Osama Bin Laden In Somalia Ram President Duhlo

i l 

Israel Ram Politics Din Hmun 

Relzo vekin Israel ram Parliament Seat 120 umnak Feb, 10th, 2009 ih an hrilawk nakcu tutiang Cozah thar a dingsuak thei hrihlo ih. Israel Prime Minister siding ih ruahmi Likud Party hruaitu Benjamin Natanyahu, cun President Shimon Peres cu tawngsalin a mai kaihhruai mi sungah Labour Party cu Cozah tuahnak ah an hminhman a tumthu asim. Israel ram danpi vek asile tuah hin Cozah thar dinsuak zoding an si nan Party dangdang kawmkhawm awih Cozah tuahding an si ruangah politics buainak tamzet a umih tutiang an tuahsuak thei hrihlo nak a si. 

Banjamin Natanyahu hin Labour Party pawl a tuanpi betih Cozah nak a tuahthei cuanglo asi len Kawisurut Party in Cozah tuah a tumve thungding ih cumi khalih a hlawhsam thotho asi ah cun hrilawk salhman a ttulsal dingih zum asi. Feb, 10th ih an hrilawk ah khan Kadima Party cu Likud Party hnakin Seat hmutam sawn asi nan  Party tenau dangin  Kadima Party hrauitu Tzipi Livni, hnakin Likud Party hruaitu Banjamin Natanyahu thlawptu an tamsawn ruangah Benjamin Natanyahu kha Cozah tuahtu dingih President Shimon Peres in a sawmnak asi. 

Osama  Bin Laden In Somalia Ram President Duhlo 

Al-Qaida hotupa Osama Bin Laden ih thusimmi Internet ih an tarlang miih a langdanah. Osama Bin Laden cun Somalia ramih  Mosolman biaknak thluntu ralthuamkeng Champions Of Somalia an timi pawlhnenah Somalia ram President, Sharif Sheikh Ahmed, cu hlawnthla dingin a cah.

Osama Bin Laden cun Somalia ram President cu Mosolman sakhua thinglung nei taktak lomi asi ruangah Arab ramdang President pawl vekin Mosolman biaknak dotu pawlhrangih mirin umzet an si ati.

Osama Bin Laden cun Arab ram hruaitu pawlcu Israel thawi ttangtlangih  Mosolman biaknak nekcep vivo tumah a puh. Bin Laden cun Palestinian ramthar dindingah Mosolman sakhua betu pawlcu ttangtlangih  do awknak thianghlim thawi hmainawr vivo dingah a cahbet. 

Pakistan Ralkap Leh Taleban Pawl Kap Aw 

Pakistan TV  News Channel pawlin an simnakah Pakistan ram Frontier Province, Lavi Kontal khua ih Pakistan ralkap Camp cu Taleban pawlin Missile in an kapih Pakistan ralkap pawlin an kaplet salve ih Minung 8 an thiih midang 30 lenglo in hriamhma an tuar tiah an tarlang.

Taleban Tapung pawlhin himi khua ih hlei ah Traibal pawlih umnak hmun  Landi Kotal Bazar, Khoga Khel leh Gagral pawlkhal  Missile in an kapbet ih Pakistan ralkap pawlkhal in nasa zetin an kapve ih tukhal ah an kapaw rero lai tiah an sim. 

CIA Hotupa India Tlawng 

United State ih Central Intelligence Agency (CIA) Director Leon Panetta cu India ram tlawngin tihni sunah New Delhi khawpi a thlengih. India ram Home Minister

P Chidambaram thawn an kawmaw cih ih Tapung le misual pawl Do tlangdan ding leh Pakistan ram buainak thu pawl an reltlang ih theih asi. Hi hruaitu mipawimawh pahnih hin misual do nakah India leh US cu tangtlang vivo dingin leh lehhnu tiangkhal ah lamzin kausawn ih ttangtlang vivo dingin an reltlang. 

(CIA) hotupa hin Home Minister a tawnhnu ah  Intelligence hotu Rajiv Mathur,  National Security Adviser M K Narayanan leh RAW hotu K C Verma pawlkhal a kawmci ih.

Himi pawimawh dangpawl thaw khalin  Pakistan ram leh Afghanistan ramih misual pawl do tlang danding an reltlang. (CIA) hotupa Leon Panetta hin India ihsin Pakistan a pansal dingih. Pakistan ram hruaitu mi pawimawh pawl a kawmsal dingih an ramih misual pawl do cimit dandinga relpi dingah zum asi. Nikum Nov,26 ih misual pawlin Mumbai khawpi an siim hnuih sin US Intelligence hotu pawlhin India ramhi an tlawngrero ih  Kandung December thla khalah khan  National Intelligence Director John Michel McConnell cu India ah a tlawng zo ih. FBI hotu khalin tuithla tir ah khan a rak tlawngzo asi. 

North Korea In US Journalist Pahnih Kai

South Korea TV leh Thuthangca pawlin an tarlang nakah Tuikar tlawngkai nihnih ni ah khan US Journalist nunau pahnih cu North Korea leh China ramri China ramsungih tacu North Korea ralkap pawlin  China thawi an ramti Tumen tiva cu kaan in an vakaai tiah an sim. An kaih naksan hi hi Journalist nunau pahnih hin North Korea ramcu an siannak la hmaisa talo in an zuk ruangah a si tiah an simbet. 

Tui dinhmunah US leh North Korea ram karlak cu a khingkuai tumzetih.  North Korea in Rocket Satellite kahsuak a tummi cu US cun Missile kahsuak a tummi phenter tu ih hman a tum asi tiah nasa zetin  a sawisel.Asinan North Korea cun himi Rocketb kahsuak a tummi cu vansang biakawknak ih hmandingmi asi tiah a simve.

World Food Programme cun North Korea ih mipi rethei pawlcu a lakih tirawl pekttul mi minung Million 9 hrawng an um asi tiah asimin. Himi laiah North Korea cun a ramsungih mipi retheizet bawmnak petu US nimung pawlleh midang Group 5 laicu an ramih sim a dawisuak thluh ih. Journalist pahnih an kaihnak kiang ramri ah ralkap tamzet a retbet. 

US State Department thupuangtu Robert Wood cun  North Korea cu Missile kahsuak nakdingih  Satellite kahsuak a tum ruangah a ramsungah  ramdang mipawl umter a sinaglo asi ati.Himi laiah China President Hu Jin Tao cun  North Korea cu  Nuclear Programme ruangih buainak relfel tlangdingih Cabuai kiltlangsal dingin a sawm lehsalih.

China President Hu Jin Tao cun North Korea Prime Minister Kim Yong il cu an ram Nuclear buainak sosang vivo relkhawm dingih US, Japan, Russia, China, South Korea, leh an mah North Korea pawl tawmkhawm awknak ah tel tengteng dingin a sawmbet. 

US Cozah In Nuclear Scientist A Q Khan Buaipi  

Pakistan ramih Nuclear Scientist A Q Khan cu Nuclear ralthuam tuahdan thiamnak ram dangdang ih a rakzuar ruangah Pakistan Cozah in kum 5 sung thawng a rakthla hnuah kan dungthla ah khan a suahsal ih.

Hi A Q Khan an suahsal cu US Cozah cun a helhkam zetih zoh thlun ringring a tumthu khal a raksimzo. Cu mihnu ah US Intelligence pawlcun hi Nuclear Scientist A Q Khan hi Nuclear thiamnak ih a sumdawn nak a cemhrihlo tiah  US Congress ah thuthlen salnak a neiih. Cu ruangah Congress Member pakhat Jane harmen cun  A Q Khan hi Nuclear tuahnakih a sumdawnnak a cemhrihlo ruangah US Official pawlin hremnak tuah dingih a duhthu Congress cu a sim. 

Himi laiah US Vice Presideng hlun Dick Cheney cun  Bush ih President laiah khan  A Q Khan leh midang a thurualpi pawlkhal Nuclear ralthuam thiamnak ih an sumdawn nakcu rakti cemsak thluh asizo tiah CNN in an kawmnak ah asim. 

Asian House Homeland Security Intelligence, Information Sharing and Terrorism Rish Assessment Sub, Committee ih Chiarwoman Jane, cun  Vice President hlun Dick Cheney ih thusim micu kazumlo rori asi ati. Jane, cun Ranking Member on The House Intelligence Committee kasi laiah Cozah thuruk ah A Q Khan ih sumdawn nak International Arms Bazar hi a tawplo asi tiah ka hmufiang asi ati. 

Jane, cun A Q Khan ih thurualpi Iran, Libya, North Korea, leh Syria pawl hnenah Nuclear Technology hi an zuar tiah a simih. asnan Libya cun an dawr awknak hi a titawpzo tiah asimih Iran leh North Korea cu A Q Khan ih ruangah ram ttihnung an si lai tiah asim.

 

 

 

Comments

comments

Comments

%d bloggers like this: