Okello Ih Thuanthu, Kan Thuanthu

February 25

Tlawngkai Nithum

 Okello Ih Thuanthu, Kan Thuanthu

 Siar: Luka 5:12-16

Jesuh in a kut in (miphar pa) a tham. – Luka 5:13

Kumkhat Sung Baibal:          Mipum. 12-14          Marka 5:21-43

 Ka rual nu Roxanne cu Olympics lehzuamnak ih thuthang petu a ttuan dah. Washington D.C ah hminthang pawl le Company pawl hrangah hna a ttuan. Kum tampi sung Khrihfa lek thiam hminthang pawl ih thuhla ca a ngan ttheu. Asinain cumi hnattuan cu atuih a ttuanmi Uganda ram ih nauhak pawl Jesuh ih duhdawtnak a pek hngai reromi thawn cu tahtthim ding a um lo lawlaw.

Tikcu caan a hman daan cu: ciarbek lamzin fate in cancer minaa pawl retnak siizung khaan ah a ke in a feh. Siizung a thlen tikah a baan ah hmaa thawn a khat ih a tak a saazet mi nauhak pa Okello a cawi ih cancer siibawi pa hnenah a fehpi ih a tthat deuh hlan sung a kil ringring.

 Kan zohtthim mi Jesuh cu a hnattuan sung hmuahhmuah natnak a tuartu pawl hnenah a caan a hmang, a damter hngai hlei ah Pathian ih duhdawtnak thuthangttha a sim hngai (Luke 7:21-22).

 Kan ttuanmi hna hi ziangtluk a thupi? Kan pumcawmnak le nufa cawmnak hrangah kan hnattuan cu a thupi. Asinain leilung tlun ih harsat tuarnak demdeuh dingin kan bawm theinak a um maw? Roxanne bangin Uganda ahcun kan feh thei lo men ding. Hmanseh mi pakhat tal bom theinak lamzin kan hawl thei. Zo ih nunnak ah so thil lamdang na tuah ding?

                                                                            A duhdawtnak langtertu ah Pathian in hman in duh,

Thinhar le beidong mi pawl hnenah;

Zaangfahnak thawn kan tuahmi thil pawl in lamzin a ong,

Pathian le A kilvennak sim thei dingin.

 

Jesuh kan bangnak tahfung pakhat cu,

midang ih tuarnak kan theithiam saknak hi a si.

 

Comments

comments

Comments

%d bloggers like this: