PakLawngCuai pa

https://i1.wp.com/www.kollywoodtoday.com/wp-content/uploads/2008/07/father-son-ju14-2008.jpg?resize=400%2C263Ka paih hmin cu Sui Za Lian a si. Ka nile in na pa cu a hmin a phur thei lo an ti ttheu. (A zawnzai ruangah si hmang ding.) Ka pa cu Mang Mang pa te thawn thilkhai thiltthum a ttuan ih thlahlawh 800 a hlawh. Fapa 2 le fanu 1 ih pa a si. Ka pa cu kum 42 ka ti zo a ti aw ih ka nu in le 50 hrawng a si ding a ti. (Zo deuh si lung ding ka harsa zet.)
Ka ruah a har ttheu, ka pa hi Acer pa vek in radio a ngai lo ih Ral Lian Kap pa vekin tla thuthangca a siar lo; Sumte pa bang in a ttuakpar in phawiter dah lo. Khual a tlawng lai khal ka thei dah lo, culeh ka pa ih rualpi hi ka hmu dah lo.
Ka pa hi khawm zuam zet a si nan biakinn ih thu a sim lai leh mipi hmai ih thla a cam lai cu ka hmu dah lo. Kawhhran puai caan ah cun sathat (sungril than) lam ah cu a tel ringring. Sina’n sa cuai thlai ah cu a tel lai ka hmu dah lo.
Khawtlang in siseh, biaknak lam in siseh in leng tikah thuttul leh thlacam dil lungawi thusim ah ka pa a ding dah lo; ka nu lawnglawng si, kan nauhak deuh lai ah cun ka nu a ding zik zawn ah ka pa mithmai a zohta ttheu na’n tu hrawng cu a zohta lai ka hmu tuk nawn lo.

Ka pa cu ka nu bang in mi a kawk dah lo vekin mi lem khal a thiam lo, sina’n ka pa cu huham nei zetmi a si ka ti ngam. Ziangah ti le, sual ka tuahpang can ih a mithmai in siseh, zan ka ningttih can ih a khuhkhuh awn hmanin ka ningttihnak hmuah a dawihlo ttheh. Cu vek pawl ruangah huham a nei ka ti ngamnak a si.
Anet ah, ka pa thuhla thawn pehpar in ka thuhla ka lo sim duh. Kan unau ah ka pa zawn biktu hi keimah ka  si, ka nu nih tla in ti. Ziang ruangah in titu nan um pangah, ka pa ih duh bikmi ankha hang ka in thei; ka u Cincin khal siseh, ka nau Van Bawi Cung khal siseh an in thei lo. Cu ttheh in ka hnabeng a ti ih ka zak tla a kha. Zan ih ttong aa ka hmang. Hi pawl in kan unau lakah ka pa ka zawn bik ka ti theinak a si; in tinak khal a si. A zawn biktu ka si bang in iduh bik ding tin ka ruataw ih a duh biktu tin ka neihaw. Cumi ka neihawnak in ka lungawi ih ka hna a ngam fawn.
Nan zate par ah ka lungawi, cu zat cu ka sim thei tawk si.

Cut’n khat’n Pak Lawng Cuai

(Visited 47 times, 1 visits today)

Comments

comments

Comments

%d bloggers like this: