Pa’h Keneh

Single_foot_stepThuan Bil Fahniang
‘Biak Nun Fel’ kum 4 mite a si nan a hmin a pu thei roh. Nauhak thekthawi tha, awka zang veuhvo, mitmen fim kelkite thawn duhthla a la zet. Pa Tuan Hrang cu fapa hminsesawngtu a neih zo ruangah a uangaw siat ih a rualpi lak khalah a porhaw ngaingai. Zeizongza a nun pumhlum a fapa ah a thumaw ti sehla a sual lo ding.

Pa Tuan Hrang cun a fapai’ hmailam hrang duhthu a hon sam. Tlawngkaiter in phunhra tla ong thei sehla ziang lamzin a zawhter ding. Baibal tlawngkaiter bang sehla, hmm… Baibal zirsang pawl khal, Thuthangtha karhzaiter lam hnakin kawhhran pungter ih cukaw na le sirhaw na ih khawsa ruri, a then an si le Pathian thu nunpi lo, mi sisiaunak fangih Baibal thei, vuak thah cawk lo! Cuti asile leitlun fimthiamnak lam kaiter sehla teh. Huiha, hi khal cu thotho. Nu le pai’ neih hmuah cenlak ih miphun le khawtlang hrang sorbawktlak lo, zirsang tiaw, zuri sabah ih talpawl, mangmittokza an tor tuk fawn. Ziang a si khalle keimah bangin hnatuan taima phot in sumpai tampi nei sehla mi hmaizah a co thotho ding, tiin a ruat.

Pa Tuan Hrang hi lothlopa, mah tawkah todelhaw zet a si ih mi so zoh ih zohmi patung kum 40 mi a si. Sakhawmi lemlo, mah um ih um men, mi poitok khal a si lo. Zo khal ngaihsak a neih lo vekin zoi’ thuron pek khal a mamawh lemlo thung. Amahte’n ngal pak men bang a tlang hngualhngo men. ‘Zia’ tha lo a neihmi cu ni khatte hman zu in loin a liamter sual lo. Asinan cutivekih zu a in khalah a langcu dah lo, a thupaw thiam.

Zarhpini, zing khat cu a savun boot a bun ih a suak. A fapa in thlun a tum. A fapa hnenah cun, “Felte, ka khawm ding, inn ah rak um aw maw, nikhua le a dur tuk,” tiin a fehsan. Reilote ah ruahhmai a tla ngaingai. Biak Nun Fel cun a pai’ thawng ken lo a mangsuak ih thawng thawn a hei dum.

Biakinn sung cu mi an rak khat. Sangka ihsin pacang tonak lam cu a mitmei rero nan a pai’ hmel a hmuh lo ruangah lengah a suaksal. Biakinn kotka lamzin leibek ahcun boot keneh hrawpipi a hmu. A pai’ keneh a si ciang! Asinan cui keneh cun biakinn sung lut loin a pial ih hmun dang a pan. A zoi vivo.

Zu dawr ah Pa Tuan Hrang cu zu khawn khat a volh khutkhi ih amahte a hni zuamzo. Hmm… ka fapate cu ka zawlleh ngah riai, ngaingaite tiah cun khawm tivek hi a ninum tuk. Pastor le kawhhran upa pawl in an tlin lomi thu, ning le luak in mi an fah ih ka khop tuk…zu no khat a von tlak tumzawng le zu dawr neitunui’ auaw in a lauter dukdi. “Motorcycle in nauhak an pah. Pa Tuan, na fapate an ti!”

Mipi in an rak hil vialvial. Mipi cu a von kau ih hnar le ka ih thisen luang a fapa a hmuh veten a zurit hmuah a hlo theh, cule safa rak in a rak ciamco. A fapa cun mangmawrau in, “Pa..pa, papa…” tiin a hon hlam. Pa Tuan Hrang in a fapa cu a pom ih, “Felte, hinah ka um,” a von ti. Paih lo cingten a mit a hon meng ih, “Papa, ziahsaw i bum, thawng pe dingin ka lo dum ih biakinn ah le na um fawn lo, na keneh ka zoinak ah motorbuuk in i pah rori sokhaw,” a tong a cemzawngah thidup a hon luak ih cutin a thaw a cem cih! Pa Tuan Hrang mit in khuaram a ting nawn lo, a fapa cu a cawi ih a kiangih thawng se sopropte thawn, Keneh, Pa’h Keneh….

(Visited 98 times, 1 visits today)

Comments

comments

Comments

%d bloggers like this: