Obama In Ralkap Kuat Bet Ding Thu A Puang

Obama In Ralkap Kuat Bet Ding Thu A Puang
 
US President, Obama cun Afghanistan ramih US Ralkap 34,000 an kuatbet dingthu a puang felzo. West Point Military Academy ih thuthangca latu pawlih hmaiah Obama cun  ralkap an kuatbet dingmi pawlhin Afghanistan ramih US ralkap umcia 68,000 pawl cu Tapung misual pawl donak ah an bawm dingih, hnakum January thla ah hi US ralkap 34,000 pawlcu Afghanistan ram saklam leh thlanglam ah kuat an si ding a ti.
 
Obama hin ralkap kuatdingih thutluk nak a tuah hlanah an ram hotu dang leh ralkap hotu pawl leh British, France, Australia, Russia , ram hotu pawl khal bia in Ralkap kuatbet ding thuhla a relpi hai. Ralkap kuatbet ding thuhla ih tlunah  Afghanistan ramih US Cozah in thiltuah a tumtah mi pawl khal Afghanistan ramih US Ralkap hotu General Stanley McChristal leh Afghanistan ih US ram palai Ambassdor,  hlun General, Karl Eikenberry pawl a biak rawn hnu ah thil tuah dan ding leh thil ttul dangcu an ram rorel nak Inn sang Congress Member pawl thawn hmai zarh ah an rel tlangding.
 
Tapung Hotu In US A Puh
 
Tuisunah Lebanon ramih Hezbollah Tapung hotu Hassan Nasrallah cun  leitlun ih  buainak leh suahsual nak pawl suakter thluh tucu US a si tiah a puh. Hezbollah hi Lebanon ramih Party pakhat a siih, Asinan an thilti dan leh an umdan an zoh tikah US leh Isreal cun Tapung misual pawlkom ah an retih, Cu ruangah an hotupa  khal caan ziangmaw zatsung a relh hlo ringringih Lebanon ramin tuikum June thla ihsi Cozah muamal a neihlo ihsi tlacun an relhhlo ringringih , Asinan tui naite ihsi Lebanon in Cozah thar a neihsal ruangah tu ah cun a hung ttongsuak sal leh nak a si,
 
Hi Hezbolllah Tapung hotu Hassan  Nasrallah cun leitlun ih rualrem awknak a um thei nak dingah Arab leh Muslim ram pawl cu ttangtlangin Isreal ram nuaihlo a ttul a si a ti. President, George W Bush in US ih thu neihnak a co laiah leitlun ram tinkim ih minung diknak covo cu a siatsuah thluh ih, misual leh hawizawnglo pawl cu fuihporh in buainak leh sualnak phunphun a luar vivo ih, Cu ruangah  Muslim ram pawlcu ttangtlangin  Syria leh Iran cu Muslim ramih mi pawimawh an si a ti. Iran cu Muslim biaknakdan diktak ih feh ngan umsun ram a si  a ti.
 
 
Iran In Nuclear Thilri Tuahnak Neibet Tum
 
Tihni sunah Iran ram Parliament cun an Presient, Mahmoud Ahmadinejad ih hoha nakih an to khawmih, Iran cun Nuclear tuahnak hmun 10 neihbet an tumthu an puang.Himi ih tlunah an Parliament Member hrekkhat pawlcun an President, cu IAEA be pop nawnlo dingin an nawr. Hiti vekih an ram Parliament in thu tluknak a tuah ruangah an ram Nuclear ralthuam buaipi tu Iran  Nuclear Agency cu Uranium tuahnak dingih an timtuah ciami hmun 5 ah hna ttuancih ih thla hnih sungih tifel dingin thu an pe cih.
 
Himi ruangah Iran thilti dancu Europe ram pawlcun lungawi lo in an sawsel zetih, US Cozah thupuangtu Robert Gibbs khalin  Iran cu UN Security Council thu pekmi ngai pawimawh lo ih phirsit ah a puh. UK Cozah khalin Iran cu UN thu pek ngai pawimawhlo ih thil a ti ruangah hremnak pek tengteng a ttul a si a ti. France Foreign Minister, Bernard Kouchner khalin  Iran Cozah thiti dancu nauhak luhlul thu lung duhlo vekfang a siih, leitlun ramdang pawl ti ningttih tumnak a si  a ti.
 
Iran Vice President, Ali Akbar Salehi cun  khawthlang ram pawlih thiti dan zohfiang tikah Iran cun himi thu tluknak tuah lo thei a silo ih, kandung kar tlawngkai ni 5 ih IAEA in Nuclear thilri tuah nawnlo dingih thu a pek ruangah Iran in a lungawilo nak a langter a siih, Iran cun Nuclear tuahnak hmun hi a neihcia mi hnakih tumsawn neihbet a tum cuanglo a ti.
 
Himi laiah China Foreign Ministry thupaungtu Qin Gang cun  Iran Nuclear thuhla cu ttongkam ih relfel theih a si a zumthu a rak simve ih, Relzo vekin kandung tlawngkai ni 5 ih IAEA in Nuclear thilri tuah nawnlo dingih Iran thu a peknak ah China khalin IAEA thu hi a rak thlawp ve nan hremnak pek ding taktak ah cun  China in Oil a lakluh  tam bik nak ramcu Iran a si ruangah IAEA thuhi a thlawp ngan sallo ih ruah a si.
 
 
Honduras Ram Hrilawk Nak
 
Honduras ram President, Manuel Zuleya an hlawnthlak hnu ih an ram hrilawk nak an tuah mi ah  President, Manuel Zuleya hua zettu  Porfirio Lobo cu Honduras ram President, ah hriltlin a siih, hi an hrilawk nakah hin Honduras ram Vote neithei mipi 60% in Vote an thla ih cumi sungah  Porfirio Lobo in Vote tla sungah Vote 56% a hmuban. Lobo hi kum 2005 ih an ram hrilawk nakah khan tui an hlawn thlakmi President, hlun Manuel Zuleya rak nehlo tu a si.
 
Tui an hrl tlinmi Lobo hi NationalParty a siih President, ih tlingih an puan veten  Argentina leh Brazil Cozah cun  Honduras President, ih an pawmlo thu an suahcih ve ih, Cozah mumal  umlo dan leh dun khal thatei umlo ih hrilawknak tuahmi a si ruangah thildiklo a tampi ih cu ruangah  Honduras ram hrilawknak cu kan pawmlo tiah an puang.
 
Brazil President,  Luis Inacio Lula da Silva cun  hrilawk nak tuah thluh hman haisehla  Cozah in kilhim nak thazet tuah dingih a tiamkam awklo ah cun President, hlun Manuel Zilaya cu Brazil Embassy ihsin a suak hrihlo ding tiah a sim.
 
Himi laiah US cun Honduras ram hrilawk nak a pawmthu a paung v eih, State Department thupaungtu Ian Kelly cun  Honduras ramih mipi rorel nak diktak a um theinak dingah  hna ttuan ding tampi lai hman sehla  President, thar an hril suak thei ruangah tthanso nak lamzin an  zawh ti a langter tiah a sim.
 
US Ah Ralkap Pali Kapthat
 
US Vanzam ralkap hmunpi McChord AirForce Base kiangih Coffee dawrah  minung pakhat in ralkap pawl a pawngpa kah ruangah ralkap 4 anthi. McChord AirForce Base hi  Seattle khawpi ihsi Km 40 ih um a si,
 
Pierce County Sheriff thupuangtu Ed Troyer cun  hi buainak thlendan a sim nakah Ralkap 4 in Coffee dawrah Coffee in phah in  Labtop thawn hna an ttuan phah ih cumi laiah zo ti theihlo midum kum 20 leh 30 karlak mi hrawng meithal thawn a lutih Ralkap pawlcu a kap ciamco ih cumi hnu ah an kiangkap ih midang um pawlcu kapbet lo in a tlansuaksal tiah a sim.

(Visited 52 times, 1 visits today)

Comments

comments

Comments

%d bloggers like this: