Paisa Pianawi Menmen

 

 

June 17 

Tlawngkai Nithum

 

Paisa Pianawi Menmen

 

Siar:

Marka 12:41-44

 

A dungthluntu pawl kha hmunkhat ah a ko ih an hnenah, “Fiangte in ka lo sim: hih farah nuhmei nu in thawhhlawm sannak kuang sungah midang hmuahhmuah hnakin tambik a san a si. –Marka 12:43

 

Kumkhat Sung Baibal:

–   Nehemiah 7-9

–   Tirhthlah 3

 

1987 kum ah Illinois Phunsang tlawng ih tlawngta thar Mike Hayes in a tlawngkainak hrangah danglamzet in sumpai a hawl. Chicago Tribune thuthangca ngantu hminthang pakaht kha, “Mike hrangah pia khat kuat aw,” tiah ngan sak ding in a dil. “Piakhat lawnglawng. Piakhat cu zianghman a si lo a ti. Mikip ih tokheng tang le zial parah piakhat cu a um ding. Cumi lawng ka dil hai. Ca siartu pakhat cio hnen ihsin pia khat lawnglawng,” a ti.

 

America, Mexico, Canada, le Bahama ram ihsin an run kuat ih thla khat a kim hlanah pia 2.3 million a ngah ih netabik ah dollar 28,000 a kim.

 

Paisa pia burpi a kom lo ahcun pia khat cu man a nei lo. Nuhmei nu in pia khat ih a tthen te a pek tikah Jesuh in a upat. “A neihmi hmuahhmuah a pek ttheh,” (Mark 12:44) a ti.

 

Nuhmei nu ih peknak hi zohtthim tlak a si ih dungthluntu pawl le kan hrangah thazaang a si. A neihmi zatein a pek. Cutluk in kan pek siang dah maw? Jesuh in hmin lang lo nuhmei nu ih thu hmang in peknak cu ziangvek a si ti in zirh.

 

Nuhmei nu ih paisa cu pia khat hnak in malsawn hmansehla Pathian hnenah duhdawtnak thawn pekmi cu a man sair cawk lo laksawng a si.

 

Pathian ih faate hmuahhmuah in langter theimi zaangfahnak cu,

A siangzetmi thinlung thawn peknak a si;

Hmanseh len lai ding kan hngak asile,

Pek dah loin kan um taa dah pang ding.

 

Pathian in petu le thinlung a zoh, pekmi le kut a zoh lo.

(Visited 24 times, 1 visits today)

Comments

comments

Comments

%d bloggers like this: