Obama Oath ah Pathian hmin sal tul lo ti

16-01-09:Jame Bond Film a zotu pawl cun an thei fiang awl zet ding. Tui kum US president thar Obama hin Jame Bond ih mawtaw vek a hmang ding. A mawtaw thatzia rel olnakbik cu a siat theilo, a ke an kah tlang hmanah a feh thei lai thotho ding.

A thlalang khal cerek in a hlen theilo dingih a zaten cerek ih hlenlo dingih tuah a si fawn. A Mawtaw sunglam khal ah hmanrua a phunphun a um. Ahmai lamah US thantar a um. Kan sim fiang duh sinsin asile US president mawtaw hnak ih tha US ah a um lo tinak a si.

Hitivekih an tuahnaksan hi umzia tampi a nei. Mi sual pawlih fimnak le thiamnak a karh vivo ruang khalah ralrinnak nasa tak an nei. President Kennedy an rak kahthah ihsin  nasa zetih ralrin an zir.

A mawtaw thatzia hi a hrek hman an simfiang duhlo. January 20 ah Obama cun (oath) thutiamkamnak a nei thlang ding. Himi niah a mawtaw cerek khal ih hlenlomi cu a to thawk ding.

Asinan, tuikum cu kum dang bangin a ram mipi hrangah thlawsuahmawlsawm a um lo ding a bang. Pathian belotu pawl le Pathian zumlotu pawl cun Obama hi tibuai an tum nasa. Zumlotu pawl cun Obama ih a thutiamkamnak ah “So help me God” ( Curuangah Bawipa in bawm aw) timi hmang ding an duhlo.

Pathian hmin sal lo ding rori ih tiamkamnak tuah dingah (atheis)  Pathian zumlo, sakhua neilo pawl in an rak bei. Obama tiamkamnak a tuahnak dingah “Curuangah Bawipa in bawm aw” timi hmanglo ding ih a nawr biktu cu California ih Michael New Dow a si. Tuisun 16-01-2009 rori ah Washington DC, Distric Court ah “So help me God” timi hman ding le hman lo ding thu relcahnak an  nei ding a si.

Newdow cun John Roberts hnen ah “Bawipa in bawm aw timi hmang lo ding lawng siloin thutiamkamnak neihni ah thlacamnak um lo ding rorin a nawr bet.

A thupibik President pawl ih an sam theumi cu cafang (35) a si theu; cucu  US ih  President office hmun le a ram daan le dun pawl cu ka theitawkin ka enkawl ding a si tin a tawinak zawngin a si. Himi theh ah “Curuangah Bawipa in bawm aw” timi George Washington, cun 1789 ah a rak bet. Cumi ihsi thawk in tuini tiang president pawl in an rak hmang thawk vivo a si.

Curuangah Pathian zumlotu pawl cun tuikum cu president thutiamkamnak ah thlacamnak ih “Curuangah Bawipa in bawm aw” timi hman a tul lo tin an tang ve. Pathian zumlotu le patil (tuai) pawl an tangkhawm ih Pathian timi salsuak lo ding rorin an bei ve.

Comments

comments

Comments

%d bloggers like this: