Palap

Palap

Tlunzuang le lei bokvak doral,
Hlanlio laiah hrangin a tho.
Hriamnam phunkim, conkiang le thal
Lenin ralramah an rak tlo.

Tlunzuang maw lei bokvak deuh hen?
Palap timi rak rel ve ngai.
Tannak bulce nei ngam lo len,
Mawihhmang menah conkianga sai.

Can a rei cun tlunzuang hrin pawl
Zuangdarh thluh hai nau zai relin;
Hmel-ut, tihhrut palap hrokhrawl,
A tang, “bokvak ka si,” tiin.

Bokvak pawlin a cui’ palap;
A rak si ngai mawi an ziangzoi.
A kaa angin thla a hun zap,
Pawhte le ha a rak nei ngai.

Tikcu, can a rei cun, tlunzuang
Hrinhram pungkhawm a thawngsawm tel,
Bokvak lalram donak hauhruang.
Kulhin nehnak lai an rak rel.
Doral thlen ding can an khiah thlang;
Bokvak lalramah an vun than;
Fehsuak tikcu khua an hun khang;
Bokvak hrin pawl khal an rak man.

Saklam ram ah tlunzuang hrinhram;
Thlanglamah lei bokvak lalram;
Mahtawk pacangtha ngam le ngam,
Hun hlir sawh hai thihnak hriamnam.

Khatlam-khatlam, tan an hun khuar;
Doral lian thawm le vang a ring,
Thih le thih ti’n hliam an hun tuar;
Ramri sirah palap a ding.

mawihmang men ah ralnam a keng,
Tilualo in sunvu a her,
Thinlung neiin a mit a meng;
Pacangtha ngai bang nam a mer.

Doral can a rei cun, bokvak
Phunhnam hmuah dungah an sip thlang;
Palap khal cu tlunzuang sinak.
Thla sau zet thawn zuangin a tlang.

“Hmel-ut,tihhrut palap hrokhrawl,
Tlunzuang si cingin in phatsan,”
Tiin, tlunzuang hrinhram phun pawl,
Palap phunhnam hlo an hei pan.

A ningzakin a tha zaten,
Ramlakah rang zetin a zam.
A inn nuam hman luah ngam lo len
Rimsebik puk sungah a cam.

Sunvang khalah langsuak ngam hlah.
Ramsa tin an thinnom laiah;
A nming zakin ei ding suanrawl,
thim lakah khin zanvar a hawl.

Hmel-ut, tihhrut palap hrokhrawl,
A nehneh lam tangin a pawl.
Can a kim cun zahnak men fang,
zanih rawl hawl menah a cang.

S. Kei Uk

(Visited 52 times, 1 visits today)

Comments

comments

3 Comments

  1. a tha tuke

  2. LZP bezai zuamawknak ih a pakhatnak bezai si’n ka thei.
    A rhyme cu maktak ual!

  3. hlanlai thuhla mi a ngaiter ual…….a

Comments

%d bloggers like this: