Palestinian Mosolman

December 20, 2008

Surbung Tlang Thuthang

By- Pasum

[  Palestinian Mosolman ralthuam keng Tapung Hamas pawlcun Gaza strip ih Israel thawi kah awk colhnak Ceasefire thutiam thlaruk sung an tuah micu mizanzingah an titawp salthu an puang, Egypt palai nak hnuaiih hi Ceasefire an raktuah mihi Palestinian pawlin Israel ramsungah Rocket an kaplut ringringih Israel khalin Gaza an siim ringring ve ih cu ruang ah Ceasefire tuahbetin umzia aneilo tiah Hamas pawlin an titawp nak si, Himi laiah Israel cun Ceasefire tuahbet a duhthu asimih, Asinan Hamas pawlcun Israel in Gaza a hremnak a thlahdul cuanglo asi ahcun Ceasefire tuahin umzia a neilo tiah ansimve, Israel cun Ceasefire titawp ruangah Gaza strip a phihnak cu ong saldingin thutiam awknak zianghman a neiduh cuanglo, Hamas pawlcun hi Ceasefire neihbet an duhlo naksan an pawl Website ih an tarlan danah Zion mipawlin an thutiam an pahbal ringring ruangah asiih, Zion mipawlin Gaza an kap asiah cun kankap letsal tengteng ding tiah an tarlang, Israel Defence Minister Ehud Barak cun Ceasefire cu ram pahnih rualrem nak leh daih nak a thlenih asinan Hamas pawlin an duhdanin an titawp salih Israel in relthei kanneilo, Asinan Meithal an tipuak leh asiah cun Israel cun a sanlet nakah a kutzam a muanglo ding ati, Himi laiah UN Secretary General Ban Ki-Moon cun Israel leh Palestinian in Ceasefire an titawp cu pawi atithu simin Gaza strip ih do awknak leh buainak a suak ringring cu pawi atithu simin Israel leh Palestinian cun Ceasefire cu an tuah tengteng ding a pawimawh ati, Ban Ki-Moon ih Press Office thupuangtu cun Ban Ki-Moon cun kah awknak a thlengsal asiah cun Israel leh Palestianian mipiin an tuar zet dingih cu ruangah Israel leh Hamas pawlcu Ceasefire tuahsal dingin a nawrsalin cuihlei ah Hamas pawlcu Rocket hmangih Israel kap nawnlo dingin a ngen..

[ Leitlun ram dangdang in bangdingih an nawr rero mi Zimbabwe President Robert Mugabe cun African Union in bangdingih an nawrnak cu sangletin Zimbabwe hi kata asiih ziangtizawng hmanin ka banglo ding ati, Hi thuhi a mai kaihhruai Zanu-PF Party Annual Conference ah relin President Robert Mugabe cun an ramih Opposition party hotu Morgan Tsvangirai cu Prime Minister tuan dingah a sawmsal thukhal asim, Robert Mugabe cun Zimbabwe cu Zimbabwe ram minungta asi ruangah ramdangih sin thuneih duhtu pawl hrangah hmun a umlo ati, Tsvungirai cun a kaihhruai Movement for Democratic Change (MDC) mi 40 lenglo Zanu-PF pawlin an rukhlo mi an suahlo ah cun Robert Mugabe thawi Cozah tuahtlang dingthu ih biakawk nakding ah a telthei lo dingthu asimve, Tui dinhmunah Zimbabwe ram dinhmun hi a tlase zetih sumpai ti le rawl an harsat ih hleiah tihri natnak leng rero in buainak nasazet a thlenbetih hi tihri natnak ih mithi zatcu 1,123 an kimzoih midang 20,896 in himi natnak hi
an tuat rerolai tiah UN cun asim, British Prime Minister Gordon Brown cun Zimbabwe cozah in hi natnak ih a hnattuan dancu umzia a neilo ih ramdangih sin bawmnak zamrang tei kuat an ttul tiah asim, US Assistant Secretary of State for Africans Jendayi Frazer khalin Zimbabwe cozah cu ziang tinkim ah a hlawhsam thluhih President Robert Mugabe cu a bang tengteng ding asi ati..

[ North Korea cun South Korea SPY Agency cu an President Kim Jong Ill tur hmangih thattum ah a puh, Himi dingih South Korea in a fialmi minung pahnih khal North Korea cun a kai ngahzo tiah asimbet, North Korea National TV channel in a simnak ah North Korea hotu Kim Jong Ill that dingah South Korea SPY Agence in a fialmi mipahnih an kaihmi cun North Korea ramsung zohthup thlingthla dingah khawl tthazet leh Kim Jong Ill thah nakding tur tamtak an kengih South Korea ih Training an neihhnu ah tui kumtir ah khan North Korea ah an ra lutthup asi tiah ansim, Asinan South Korea cun himi an puhnak cu thil diklo asiih south Korea in theihpi nak leh hnam hnawih awknak zianghman a neilo tiah asimve, Relzo vekin North Korea hruaitu Kim Jong Ill hi a harhdam naklam a tlaniam zetih mipi hmaih a langsuak lonak khal a rei zetzo, asinan North Korea cun cun an hotu pacu a harhdam nak lam a tthazet tiah an simve ih Factory pakhat ih a fehlai zukkhal tui naite ah an ram
TV ah ti lang asiih BBC cun a ni le thha ngan mi a umlo ruangah ziang tikta asi ti theih fiang asilo tiah asim..

[ Kum 6 sung US in misual ret khawnnak ih a hmanmi Guantanamo Bay ih Delta Detention Camp cu kharsal dingin timtuah awknak an nei rerozo, Hi Camp khar nak dingsan hi Barack Obama in President ih hril tlin kasi ahcun President ka siih sin kum 2 sungah hi Camp hi ka kharsal ding tiih thukam nak a raktuah cia zomi asi ruangah asi, Pentagon thu puangtu Geoff Morreli cun US Defence Secretary Robert Gates ih thupek vekin hi Camp hi khar dingah timtuah asi tiah asim,Leitlun ram tamzetin nasa zetih an sawisel US ram hmel tibal tu bikih ruahmi Guantanamo Bay Detention Camp ahhin thawngtla mining 250 lenglo an umih hipawl lakah 9/11 thuthawi pehpar awmi ziangmaw zat an um.

[ Kum 1994 ih Rwanda ramih miphun hnam tenau nasa zetih thattu pawl hotu Theoneste Bagosora cu International Criminal Tribunal for Rwanda (ICTR) cun thiamlo coterin damsung thawngtla dingin hremnak a pe, Bogosora hi Hutu miphun hruaitu Rwanda ih miphun tenau Tutsi leh Hutu mi thawng tamtak thattu ih hotu a si ruangah thiamlo coter asi a mai thupek nak ruangah Tutsi leh Hutu minung 800,000 tingriat lenglo cu niza sungah thah ansi, Cu ruangah Tanyania ih hithu ngaihtuah tu International Criminal Tribunal for Rwanda (ICTR) cun a mah le ralbawi pathum cu thiamlo coter in hremnak a pe, a thu buaihi ni 409 sung tawlrel asiih a thubuai thawi pehpar awmi ca hnah 30,000 a kimih thutheitu minung 202 khal kawhtel ansi,an mithah dan ti fiangtu 1,600 court ah tarlang asifawnih hithu thawi hnamhnawih awmi thildang 300 nganlut cihbet asi…

[ Kandung karih US President Bush kedam ih dengtu Iraqi Journalist Munatazer al- Zaidi cun a thilti miah a sirawk thu asimsalih a tlunah zangfah nak nei dingin Iraq a cozah cu a dilsal, Iraq Prime Minister Nouri al-Maliki hnen khalah a tlunah zangfah nak neidingin a dil tiah Iraq thu puangtu cun asim, Culaiah Arab Mosolman ram mitampiin Munatazer al- Zaidi hi an rak ngaisang zetih a suahthei nakdingah mitam zetin lamzin an rak zawh rero, Saudi Arabia ramih Mahmed Makhafa kum 60 micun Bush dennak kedam cu Dollar million 10 ih a leiduh thu asimih hi kedam number 10 hi zalen nak ding khihhmuh tu asiih a thil neihmi hmuahhmuah hnakin a sunglawisawn atithu Al-Arabya TV Website ah a tarlang, Hi kedam hi ka leithei asiah cun ka fa le pawl ka roh ta dingih ka fale pawlin zalennak hminsin nakah ti’n Museum ah an ret lehsin ding tiah asimbet, Mahmed Makhafa cun US cu Foreign policy tilo thildangah huatnak zianghman a neihlo thu khal asim, Himi laiah Iraq parliament
Opposition pawlcun Muntazer al- zaidi an kaih cu nasa zetin an sawiselih Mosolman hotu US dotu pawlkhalin suahdingin Iraq cozah cu an nawr rero..

[ Leitlunih thuthangca larbik ih sal ngammi US ihsi suak Time Magazine cun US president thar Barack Obama cu kum 2008 sungih leitlun milar leh mi ropi bik Person of the year ah a hrilih Obama sangtu ah US Trasury Seretary Henry Paulson cu pahnih nakah a hril, Pathun nakah French President Nicolas Sarkozy asi ih US Republican Vice president Candidate Sarah Palin leh Beijing Olympics ong nakleh kharnak khawm neih Director China mi Zhang Yimou in an sang, Time Magazine hin nikum ahkhan Person of the Year ah Russia President tuih Prime Minister tuantu Vladimir Putin an rak hrilzo…

[ Pakistan Defence Minister Chaudhry Ahmed Mukhtar cun Jaish-e- Mohammad hotu Maulana masood Azhar cu kandung karah Pakistan in a kaihzothu TV palai pakhat hnenah asim zoih, asinan tuah Pakistan foreign Minister Shah Mahmood Qureshi cun Azhar cu an kutsung ih a umlo thu a simsal, India cozah in kaih a cakzetmi Maulana Masood Azhar hicu Pakistan khalin kaih dingih a hawl rero laimi asi ati, Hi Azhar hi tuihlan ah India in a rakkaih thawng a rakthlak zomi asiih 1999 ih India khualtlawng vanzam Afghanistan Kandahar ih hijack a siah khan hi vanzam hijeck mithawn thleng aw ih India in a rak thlaksal mi asi, a suahhnu reilo teah Jaish-e- mahammad a dinih hi ruangah India cozah in Azhar leh misual Underworlddon an timi pahnih Tiger Menon leh Dawood Ibrahim cu an kutah pe dingin India in Pakistan cu a nawr ringring nak asi…

(Visited 64 times, 1 visits today)

Comments

comments

Comments

%d bloggers like this: