Pakistan Ram Politics Buai Nak

March 14th, 2009 

Austalia Tipi Thuanthum Ah HongKong Lawng Oil A Bung 

Australia ram Queenslan Tipi thuanthumih Oil leh Chemical Fertilizer phurtu Hongkong lawng cu Thlipi in a nuai ciamco ruangah  Pacifif Adventure ih Oil a phurh mi Tonne 230 thazet leh Chemical Fertilizet Tonne 620 leh thilri dang a phurhmi Tonne 200 lenglo cu a bung tiah theihsuak sal asi.

Hi Lawngih si thil bungmi hi a tirah cun Tonne 20 ihsi 30 lak hrawngfang ih theih asiih, Asinan  tu ah cun tampi asi ti run theisuak sal asi ruangah Tipi sungih ramnung leh minung hrangkhal ah thilpawi leh ttihnung asi tiah theih fiang asi. Cu ruangah tipi kap SunShine Coast Kilometre 60 tiang tidai cu minung hrangah ttihnung hmunih puan asi. 

Hezbollah In Israel Ram PawmLo 

Lebanon ih Islamist Hezbollah Movement hruaitu Hassan Nasrallah, cun ziangtik hmanah Isreal ramcu ramih a pawmtheilo dingthu US Cozah hnenah a sim. America Cozah cun  Lebanon ih Hezbollah leh Palestinian ih Hamas pawl hnenah Israel ramcu ram pakhat ih pawmding in a raksimzo ih. Asinan Hezbollah hotu Hassan Nasrallah, cun Hezbollah a dinsungah cun Israel ram cu rampakhat dinhmun ih an pawmthei dahlo dingthu a simve. 

Himi thu reltlang dingih America Cozah in Cabuai kiltlang dingih a sawmnak khal Hezbollah cun a ral el thlazo tiah an hotupa cun a simbet. Lebanon Parliament ah hin Hezbollah pawlin Member an neihtam sawn ruangah an thurelcat micu Lebanon Cozah thurel cat mivek asi.

Himi laiah UK Cozah cun Hezbollah pawlcu a hranpa tei kawmih thutha relpi beisei nak sangzet a neihthu a sim. kum 2006 ah khan Israel leh Hezbollah pawlhi nasa zetin an rakdo aw ih Hezbollah pawl Minung 1,000 lenglo an rakthi ih  Lebanon ram Beirut khawpi ih Inn tamzet khal Israel pawlin an Bomb siatsak thluhzo ih khami ttumah Israel ralkap 45 lai an rakthi. Himi ruangah Isreal leh US cun Hezbollah pawlcu Misual Tapung Cazin sungah an ret asi. 

Israel Mipi In Cozah Nawr 

Palestinian Tapung Hamas pawlin 2006 kumih an kaihmi Israel Ralkap Gilad Shalit, cu a suahsal theinak dingah cakzetih thu tawlrel dingin Israel mipi cun Cozah annawr rero laiih. Hi Hamas pawlih kaihmi Israel Ralkap Nu le Pa hin  Jerusalem khawpi ih Prime Minister Ehud Olmert, ih umnak Inn kiangah  tipuan zarin umhmun an khuarih, Himi te Nupa Support tu mipi tamzetkhal  an umnak kiangah an pungkhawm laiih. an Ralkap Gilad Shilit ih suah theinak ding Cozah in zamrangin tawlrel seh tiah an au ciamco asi. 

Prime Minister Ehud Olmert, ih umnak Inn zincu an khampit ih Prime Minister hin a tiamkam awknak vekin Hamas pawlih kaihmi Gilad Shalit ih suahnak dingah zamrangih thilti dingah an nawr rerolai. Hi ralkap hi nikum June thla ihsin a thuhla zianghman theihthei nak a umnawnlo ih  Cu ruangah a Nu le Pa cu an fapa hi ralkut ah a thizo asi kemaw tiah an thin a phangzet, Israel  pawlhi miphun dangvek an silo ih Israel minung pakhat te khal ralkutih thlenter hi an ngai pawimawh zetih 2006 kumih Hezbollah pawl an kah kah ciamco nakkhal Hezbollah pawlin Israel minung 2 an hrengih cumi runsuak dingih an do ih Relzo vekin Hezbollah minung 1,000 lenglo leh Israel ralkap 45 lai an thihphah nak asi. 

Pakistan Ram Politics Buai Nak 

America Cozah cun Pakistan ramih Intelligence pawl tumbik Inter Service Intelligence (ISI) pawlih hnatuan dan leh fehdan cu India ramlam thupi bikah ruatlo in  Afghanistan ramri lamih Tapung misual pawl ngai pawimawhih do sawn dingin Pakistan Cozah cu a simih an Ralkap pawlkhal Misual pawl do nakdingah raldo thiambetih Training tha neidingah a simbet.

US Joint Chiefs Of Staff, Admiral Michael Mullen cun Pakistan TV ih an kawm nakih a simnak ah Pakistan Ralbawibik General Ashfaq Pervez kayani khalin Pakistan ramcu Misual leh Tapung pawl lakih a himlo zia a pawm tiah a simih Nikum ihsin Pakistan ramsung hmuntinkim leh khawpi sung laili khalah Bomb puakleh thah awknak leh Do awknak a tamzia hin Pakistan ram tih nun zia leh a ralmuanlo zia a  tilang fiang asi ati. 

Michael Mullen cun Pakistan cu India thawi Do aw dingih timtuah awk leh tathriam awk hnakcun an ram siatsuah tu leh tibuaitu bik misual tapung pawl dosawn dingin a ngen ih (ISI) pawlin Afghanistan ramri ih Tapung pawl a do hmaisalo asi ahcun an hnattuan micun ziangtik hmanah umzia a neilo ding ati.

Michael Mullen cun Pakistan ramsung politics buainak ah hin Ralbawi General Ashfaq Parvez kayani cun ralkap cahnak hmangih thil a ti ding a zumlo thu a sim. General Kayani cu mipi duhdan ih ram Cozah sunlawi zia thei fiang mileh tihzah thiammi asi ruangah  Democracy siatsuah zawngih a fehpi a zumlo thu a simbet. 

Himi laiah Pakistan ram buainak relrem dan ngaihtuah tlang tumin  mizan tlaizet hnuah  President Asif Ali Zardari, leh  Prime Minister hlun Nawaz Sharif, cu tawn awknak an nei tiah theih asiih. Hi an tawnkhawm awknak ah hin Prime Minister Yousuf Raza Gilani, Defence Minister Ahmad Mukhtar, Interior Ministry Adviser, Rehman Malik leh Cozah Uap mi pawimawh dangkhal an telih. an ram Politics buainak Sosang relrem danding lamzin an hawltum tiah theih asi. US leh UK khalin Pakistan ram Politics buainak hi remh thatdan ngaihtuah in an buai nasa zetih  Pakistan ramcu Ralkap Uk nak hnuai ih umsal lo dingin Cozah hotu Upa pawlcu phah niam awdingin an dil rero asi. 

Pakistan Ram ralbawibik General Kayani hi Politics lamih buai lemlo mi asiih mipi duhdan ih rampi Cozah tha neihthei dan duhtu asiih, President hlun  General Parvez Mushrraf in ralkap ihsi a cawlh zikzawngih a mai ai awhtu dingih a hril tami asi. himi laiah Pakistan  Information Minister Sherry Rehman cu Mizan sunah a bangih.

Asinan a bannak hi Prime Minister Yousuf Raza Gilani in a pawmlo tiah theih asi. Information Minister Sherry Rehman hi Prime Minister hlun  Benazir Bhutto thawi rualpi tha aw zetmi an siih.  a bannak sanhi Pakistan Cozah in thuthnagca latu pawl parih an thil timi lungawi lo ruangah asi. Pakistan ramih Urdu News Channel langsar bik Geo News cu an ram Cable TV network lakih sin hlawn asiih.  hi thuhi President Asif Ali Zadari ih thupek mi asi tiah an sim. himi hnute ha Information Minister hi a bangcih asi. 

Tik cu mannei in hmang hram aw!

 

(Visited 39 times, 1 visits today)

Comments

comments

Comments

%d bloggers like this: