Obama Ih Ruahman Nak Pawm

January 30,2009.
by- Khuang Lian Sum
 
US House Of Representatives In Obama Ih Ruahman Nak Pawm
 
US rorel nak In sang pakhat  House of Representatives cun President Obama ih  ruahman mi  America ram sumpai dinhmun tlasia tundin salnak dingih  dollar Billion, 825 cu hmangthei dingin an pawmpi felzo ih,  Himi vote laknakah vote 244 in an pawmpi ih. Vote 188 in pawmpi lolam ah vote an pe.  Republican rorel tu pawlcun  an rak relzo vekin  hithu ruahman nakcu a taktak ih hman theilo dingmi leh thil harsa tuk asi tiah vote laknak khalah zohman in a pawmpi zawng in vote an pe duhlo.
 
Hiti vekih House of Representatives in a pawmpizo ruangah  Senate in a ngaituah betsal a ttul dingih. Hi House ah hin  Democratic member pawlih telnak a malsawn ruangah  hi ruahhman nakkhal in dodal nak nasa zet a tawngthei lai tiah zum a si..
 
LTTE Pawl An Tlasia Vivo
 
Sri Lanka ralkap pawlcun  LTTE hotu pa V. Prabhakaran cu kaih tih in a relh nak hmun dangdang ah a thawn vivo  tiah an sim. Killinochchi khalah tuihlan ih a rakrelh naktheu leilung kawsung cu  Sri Lanka ralkap pawlin an hmusuak zo ih Mullaitivu kiang hramlak ih LTTE pawlih relhnak hmun  Visuamdu khal Sri Lanka ralkap pawlin  Raldo nak vanzam thawn an kap rero laiih  LTTE pawlhi Sri Lanka ralkap pawlin an kawtawp tiang an nawr rero ruangah an talbuai zet tiah  Sri Lanka ralkap thu puangtu cun a sim.
 
Japan In Raldo Nak Lawng Somalia Ah Kuat
 
Japan cun raldo nak lawng leh Navy ralkap ziangmawzat cu  Somalia tipi thuanthum ih lawngruk hmang misual pawl donak ah telve dingin a kuat. Himi hi an ram Cozah dodal tu Opposition party cun nasa zetin an dodal ih. An duhlo naksan bikcu ramdang do awknak ah leh  siim awknak ah Japan ram hnuklut tuding Point tumzet asi an ti. Leitlun ralpi 2 nak hnu ih Japan ram dan ah. An mah kilhim awknak ih doawknak lawngah Japan ralkap hi an telthei ih. Mah kilhim awknak siloin.raldang an dolo ding tiah dan an raknei. Asinan Cozah lamcun himi hi ramdang siim leh donak silo in misualpawlih thilti mi an kilding asi sawn tiah an simve.  Defence Minister Yusukazu Hamada cun  an lawngpawlhi Japan sundawngpawl kilhim dingih thlahmi an si tiah a simbetih. Lawng rukhmang misualpawl hin Japan lawnghi
vawithum an kapzo ih. Japan lawngcu rukhlo mi cu neihrihlo hman haisehla kilhim an ttul asi tiah a simbet.
 
[  Himi laiah  Japan  Court in misual thiding ih thu a relsak mi minung 4 cu  an that salih. 
Hi pawlhi  Tokyo, Nagoya leh Fukuake ah thah an si tiah  Kyod News Agency cun a sim. Leitlun ramtam zetih sawisel leh dodal nak lakah Japan cun  Misual thitlak ih a ruahmi cu a that rero laiih. Nikum 2008 ah khan minung  15 a that ih  2007 ah khan minung 9 a thatzo  Japan Cozah in mi a thah mipawlhi a thupten hmunkawnker deuhah a that theuih. Amnesty
International, Cun  misual thahnak danhi hmangnawnlo dingin  Japan hi a nawr ringring nan  tu khalah Court in misual thiding ih thu a pekmi minung 100 lenglo in thawngin sungihsin thih an hngaklai.
 
Ban Ki- Moon In Gaza Bawmnak ah Dollar Million 613 a Ttul A Ti
 
UN Secretary General Ban Ki- Moon cun Israel in Gaza khawpi a kahsiat mipawl bawmnak leh tundin salnak dingah  dollar Million 613 a ttul a ti. Hi thuhi  Davos ih World Economic Forum tawnkhawm awknak ah a sim. Ban Ki- Moon cun hi doawknak ruangih thilsiat leh thil ttul pawimawh a tamtuk ruangah sumpai hi a cemtam lo theilo a ti. Hi paisa thawhkhawm dingin ram dangdang a dil vivo zum asi ih. Israel leh Hamas pawl in rualrem nak Ceasefire an tuahhnu khalah Ban ki-Moon hin Gaza hi a vazoh ih  Do awknak sulhnu leh thilsiat pawlcun a thinlung  an tibang zet thu a simih Bawmnak hi zamrang zetih pek an ttul thukhal a sim.
 
Iran President In Ngaidam Dilding Ah US Phut
 
Iran President Mahmoud Ahmadinejad cun  US in tuihlan ih Iran mipi hnenih thilsual a tuah ruangah Iran mipi hnenah ngaidam dilding in  US President Obama a phut.  Iran President cun  Khermenshah ih thu a sim nakah a liamcia kum 60 ah khan US cun Iran mipi pawlcu rak dodal in an hrangih buainak leh harsat nak thlen a tum ringring tiah a sim. Iran President Mahmoud Ahmadinejad, cun  Thiltha zawngih thleng danglam tumtu, Change, Change, ti ih  Au rero tucun Thiltha danglam ih thleng awkter a duh asi ah cun Iran mipi hnenah ngaidam a dil hmaisak atul a ti.
 
US President Barack Obama cun kandung tlawngkai nikhat ah khan  Saudi Arabia ih Arabic TV Network hnenah Iran in a kuttum hum a phelh asi ah cun  US cun rualpi tha siding ih banphar a hrehlo tiah a raksimzo. Iran President Mahmoud Ahmadinejid hi tuikum June thlaih President hril awknak dingah cuhsal atum ih tlinsal khal a zum aw ih. US thawi  rualrem nak boruak tha tuahthei nak dingah cun Obama thawi an kawm ngaih awkzet a tul hmaisa ding ah zum asi.   Iran President ih  lungawilo mi US in Iran hnen ih thilsual a tuah micu  kum 1953 ah Iran Cozah hlawnthlak tumtu pawlkha US in a rakbawmih.  Kum 1980 hrawngah Iran leh Iraq an rakdo awk laiah US in Saddam Hussein an rak tanpi kha  a si. Iran President cun America in a thinlung thlakthleng a tumcu thil lungawi um asi nan  a thil tuahmi in a langter a tul asi ati.
 
Politics timi ah kumkhaw hrang thu hnget timi a um theilo. Tuisun ih naral kha thaisun ah narual asi sal thei.Tui sunih na rualpi thazet khal thaisun ah naral asisal thei, Cu ruangah Politician Mifim pawlin an hmailam cansaupi hrang thu ruatban cia in  thu an rel ttheu a si,.
 
(Visited 25 times, 1 visits today)

Comments

comments

Comments

%d bloggers like this: