Obama in President Hril Nak Vote A Thla Zo

Obama in President Hril Nak Vote A Thla Zo

Pusum

US President, Obama cun hmaithla November ni 6 ih US President hrilawk nak dingih Vote cu a thlazo ih, US President ttuanzo tu pawl lakih  a tikcucaan kimhlanih President hrilawknak Vote thla hmaisabik a si. President, Obama hin  Chogaco in Martin Luther King Comminity Center ah vote a thla ih,  hrilawk naklam tawl reltu nunau pakhatin  Obama in Driving Licence cu a zohsakih a mah taktak a sileh silo a fiang hnuah vote thlakter a si, Obama cun a Driving Licence a phorh phahah capoh in  ka Driving Licence ah cun a sam a parlo ih bangawklo nak malte kan neih a si khal len  in theihthiam ka beisei tiah a capoh.

Zoha na vote ding tiih capoh ih an suh nakah Obama cun America rampi daan ah vote cu mai duhduh a thup tei pekding a si ruangah rellang a thianglo ih, ka nupi cun keimah in vote ka zum tiah a sim. November ni 6 ah President hrilnak an nei dingih tui dinhmunah President, Obama leh a cuhtu ding Mitt Romney hi mipi zumdanah a thlau aw tuklo ih ruah a si.

US Ah Tottum Thlipi A Hrang

Theihcia zovekin US ramsungih thlipi hrang ruangah ramsung mipi an talbuai nasaih, khualtlawng sukso minung thawngtel pawlcu an fehnak ding hmun thlengtheilo in  lamlakah an tartahakih, US ram sungih Vanzam zuang sukso ding vanzam 7,000 pawlcu zuangsuak theilo in colhter thluh an si. Tihni zan ihsin Washington DC ihsi Boston panding khualtlawng pawlcu thlipi leh tilian in a khamih tihnizan zan nazi 9:00 tiangkha vanzam zuangsuak ding vanzam 7,100 cu zuangsuak lo in colhter an siih, Sandy Airlines khalin himi thlipi hrang ruangih khualtlawng sukso tartahak pawlcu theihthiam saknak tampi a neihsak thu an sim.

New York khalah khualtlawng sukso tartahak minung tamzet an umih, Vanzam zuangsuakding pawlkhal an buaizetih, US airways cun  himi thlipi ruangah vanzam 2,000 hranwgcu caangtheilo in an um tiah an simih, himi thlipi hrangruangih US in sumpai an sundingzat hi theihfiang a sihrihlo nan  Million tamzet a kimdingah ruah a siih, Vanzam ih khualtlawng tartahak pawl leh hnattuan tupawl hnatuan theilo ih um pawlkhal an hlawh pek thotho an ttulding ruangah thuahhnih in paisa a cemdingih tampi an sumphah dingah ruah a si.

US Cozah cun tihni sun ihsin Vanzam  140 a cawlter zoih, mizan sun ihsin thaisun tiah  Vanzam 1,431 an cawlter ding. Jetblue Airways khalin Vanzam 1,000 an cawlhter dingthu an simih, Delta Airlines khalin mizan sun ihsin Vanzam 180 an cawlhter thu an puangih Himi thlipi “Frankenstorm“ an timi hin  mizan ah khan New York a nuai lehsalih ziangtlukin buainak a suak timi thufiang report a um hrihlo.mizan sun ah khan New York thu neitu pawlcun hmunniam deuhih um pawl minung 3,75,000 pawlcu hmunhim lamih thiarsuak aw dingin thu an pe ih. himi thlipi hrang ruangah America ramsung State tampi ah Emergence puan asiih  zirnak tlawng tampi khal khar an si, kandung zarh ihsin  himi thlipi in  Caribbean ramthen a nuai ruangah minung 60 lai an thizo.

Burma Ram Rakhine State Buai Nakah  Ralkap Kuat Tam Bet

Burma ram Rakhine State ih  Budhist leh Rohingya Muslim pawl karlakih buainak suah cun zia umlam a pan theihrih cuanglo ih, himi buainak tuithla ni 21 ihsi suakthar sal mi ah minung 84 an thi ih midang 129 an hraimhma an tuar.himi buainak hmun ihsi hmunhim lam panih tlansuak cu minung 28.000 an siih, himi buainak in sosan lam a pan vivo dingih a lang ruangah Burma ram Cozah cun  buainak kilhim dingih ralkap tamdeuh a kuatbet thu mizan sunah an puang.

Human Rights pawlcun himi buainak ih mithi cu 84 lawng silo in a letih mithi an tam an zumthu an simih,  Rohingya Muslim pawlhi tikcu caan reipi ihsi Burma ramsungih rakum an sinan Burma Cozah in a ram sung mipi miphun 135 lakah a siartel duh silo ih, Bangladesh ram ihsi ralut an siih, Bangladesh Cozah in le an rammi ah a pawm duh ve silo curuangah  umnak hmun hnget neilo in vak vaivuan deuhih ruah an si.

UN cun Rohingya Muslim pawlhi Burma ram sungah minung 8,00,000 hrawng an um tiah a simih, himi an buainak ruangah leitlun ram dangdangin Burma ram Cozah cu himi buainak tireh zamrang dingin an nawr rero fawnih, Curuangah  President, Thein Sein ih Office in thusuah an suah nakah  Rakhine State in  mipi pawlcu thahrum hmangih buainak tisuaklo hram dingin an ngennak thu an suahih, Palikleh ralkap pawl leh mipi tthangkawpih buainak tireh dan lamzin an hawl rero laithu khal an tarlang.himi buainak ruangah Burma ram hmelkhal a balhphah tiah an tarlang.

Himi buainak ruangah minung umnak In 1,948 leh biaknak sakhua In 8 cu urkang leh siahbal an siih, tuikum June thla ih himi buainak a raksuah zo laiah khan minung 92 an rak thizo. tuah himi buainak ruangih raltlan minung 75.000 pawlcu  relief camp ah an tawmkhawm lai.

Israel Leh Palestinian An Kapaw

Mizan zingah khan Gaza Strip ih Palestinian Tapung Hamas pawlin Israel ram sungih  rocket voi 11 an kahlut ruangah Israel minung 4 in hriamhma an tuar, Himi ruangah Israel ralkap pawl khalin airulh nakah Gaza ram thenih Hamas pawlih umnak hmun ziangmaw zatcu raldo nak Vanzam in an kapveih minung ziangzat an thi timi fiangten an rello. Palestinian Hamas leh Israel hin kahawk nak colhsan dingthu tiam an tuahnan an thutiam tuahmi hin a daih reilo ih, kandung zarh khalah Hamas pawlin Israel ram thlanglam ah  Missile voi 50 lai an kaplut ih, a sinan  Israel ralkap pawlin  Defence Missile Drone an timi hmangin Hamas pawlin Missile hi an kahthlaksak thluhih, cumi veten Israel ralkap pawlin Hamas pawlin umnak hmun  cu vanzam hmangin an kapsalih minung 6 an kapthat. Isreal ralkap pawlih kahthatmi Palestinian pawlhi  Hamas pawl hnuaiih um ralthuam meithal keng Izzedine Al- Qassam Brigades pawlih umnak khan Younis kiangih um pawl an si tiah Isreal Defence Ministry cun an sim.

Al-Qaeda Hotupa in Obama Cu Thuphanper Mi Hrokhrawl A Ti

Islamic Weside in an tarlang nakah Al-Qaeda hotupa Aymam Al- Zawahiri cun  Muslim mi pawlcu khawthlang ram mipawl ruhlo dingin a fawrh haiih, Syria ram buainakih tel dingin leh Egypt ramih Muwlim daan khirhkhanzet Sharia daancu hmansuak tengteng a si theinak dingah ttanla cio dingin a sawmhai.

Hi Al-Qaeda hotupa cun  Allah bawmnakin  Muslim sakhua betupawl hrangih mi hnawksak pawlcu ti hloralin an um vivo dingih, Muslim pawl dotu khawthlang ram pawlcu tihloral an si ding a ti. Syria ram buainakah President, Bashar Al- Assad cu leitlun ram tinkim in thah an duhih cu ruangah hlawnthlakih kaih ih thah a si ding a tiih, Egypt ram President thar, Mohammed al- Morsi cu  Israel leh Egypt ramih Kristian pawl a hmuhdan relsuak dingin thu a pe ih, US President, Obama cu thuphanper, mi hrokhrawl leh sal miphun  a si a ti.

(Visited 105 times, 1 visits today)

Comments

comments

Comments

%d bloggers like this: