Obama Thah Tumtu Tam

Australia Palik In Misual Kai 

Mizanah Australia palik pawlin Melbourn khawpi ah, Sydned khaw hnarih um ralkap hmunpi Holsworthy Barracks thihcilh bomb hmangih puah tumtu minung 4 an kai. Hi misual pawlhi Australia rammi sinak neizo Somalia leh Lebanon ramih suakmi an siih, Ralkap 400 hrawng leh Palik pawlin hi misual pawlhi thla 7 sung an umdan leh an thilti tummi pawl an zingzoi hnuah  ralkap hmunpi bomb siat thluh an tumnak thilri bomb leh meithal pawl 19 hrawng thawn Palik pawlin Melbourn khawpiah an kai a si. 

Palik pawlin an simnak ah  hi misual pawlhi Somalia ramih thilsual tizo tu sualnak tum pipi rakneizo an siih tuah hin Australia ralkap a tam theibik ih thah an tum lala tiah an sim. Australia Prime MInister,  Kevin Rudd cun  an ramsungih  misual pawl an kaih ngah miih sin Australia ram mipi pawlin misual Tapung pawl donakih  lungrual leh ttantlang a tulzia an thih fiang a duhthu a sim. Hi an kaih ngahmi misual pawlhi Somalia ram Cozah hlawnthlak tumtu  Al-Shabab Tapung pawlthaw khalin sihcih awknak hngetzet neimi an si tiah Palik pawlcun an sim bet. 

North Korea Ah Bill Clinton A Tlawng 

Tuikum March ni 17 ih North Korea ralkap pawlin an kaihmi US Media pahnih  Laura Ling leh Euna Lee ih suahthei nakding thu tawlrel dingin  US President hlun Bill Clinton cun  tuisun ah North Korea khawpi Pyong Yang a thlengih North Korea Media KCNA News Agency khalin an ramih Bill Clinton a thlen thu cu an tarlang. 

Hi US Media pahinh Laura Ling leh Euna Lee tei pahnih hi North Korea Cozah Court cun kum 12 sung hna harsa zet tuanih thawng tla dingin an tlunah thu a relcat zo ih himi tei pahnih suahthei nakdingah Bill Clinton cun North Korea ram hotu pawl a kawmding. 

Kabul Khawpi Rocket In Kap 

Tuizingah Afghanistan ram khawpi Kabul cu  hmunhlapi ihsin Rocket  voi 5 ih kah a siih, Vanthat thlakzetin mithi an umlo ih nauhak pakhat in hriamhma a tuarih Inn leh dawr thilri tampi a siat. Palik bawi Major, Ghulam Rasul in a simnakah hi Rocket kaptu hi zohman in an tithu an simlo nan Taliban pawl an si dingih an zumthu a sim. 

Police Deputy Chief Mohammed Khali Dastyar cun hi buainak tuahtu pawlcu tuithla ni 20 ih Afghanistan ram hrilawk nak ding duhlo tu  misual pawlih timi a si tiah a simih tulai ah hinTaliban Tapung pawlin  khawpidangdang leh hmun pi tinkim ah buainak tuah an tum ringring tiah a sim.

Thailand Vanzam Caang Sual

Tuisunah Thailand ramih  Koh Samui tikulh ih ttum ding Bangkok Airways Vanzam pakhat Flight PG 266 minung 72 phurtu cu  a ttum zikzawngah a tawlh sualih a mawngtu Pilot 1 a thiih midang 7 in hriamhma an tuar. Hi Vanzam hin Control Tower hlun hman nawnlo mi a pah sual a si, Hriamhma tuartu pawlhi ramdang mihlir an siih bese tuk an umlo tiah thu neitu pawlcun an sim. Hi Vanzam hi ziangruang bikah a caangsual ti fiangtei theih nak a um hrihlo nan thli leh ruah a tamtuk ruangah a si ding tiah zumnak an neiih  Vanzam lam hotu pawlin thil umdan fiangten an zoh rero lai. 

Al-Qaida Hotu In Obama Thiamlo Co Ter  

Al-Sahab Media ihsi Minute 90 sung Video zukih thu reltu Al-Qaida hotu bik sangtu  Zawahiri cun  US President Barack Obama cu  Israel a tanpi ringring ruangah thimlo kanco ter a si tiah a sim. Zawahiri cun Israel cu thil pawimawh titu bik ringring a si ruangah nuai cimit tengteng a ttulih  Obama cu  Bush vek thotho ih Israel  tanpi tu a si ruangah Al-Qaida cu a tlunah rorel sakih hremnak  nazet pek a si ding a ti. 

Zawahiricun Obama cu a tongkam cun thu tha zetzet a rel konan a taktak ah zianghman tuah suak theimi a neilo ih thu neihnak a co hnu ah zianghman thilthar a tha zawngin hmuh ding a umlo a si a ti, Al-Qaida cun US thawi biakawknak ding thuthlung tuah duhhman sehla US cun biakawknakih lenglam ah  mi palbet leh Muslim siatsuah nakding Policy a nei ringring ih cu ruangah  biakawk nakin umzia thar lamdang a suakter cuanglo ding tiah a sim. 

 Zawahiri cun Obama cu Afghanistan, Iraq leh Pakistan ram siatsuah nakding thu leh Muslim pawl kaihnak ding thu a ngaihtuah ringring a si tiah a puhbet. 

Obama Thah Tumtu Tam 

Inthe President’s Secret Service, Ronald Kessler in nganmi cabu thar in a tarlang nakah US President Obama that dingih hro nakca cu nikhat ah 30 hrawng dawng ringring thlukihruah a si tiah a tarlang. Obama in tuikum Janury ni 20 ihsi President thu neihnak a lakih sin thok in Bulpak leh pawlkom zawng hmin khalin thahtumih hro nakca hi a dawng ringring. President hmaisa Bush khalkha hivek thatdingih hro nakca kum khatah 3,000 hrawng a dawng theuih Bush hnakih Obama hin 40% hrawngih tamin a dawngih ruah a si. 

President kiltu US Secret Service cun  President hro nakca hi  Renegade tiin an ko ih President hro nakca pawlhi zohman ih theih lo dingih thuhruk kilhim a si. Nikumihsi khan  US ah mirang vun ngo pawl cungnung bik ih ruat awtu atcilh tu pawl Tennessee an timi pawlcun  Obama hi Midum lakih President a si taktak pangding ti phangin that an rak tum rero zoih President a si taktak hnu tla ah cun  Obama that tumtu hi an tam sinsin. 

 Tuikum Janury ni 20 ih President ih lakluh ni ah khan  Intelligence hotu pawlcun Somalia ih MuslimTapung Al-Shabaab an timi pawlin  Obama thah an tum timi thu an theih ruangah Secret Service cun kilhim nak hnatuan dingtih  minun g 40,000 an ruaiih  cumi cingin khami niih kilhim nak cu a tha tawklo tiah sawisel a si thotho. 

Khami ni ah VIP 100 lenglo leh mipi ziangma wzat cu khawl hmangih an taksa daplo ih fehtlang termi antampi ih President thah duhtu hrangah cun tikcucan tha a tamtuk tiah an sim. Hi Obama thahtum,nak ca pawlhi ngai pawimawh tukding cu an si  lonan daithlan dingkhal a silo tiah antarlang  

 

(Visited 108 times, 1 visits today)

Comments

comments

Comments

%d bloggers like this: