’n arsa kan hmeh thei ve lo. Kei, ka pa le ka nu rawl kan ei tlang tinte’n, papa in ka duh tuk a ti mi ar thla, nunu in ka duh tuk a ti mi a hngawng le a ke, kei ka hrang ahcun a awm tit le a cawn…...

Cumi cu kanmai’ sung lawng ih kan theihthiam mi ttong a si. Leitlun thuhla ka thei tuk hrih lo nan, ka rel leuhleuh ttheu mi cu, ‘nunu le papa an aa tuk. Ar thla le ar hngawng tivek cu a awm tit le cawn tit tluk in an thaw lo’ timi a si. Cuvekin theiawter zet ih ka rel tinte’n papa in, “Ni khatkhat ih pa dinhmun na thlen tikah ar thla na duh leh ding,” in ti ttheu.

Papai’ ttongkam cu ka theihthiam lo vekin a el khal ka el lo. Papa cun ciptei’ rawl tthial ding ih i sim phah in ka kheng ah ar cawn dang pakhat i pe bet ttheu. Kan innsang kimte’n kan nuamawk tuk lai can a si.

Tu ahcun a duh zet mi ar thla le keimah tanta in leitlun ihsin papa a liamnak tla kum 11 a kim thlang.

Papa, lo sim duh mi pakhat ka nei. Na tu te tla kum 3 a kim thlang. Cun, keimah ka nauhak lai bang in papa a duhdawt tuk ih, ar cawn tla a ngaina tuk. Kei tla ar thla duhtu pacang pakhat ka si thlang sokhaw papa!

Pialrang ihsin ni khat te tal ra tlung thei awla cun, kan sungte’n ar cawn hlir a um mi rawl hmeh thawn rawlkho kil tlang ka duh e papa! Na tidan ttheu vekin ka kheng ah ar cawn i retsak lala ding ih maw!

Cumi ni ahcun ar thla ei nawn hlah aw maw papa!

Na fapa

#Gray Cloud ih ngan mi a si.

(Visited 82 times, 1 visits today)

Comments

comments

Comments

%d bloggers like this: