PA Hnenih Cakuat

“PA Hnenih Cakuat” – Mai Ronnie Thiang @ Mai Daidim

Falam Christian Fellowship, Singapore (FCFS) hohanak thawn “PA” sunlawihnak ih tawlrelmi “Pa hnenih cakuat” ngan zuamawknak ah 1nk Lawmman ngahtu ih cakuat.
————–

June 17, 2012
(Cawlhni)

Duhdawtmi ka pa,

Kan cung Pathian kilvennakin na dam ding ka beisei. Kei khal Pathian thatnak zarah damin ka tluang zet a si. Ka pa, hitik hihlan ih ka rak theihfianglomi na duhdawtnakpawl tu-ah ka theifiang ruangro. Curuangah, sam theih lo ka parih na neihmi duhdawtnak hrang lungawi thu sim phahin le na parih ka thiltisualmipawl hrang ngaidam dil phahin na hnenah cakuat ka run ngan a si.

Ka pa, a hmaisabikah ka lung a awi tuk ti ka lo sim duh. “Nu thlum, Pa al” timi tongfim ruangah ‘Pa’ hi cu an mi duhdawt a demdeuhin ruah a rak si theu. Asinan, ‘a al’ tel loin zohman rawl kan ei thei lo. Ka pa, nang cu kan innpi ih ‘banthuam’ vek na si. Nang na um lo cun thli le ruah a tlun can ih a tlu ruairo ding mi fang kan si. Kan nauhakte lai ihsin na insang, nupi fanaurual cu inpi sungah buhlum zetin puanhlum tangah in itter hlenhli nan, nangmah sawn cu na fale mi bang kan si ding ruatin hramlak ah pharkhuh hman umlonak ah riakin, fikfa rawl ah hnatuan khung tinkim na tuan. Kan hrangah sunmang tumpi neiin fimthiamnak zir dingin in rak thlah. Mi ih “Miaa pa!” ti hlawh tiangin ka hrang na rak tuar. Ka lung a awi ti lo hi cu sim ding ka thei lo. “Ka fale in in hun cawmsal hai seh ti ruatin tlawng ka kaiter hai lo. Keimah vek si hlah hai seh ti ruatin ka kaiter sawn,” na rak timi tongfangpawl ka hnathlam ah an cam lai.

Ka pa, Sunday School KG ka rak kai lai, zuamawknak ih pakhatnak lawmman ka rak lak laiah lungawinak mithmai thawn ka kutin i rak hruai ih inn thlen tiang hni hiamhiam phahin i hruai. A hmaikum ka zuamsal ih, lawmman zianghman ka ngah lo. Mitthli hal tiamtiam ih ka din laiah, ka hmaiah na ra to ih na zaang parah in kuaithlu. Cuti’n inn thlen tiang i rak paw. Culaiih, “Ka fa, na thiam lo a si hrimhrim lo. Na thiam tuk lawlaw nan na zuampi mipawl in an lo hleih pang men hokhaw. Thinnau hlah, hmaikum le na hun hleih thluhsal ding,” tiih i rak hnemnak awka in tuisun ni tiang thazang ka laknak a si. Ka pa, thinnau le beidawng ih ka um can ah na hnemnak awkam ka ngai ruahro cuang.

Cun maw ka pa, kum hleili (14) ka kim tiang pai’ awka hro vawi khat hman a tawng dahlotu kei cu, ka pi le ka pu ih in sim theumi, “Hlan dan ihsin theidum ruk cu fifir cazin ah an siar lo, haidum ruk lawng khawtlang tiang an thlen Fheu,” timi sirhsanin kan lo lutei’ theidum ka rak lawh laiah, ziang thusuhnak kam khat hman nei riai loin fungfek thawn i rak thawi kha na mang lai maw? Na ka ti tuk lawmmam ih ‘Ka pa’ ti hmanin lo ko duh loin ni khat pumhlum ka can ka rak hmanmi kha atu ah hi ca sungin na ngaidamnak ka run lo dil. Ka hmailam hrang nun i zirh ti ka rak theih lo ruangah a si. “Arti pum khat rutu cun caw khal a ru leh ding” timi ‘Italy’ thufim ka siar ihsin ziangruangah theidum fir ruangah fanu kum 14 mi ka pai’ thawi ka hlawh ti ka fiangsal. Ka lung a awi tuk maw, ka pa!

Ka pa, nang cu ka nu vekin kan kiangnai umin a cawp le cilhin thu in sim dah lo. Insang hrang tuankhung hmuah tuantu na si vekin in khurhawm lo can a tam. Asinan, in duhdawtnak hi na tuahnak hlirin na langter sawn. Ka pa, nangmah vek ‘Pa’ ka rak neih hi cu leilungtlun ih mivanthabik ka si. Nangmah ruangah tuisun ka dinhmun ka thleng. Ka lungawi tuk ti’n le na parih ka thilti sualmi hrang ngaidam dil phahin hi ca sungin sunlawih-upatnak ka run lo pe a si. Ka pa, ka parih na duhdawtnak cu ka lo sam thei dah lo ding. Bawipai’ malsawm dawngin damcahnak thawn na nunkhua sau hram seh tiin thlaza sawn ka lo camsak. Ka pa, ka hrang na neihmi sunmang tipitlintu ka si thei lo hmanah na mitthli tlatertu fanu si nawn lo dingin ka zuam ding.

Ka pa, ka lungawinak thu cu sim le rel cawk ding rual a si lo. Ca khalin ngan cawk ding a si lo ruangah, in kaihhruaidan, nun in khihhmuhdan ihsin thawk ziangtinkim parah, ‘Ka Lungawi Tuk’ tiin le ‘Ka Pa, Ka Lo Duh Tuk’ tiin ka cangan ka cawl ta hrih ding.

Dam le tluangte’n kan tawnawksal ding hngakhlap phahin…..

Na duhdawt zetmi le a lo duhdawt zettu na fanu,

Mai Ronnie Thiang
Singapore — with Ronnie Thiang.

Comments

comments

One Comment

  1. Kap Hlei Mang says:

    A tha tuk, Tu lawngah zoh nak cang ka thiam cu ka tlai tuk in ka thei aw.

Comments

%d bloggers like this: