Obama Muslim Ti Tu An Tam

  US Ralkap in Iraq Suah San
 
US in Iraq ram uktu Saddam Hussein ih lal nak kum 2003 ih an hlawnthlak ihsi tutiang Iraq ramih um ringring US ralkap pawl lakih 4th Stryker Brigade 2nd Infantry Division cun mizan sunah Iraq ram an suahsan ih, Iraq ram ihsin Kuwait ah an lutih Kuwait ihsin US an pansal lehding.
 
Relzo vekin Iraq ram ralkap hotu General, Zebari cun tui dinhmun ah US ralkap in Iraq ram suahsan dingih US Cozah in ruahman nak a tuah micu Iraq ramsung buainak leh Bomb puak pawl zoh rero tikah  US ralkap pawlin Iraq ramhi suahsan hrihlo dingin a rak  dil zoih, Iraq ram kilhim nak Iraq ram ralkap kutih ret thluh dingcu a can thei hrihlo thukhal a rak sim rero zo.
 
Asinan Iraq ralbawi thusim himi US Cozah cun a bengkhon tuklo ih, an ruahman nak tuahcia mivekih fehpi hrih dingin US Cozah cun a let. tu ah hin Iraq ramah US ralkap 50,000 an taang lai ih, hi ralkap pawlhi raldo dingih retmi an silo ruangah an ralthuam pawlkhal an mah kilhim awknak tilo cu raldo nakih hmanter sian an silo.
 
US State thupuangtu, PJ Grownley cun Iraq ramih US ralkap pawlcun an thiltuah dingmi pawlcu an tuah thluh zoih, US ralkap in  Iraq ram an suahsan thluh hnu khalah US Cozah cun Iraq ramcu a dungtun cuanglo dingih, Iraq ramih Cozah hngetkhoh a neih thei nak dingah leh a tthanso theinak dingah US cun a bawm vivoding a si tiah a sim.
 
 
UN in Emergency Meetting A Ko Ding
 
Pakistan ramih tilian tuartu mipi harsa pawl UN Secreatry General, Ban Ki-Moon in a mit rori ih a va hmuh hnuah tilian tuar harsa pawl bawnnak ding thuhla reltlang dingin UN cun a Member ram pawlcu Emergency meeting a kawh dingthu  Ban Ki- Moon cun a puangih, a tikcu leh a hmuncu relfel a si hrihlo nan a zamrang thei bikih kawh a siding tiah a sim.
 
Hiti vekih UN in Emergency meeting a kawhnak sanhi Taliban pawl nasa zetih dotu Pakistan ramin harsat nak nasazet a tuar ruangah Taliban pawlih dinhmun a cakbet sal pangding ti UN leh US in an phantuk ruangah a si ticu fiangzetin an langtiah ramdang tampi cun an ruat. 
 
Pakistan ramih tilian tuartu harsa pawl bawmnak dingah paisa dollar Million 460 cu UN in a Member rampawl thawhkhawm dingin a rak dil zoih, Asinan UN Member ram pawlhin beisei hnakih an thawhhlawm hi an thawhkhawm tamtuklo ruangah tuah  dollar Million 295 lawng an hmuzo.
 
Pakisran tilian tuartu pawl bawmnak dingah European Union khalin dollar Million 39 thawhve a tumthu a tiamkam ih, Australia leh Japan khalin ziangmaw zat thawhdingin tiamkam awknak an neivezo. Islamic Devolopment Bank khalin dollar Million 11 leh 2,00,000 tinghnih thawh a tumthu a simve ih, Asia Devolopment Bank(ADB) khalin  dollar Billion 2 cawiter a remti zo, himi hlanah World Bank khalin  Dollar Million 900 a rak cawiter zo.
Obama Muslim Ti Tu An Tam
 
Pew Research pawlin America mipi aiawh minung 3,003 hnen ihsi ngiahdan an lakkhawm nakah President, Barack Hussein Obama cu Muslim sakhua biak nak betu a si titu an tamsawn. Obama ih biaknak lamih America mipi ngaihdan lakkhawm nakhi tuikum March thla khalah lakkhawm nak an raktuah zoih,  tuikum March thla hnakin tu ah Obama hi Mulsim ih ruattu an tam vivo.
 
Hiti vekih Pew Research pawlin Obama ih sakhua biaknak thuhla mipi ngaihdan an laknak sanhi tuittum Mulsim sakhua betu pawlih ni leh thla pawimawh Ramadan caan ih Obama in a umnak Inn ih zanriah i khawmnak puai a tuah ruangah a si.
 
White House thupuangtu cun  President, Obama ih sakhua biaknak thuhla ih mipi ngaihdan lakkhawm ih mipi theihih puanzar ciamco hi President, ti hminsiat leh ti mualpho tumnak thil ttullo zet a siih, Oppsition pawlin a thuptei an phiarruk nak thu a siih, himi ruangah mipi in Presidnet, cu zumlo nak leh rinsan lo nakah an hmanphah thei ruangah thil tthalo zet a si tiah a sim. White House Faith Adviser, Joshua Dubois cun President, Obama hi Kristian diktak a siih, a sakhua biaknak thuhla ah thu diklo thehdarh tumtu an um asi a ti. 
 
Relzo vekin Obama hin World Trade Centre kiang Ground Zero point ih Mulsim pawlin biak Inn Mosque sak an tumnak thuhla ah Obama cun a lungkim pi ih, Mulsim sakhua betu khalin sakhua dang vekin  America ramsungah zalen nak an nei veih, America Cozah in sakhua biaknak thleidan a neiding a silo tiih a ti ruangah America mipi sawisel a hlawhzet.
 
 
UN Member Ram Pawlin Pakistan Bawm Nak Pe Bet
 
Relzo vekin Pakistan ram tilian tuartu pawl bawmnak ding thu relkhawm dingih UN Secretary General, Ban Ki- Moon in UN Member ram pawl Emergency Meeting a kawhkhawm nak cu mizan sunah New York khawpi ah tonkhawm awknak an neiih,  himi ah UN Member ram pawlcun  Pakistan ram tilian tuartu pawl bawmnak ding paisa an thawhkhawm bet rero.
 
Pakistan ram tilian tuartu pawl bawmnak ding sumpai hi UK cun a hlan ih thawhding zat a rak tiamkam awkmi ih hleiah Pound Million 64 thawhbet a tumthu a puangih, US khalin a hlanih dollar Million 90 a thawhcia mi ih hleiah dollar Million 60 thawhbet a tumthu a puang betsalih, US Secretary of State, Hillary Clinton cun an sum thawhding mi sungih dollar Million 92 cu UN kutsungah a lut hmaisa ding tiah a sim,
 
Europen Union khalin dollar Million 180 an thawhbet dingthu an simih, German khalin dollar Million 32 thawhve a tumthu a puang. Hiti vekih UN Member ram pawlin sumpai an thawhkhawm bet ruangah tui New York khawpi ih caam lai Pakistan  Foreign Minister, Shah Mahmood Qurshi cun UN in an ram tulian tuartu mi harsa pawl bawmnak dingih paisa dollar Million 460 a dil micu a kimthei dingih a beisei thu a sim.
 
Pakistan Foreign Minister, cun Pakistan ram tilian ruangih harsat nak tuartu mipi pawlhi a zamrang thei bikih bawmnak pekih tuamhlawm loh li lo an si ah cun Taliban pawlin tikcu remcaangah la in an pawl ih mipi thlemlut nakah an hmang pangding ti a phan thu khal a sim.
 
(Visited 122 times, 1 visits today)

Comments

comments

Comments

%d bloggers like this: