ORR, UNHCR Le Chinmi Pawl Ramthar Hmalaknak Dinhmun

Saya No Bual

Thuhmaihruai: USA Refugee hrang hnatuantu Agency tum bik Office of Refugee Resettlement (ORR) consultation cu September ni 19-20, 2012 ah Washington DC Chrytal Moriott hotel ah tuah a si. Hi consultation cu refugee hrang hnatuannak thlir khawm le hmailam ih tuan dan ding pawl relkhawmnak a si. US ram sung States tin ihsin Agency hotu pawl le ORR ih sawmmi community hotu pawl mi 800 lenglo kan kai. Hitum ah Chinmi 5 hrawng kan telih cumi sungah mi 3 cu pastor tuan lai (Rev. Chum Awi le rualpi le kei) kan si. Florida State palai dinhmun  ih sawm ka si vekin tikcu lawng kan neih mi sungah Florida Department of Children and family (DCF) director hruainak in USA President inn pi (White house), State office, Congress hall, Abraham Lincoln memorial building, Washington tower pawl tla a hmun in ka va hmu ngah ih a man hla zet. Hi cosultation ihsin laimi pawl USA ram ih kan dinhmun le kan hmailam ih thil feh dan ding, thansonak hmalaknak pawl tawkfang zet khua i ruat ter.

ORR hnatuannak: ORR tuanvo neitu pawl ih reportnak ihsin 2011-2012 kum khat sungah US ah Refugee 76,000 luh ding tumtah a rak siih mi 54,000 an lut thei ti a si. Himi sungah kawlrammi 16796 kan tel ih ramkhat mi ah a tam bik kan si. Tuikum khal ah Malaysia ih sin 8000-9000 lut ding tumtah a siih a hleice in USA ih innsang thleng cia nei pawl (innsang komaw ding) duhsak an si ding ti a si. Hi a tlun ih tumtah mi zat an luh thei lo nak hi 2010 February thla ih thok mi security check ruang a si ti a si. USA cozah hin ORR refugee hrang  hnatuannak ah kumtin million 200 lenglo budget tuah asiih cumi cu community le agency 100 lenglopawl fehtlang ih tuan a si. Hi agency le community organization ( non profit organization) pawl sungah kawlram mi Karen pawl pawlkom 3, Laimi pawlkom 2 an um ih cumi sungah Falammi ih dinmi organization a um hrih lo cu ziangruangah a si pei ti ruah tlak a si.  Hi consultation tumah hin ORR hotu pawl tongkam ihsin kawlram refugee dinhmun fehdan ding ziangvek a bang vivo pei ti hi kan rak thlir bik mi a si., Meeting thok ih tawkfangah minute 5 sung video piah a siih kawlram karen mino pawl au aw a si, ram dang thleng mi pawl kan ram ra kir sal uh, kan din sal ding ti a si. Hi hin USA cozah thinlung ziang a bang ter pei ti i ruat ter zet.

UNHCR le Chinmi: Malaysia ah Refugee 84,000 hrawng an um laiih 2013 ah hin mi 50006000 hrawng mi thar lak an si ding ti a si. Malaysia UNHCR hnatuannak ah Vietnam pawl hi 1975 ihsin rak lak thok a ih 1996 tiangah mi 240.000 luk ram tha an thlenpi  ti a si.Kan nih Chin mi pawl hi 2001 hrawng ih lak thok kan siih hmailam tikcu hman vivo dan ding cu Malaysia UHNCR le ORR hawiher dan ihsin tawk fang nawn cu a lang a bang. ORR hruaitu pawl ih an simnak ah ORR consultation tum ah hin Awng San Suh Kyi kan tong ti a siih Karen mino pawl au aw thawn ruahkawp tikah le kan kawlram dinhmun zoh in Laimi pawl ih kan refugee lam zin cu nitla lam deuh kan pan maw ti cu ruah cih ding kan nei. Hmalam thu zoh hman ih theih a si lo ih ziang a si hman ah Malaysia le India um mi unau pawl a taang zohman um lo ih kan thlen cio nak dingah thlazacamnak thawn bawm aw cio uh si.

Chinmi le thansonak: Aung San Suhkyi hin tui hlan ihsin a rak tong dah mi cu kan ram inn lo thansannak hrangah kum 10 lawng kan tulih fimthiamnak lam(education) ih tungding sal aw ding cun kum 50 kan tul ti a si. Curuangah kan miphun thangso ding cun zirnak lam ah napin tan kan lak cio a tul, Tui dinhmun ah USA ih Chinmi mino pawl lakah kum khat ih $100,000 tlun ngah pawl hi USA digree sang tha nei mi le small business nei pawl an si kan ti le a sual lo ding. Kan ram a tha vivo a sile US bomnak hmaisa bik cu fimthiamnak lam ih bomnak a si lai ding. US cozah bomnak in kan ram ihsin University tlawngta kan fale pawl tampi an ra thleng lai ding. US laimi biak inn pawlah kawlram university tlawngta pawlin hlarem mawi an sak lai ding. Cutik cu ih kan ram ihsin ca ra zir tlawngta pawl kan bom theinak dingah kan fale pawl US cozah zung tin ih upa tuan tam kan neih a tul, nu le pa pawl in kan kut sungah parttime hnatuannak hmun tampi neih thei ding zuam a tul, Laimi kut sungah campany. factory, restaurant pawl tampi kan rak nei a si le parttime hna awlten an ngah ding.

Tlangkawmanak: Tuitum ORR consultation ah Vietnam mi hruaitu pakhat thawn kan tongaw, ka sut mi cu nan miphun pawl US nan rak thlen pek ah hin nan thawn ciamco ve maw ka ti, asim mi cu “kum 10 sung hi kan thawn aw nasa, hmaisa bik ah factory le sa thahnak, kan mi pawl tamnak hmun, campany ih lakkha tam deuh ngah theinak kan rak pan ciam co, a rei deuh cun kan lak ih mifim hmasa pawl ti dan kan zoh thiam ih small business nei thei nak lawngah kan um thlang, curuangah Vienam pawl hi USA ah mi kut hnuai ih cetzung hnatuan mi nan hmu tuk lo ding” a ti. Chinmi lakah USA um hmasa pawl in an rak sim mi cu US ah cun tumtah(plan) neih ih taima zetih tuan a tul ti a si. Laimi pawl lakah kum 2000 hrawng ih Guam ihsin thleng pawl kan zoh tikah kut sungih $ 200,000 tlun nei ding ih ruah mi deuh pawl hi small business nei ih  taima zet ih tuan pawl an si. US ah cun lakkha ei ih inn le motor tha neih cu mi tlangpi neih theimi a si. Asinan mi bawm thei taktak ding le Pathian hna kaupi ih tuan thei ding cun lakkha ei silo in small business nei a siih hivek lam nei thei dingin lamzin hawl in kan bomawk cio a tul.USA ram cu tumtahnak nei ih taima zet ih tuantu pawl ih hlawhtlinnak ram a si. Kan mah le innsang hrang lawng ih si lo in mitampi bawm theitu, khua le ram hranga tuantu, Pathian ram kauhnak tuantu si dingah Pathian ih sersiam kan si.

Comments

comments

Comments

%d bloggers like this: